Reggae
Oet Wikipedie, de vraaie enzyklopedie
Reggae is n Jamaikaansen meziekstiel den in de joarn '60 van n 20sten eeuw onstoan is oet ska. t Wördt ekenmoarkt duur n troag tempo, duur n oawerheersenden basgitaar den n heel nummer duur n zelfde ritme speult en n afterbeat; t geliekertied noa de tel spöln van n slaggitaar, Rock-örgel en mangs n piano, wat ook wal de skank eneumd wordt.
n Bekeandstn reggae-artiest was Bob Marley. Hee hef dr vuur ezorgt dat reggae ook boetn Jamaika bekeand wör.
Reggaeteksen goat vaake oawer serieuze dinge, zooas leefde, oarmood, sosjale probleeme, t leawn in de slopnwiekn en vriejhaaid (van öar vroogere slaawn-bestoan). Dit wördt ook wal roots reggae eneumd. Roots reggae wordt vaake dreks met marihuana in verbaand ebrach. Dit keump duurdèt reggae völle duur anhangers van t rastafarianisme espöld wordt, dee marihuana reukt um religieuze reedn.
Onderwarpen |
[bewark] n Naamn
Dr zeent verskilnde verhaaln oawer t ontstoan van n naamn. n Jamaikaansen band Toots & The Maytals beweart dèt zee n naamn vuur t eerst gebroekt hebt in öar nummer Do the Reggay. n Aander verhaal geet dèt t n onomatopeejies woord is, vanweage den kemoarkenden afterbeat.
[bewark] t Ontstoan
Dr zeent verskeaidene verhaaln oawer wo t onstoan is: T eerste verhaal is: In de joarn '50 was ska machtig populair op Jamaika. Dr wör aaltied onmeundig oetbeundig op edaanst. Mear toew dr ne hittegolf was, gungn de leu van de beene. Doarumme vreugn de organisaasies van de verskaaidene festivals of de mezikaantn wat laankzamer konn spöln, zodat de leu t better oethooldn konn. Dee maneere van spöln hef toew duur ezat en oeteanelek kwam doar reggae oet. Mear t is te kort duur n boch um te zegn dat reggae laankzaamn ska is.
T tweede verhaal is:
In de joarn '50 warn de Rude Boys (Engels vuur rauwe jongs) n subkultuur in Jamaika en Engelaand. Dit warn jongs (en meakns) oet de slopnwiekn, dee zik woln oonderskeaidn van de rest van t volk en zik ofzatn teegn t heersende beweend. In de daanshaln wör nog aaltied ska espeuld, mear de Rauwe Jongs veundn t nit biej öare oetstroaling passen um oetbeundig op den vlotn ska te daansn, doarumme steundn ze n betjen ofziejdig en daanstn half tempo. Dus eens zo laankzaam, mear wal in de moate. De mezikaantn woln natuurlik geeld verdeenn en passn öare meziek hierop an duur ska op half tempo te spöln.
[bewark] Instremeantn
n Basis van reggae wordt eleg duur 4 instremeantn:
- Drums
- Basgitaar
- Slaggitaar
- örgel en vaake nog piano
Natuurlek kommt doar dan ook nog vokaaln biej.
Vaake wordt doar nog verskaaidene biej-instremeantn an too-evoogd, vaake percussie. Toew reggae nog vraai joonk was, en dus nog kort bie ska lea, zatn dr vaake ook nog bloasinstremeantn biej, zooas n trompet, trombone en saxofoon. Mear dèt is de leste joarn mear oetzoondering as reegel.
[bewark] Kenmoarkn
Reggae wordt aaltied in 4/4 moatsoort espölt. Dit keump duurdèt t den kenmoarkenden afterbeat nit in aandere moatsoortn te spöln is. Doo-j dit wal, dan is t gin reggae mear. Reggae hef n seempel akkoordnschema. n Nummer besteet hoaste nooit oet mear as 4 akkoordn, en zelfs dát is al ampat. Vaake zeent t r 2, of zelfs 1.
[bewark] Bas
n Bas hef oawer t algemeen n patroon van 2 moatn, ofhaankelik van t akkoordnschema dat n gitaar, t örgel en n piano spölt. n Bas spölt meestieds korte teunn, woerduur t zowal ritmies as melodieus wat toovog. Doarumme wordt n bas ook vaake tot n Ritme-seksie ereknd.
[bewark] Drums
n Reggae-drumstel besteet net as aandere drumsteln oet n bassdrum, kleaine tromme, hihat, bekns en toms. t Vel van n snaredrum is hierbiej ekstra strak opedreejd, zodèt-e n hoog, metaaln geluud krig.
Op reggae zeent 3 verskilnde ritmes te spöln:
[bewark] One Drop
Dit is t bekeandste ritme en tiepies vuur roots reggae. n Bassdrumslag keump nit, as in aandere stieln, op n 1en en n 3den tel, mear op n 2den en n 4den. Dit geet geliekop met n rimklik op n snaredrum. Dit wordt an evuld met 8sten en of en too 16den op n hihat. Op n eersten en n doarden tel heur ie dus alleene nen hihat. Doarumme het dit ritme One Drop, umdat n eersten tel 'weg eloatn' wordt.
[bewark] Rockers
Dit is n standaard rockritme, met n bassdrumslag op alle 4 teln, n snaredrumslag op n tweedn en veerdn tel, opevuld met 8sten of 16den tuskenduur.
[bewark] Steppers
Dit ritme hef n bassdrumslag op alle 4 teln van de moate, mear ook tegelieke met n Hihat op alle 8sten tuskenduur. n Snaredrum hef n slag of rimklik op iedern tweedn en veerdn tel.
[bewark] Gitaar
n Gitaar spölt de akkoordn aaltied heel kortangebeundn, of stakkato, op de 8sten noa de tel. Of en too keump hier nog nen opwaartsen slag op n 16en direkt achteran. Dat is t bekeande reggae-geluud. n Bekeand vuurbeeld hiervan is Bob Marley's nommer Stir it Up.
[bewark] Örgel
n Reggaeörgel is n standaard Hammond-örgel, dèt ook völle in rock en aandere stieln van meziek wordt gebroekt. Ook t örgel spölt de akkoordn noa de tel. Meestal wördt hier dan ook nog op de 16en tusken de 8sten duur t zelfde akkoord n oktaaf leeger espeuld. Dissen bubble, zoas dissen techniek ook eneumd wordt, is tiepies vuur reggae.
[bewark] Piano
n Piano is dr in laatere joarn pas an too evoogd, um t vuur de Amerikaanse en Europese oorn wat meuier te loatn kleenkn. Ook n piano spölt akkoordn op n 8sten noa n tel.
[bewark] Geluudsvuurbeeld
Um de kenmoarkn van reggae wat duudeliker te maakn is dr n spesjaal geluudsvuurbeeld vuur Wikipedia produseerd. t Begeent met n One drop drumritme. Doar keump dan de afterbeat bie. Doarnoa heur-j allene drums + basgitaar. Doarnoa drums + basgitaar + afterbeat en bubble (t kenmoarkende örgel). Doarnoa heur-j allene drums + bubble, um eawn good te loatn heurn wat de bubble non feailik is. Doarnoa keump t hele spul bie mekoar, mear dan met bloazers dr bie.
[bewark] Bekeande artieste
Internasjonaal:
- Bob Marley
- Augustus Pablo
- Peter Tosh
- Bunny Wailer
- Culture
- Freddy McGregor
- Jimmy Cliff
- Lucky Dube
- Linton Kwesi Johnson
- Prince Far I
Nasjonaal:
[bewark] Oetgoande verbeendige
 |
