Kleaine tromme
De kleaine tromme, skoarpe tromme of snoartromme (Engels: snare drum) steet bekeand um zin skoarpe, ruusnde geluud. Det geluud krig e duur n matjen van snoarn wat laanks t oondervel is espönn. Duur op de tromme te houwn wordt de snoarn an t triln ezat, woerbiej ze t vel raakt.
Kömp an bod |
Geschiedenis [bewark]
De eerste snoartrommn hadn velle dee't emaakt warn van bloazn van deers, en nen eankeln doarm as snoare. Pas vanof 1956 wordt velle van keunststof emaakt.
In de late middeleewn (tusken 1600 en 1700) wör de tromme in Zwitserlaand in ezat vuur t begeleaidn van marsjeernde troepn (later wör hier meardere instremeantn an too evoogd, woerduur de militaire kapel ontsteun). De tromme wör gebroekt um verskeaidene bosskopn oawer te brengn. Zo warn der ofzeunderlike signaalstukke vuur t etn, vuur t opmaakn um te marsjeern, ezw. Dit gebroek wör in heel Europa oawer enömn. Vanof dee tied wördn de verskeaidene rudimeanten (bepoalde ritmiese basisfiguurn) ok noteerd en in lessen verwoarket. De leste 2 eewn hef de snoartromme völle ontwikkelingn met emaakt, zowal in slagtechniekn as in bouw.
In 1914 bedachn Robert Danly n mechaniek um de snoarn teegn, of van t vel of te dreein. Duur nen hendel oawer te haaln wordt doarmet de snoarn ongevear nen centimeter van t vel of edoan, woerduur't ze nit mear köant triln. Hierduur keump dr n tomgeluud an.
Met t onstoan van Jazz kwam de vroage noar kleainere tromn. Dee wördn toew zo an epast det ze in n drumstel past.
De ontdekking van keunststof hef völle veraanderd in wodöanig de snoartromme dr rechtevoort oet zut. n Kettel wördt rechtevoort van hoolt, metaal of keunststof emaakt en kan in iedern geweunsketen kluur vuurkomn. De velle wordt rechtevoort ook van keunststof emaakt, of mangs zelfs van kevlar. Ook de snoarn wordt rechtevoort van keunststof emaakt, of, vuur n dubbel zo skoarp geluud, van metaal.
Soortn [bewark]
de Snoartromme is feailik in 3 soortn te verdeeln.
- Drumstel- of orkestsnoarntromme
- Marsjeertromme
- Amerikaanse of Skotse (marsjeer)tromme.
Drumstel- of orkestsnoartromme [bewark]
Dit soort wörd in orkestn en drumsteln gebroekt en is doarumme miskien rechtevoort wal t bekeandst. ne Normale moate vuur tromn is ongevear 35cm in diameter. Dit geeldt vuur alle soortn snoartromn. Ne normale drumstel- of orkestsnoartromme is ongevear 15cm deepe, mear dr bestoat ook snoartromn van ongeveer 7,5cm. Dit wordt ne pikkolotromme neumd, of in n volksmoond pannekookn, umdet e zo plat is. Disse trumkes wordt vake duur kleaine wichter in traditionele korpsn edreagn, umdet ze hoaste niks weagnt.
Marsjeertromme [bewark]
Disse tromme wördt in tradisjonele korpsn bespölt en wördt vuural in marsmeziek gebroekt. t Verskil met n vuurigen is dèt-e dubbel zo deep is (wörd doarumme ook wal depe tromme neumd). Hierduur krig e n vol, deep geluud, zodet t boetn wieter dreg.
n Spöller dreg t deenk an n reem oawer n rechterskoolder (woerduur-te skeef op t leenkerbeen haank) of an nen beugel oawer beaide skoolders, woerduur't e rech haank.
Skotse of Amerikaanse tromme [bewark]
An n vörm is weainig verskil met de normale marsjeertromme. Mear duur t gebroek van metaalsnaarn en kevlarvelle op ekstra hoge spanning kleenkt n Skotsn ekstra skoarp. Dit wörd nog verstoarkt duur n ekstra snoarmatjen wat oonder t boawnste vel zit. Dee heuge spanning har in t begin n noadeel. t Kon gebuurn det n raand duur dee hoge spanning noar binn treuk en t hele instremeant an bölle lea. Um dit te vuurkomn hebt ze rechtevoort ekstra dikke reande an t instremeant emaakt. De skotse tromme wörd meesttieds bespöld met dikke, taps tooloopnde stökke, met nen dikn kop. Hierduur onsteet n kort droog geluud. Skots tromn is nen apartn stiel van spöln, wat vake vuur duurweenterde spöllers nog wal moeilik kan wean, umdet bie aandere stieln de tied tusken de nootn (intervaln) aait geliek munn wean, mear bie skots tromn um-en-umme laank en kort mut wean.
n Amerikaansn kleenkt iets meender skoarp as n Skotsn, duurdet dr earder vuur keunststof snoarn wörd ekeuzn, umdet de snoartromme in dit soort korpsn nit zo op de vuurgroond mut wean. Dr was töt an n poar joar geleedn wal ne gewoonte um ook de Amerikaanse tromme zo skoarp meugelik te loatn kleenkn, mear det begeent de leste joarn of te nemn, en de korpsn begeent öar tromngeluud op de bloazers of te stemn. Ook bie t spöln beent de Amerikaann onmeundig sekuur. Wo hoge at de spöllers de stökke optilt, wo hoge at ze ze vaste hooldt, wodöanig en woer at ze de stökke hooldt as ze neet spölt, ezw, wörd allemoal in t vuurtn oet edacht. Ook deankt de Amerikaann völle visuals oet. Det beent beweagings met de stökke dee at mooi beent um noar te kiekn, mear dee at feailik niks an t spöln too doot.
Velle [bewark]
n good vel is belangriek bie kleaine tromn. t Boawnste vel, ook wal t slagvel eneumd, wör vroger van blöaze of maagn van deers emaakt, mear doar houw iej makkelik duurhen. Rechtevoort (vanof 1956) gebroekt ze meesttieds keunststof, en mangs kevlar. Vuural bie Skotse en Amerikaanse tromn wörd völle kevlar gebroekt, umdet dit de hoge spanning better kan verdreagn.
Vroger wördn velle op espönn met töwwe, dee't an edreeid mosn wordn. At ze te hoge op edreeid wördn, skuurdn de velle in. Rechtevoort wordt velle in t fabriek al an nen metaaln reenk emaakt, woer at n spanraand van de tromme dan wier oawerhen vaalt. Met lange droadneageln wörd disn spanraand an spesjale spanbusn op de kettel vaste zat en an edreeid, woerduur t vel egaal verspreaidt oawer n kettelraand etrökn wörd.
Stokvoering [bewark]
Dr beent 2 meneern um de stökke vaste te hooldn:
- tradisjoneeln greep
- geliekn greep
n Tradisjoneeln greep is bedach vuur de tradisjonele marsjeertromme. In vrooger tiedn hung disse tromme skeef op t leenkerbeen,en biej wat korpsn vuur t plaatjen nog aaltied, woerduur n spöller n leekeroarm n heeln tied in nen roarn hook umhoge mos hooldn um nen goodn slag te maakn. Op n doer was dit slecht vuur de skoolders.
Duur n stok in n leenkerhaand met t achtereande tusken doem en wiesvinger, en met de vuurkaante tusken middelvinger en reenkvinger te legn (en n wiesvinger en middelvinger oawer n stok hen te legn) hoof n spöller n oarm mear heel weainig umhooge te buurn en kan'e vanoet n pools nen slag maakn.
n Rechterhaand heult n stok gewoon tusken doem en wiesvinger, woerbiej de aandere vingers wal um n stok hen lignt, mear allene zorgt det n spöller n stok nit verlös. n Stok heurt liek te wean met n oarm, en n haand mut met de rugge noar boawn stoan. Belangriek vuur de oetstraling is det n peenk nit estrekt is, mer um n stok hen ligt.
Biej n geliekn greep hoold n spöller beaide stökke op de manere van de rechterhaand vaste zoas det hierboawn beskreewn is. Dissen greep wördt duur völle drummers op n drumstel an eheuldn, umde'j zo de oarme ook noar boetn köant dreein en dus mear köant raakn.
Völle (meestieds Amerikaans erichtte) korpsen kiest, ondaanks det ze de snoartromme recht an n beugel hebt hangn, vuur n tradisjoneeln greep, umdet dit meuier lik. Dr beent ook korpsn dee't de snoartromme skuuns an de beugel hangt, umdet ze meant det ze aans geluudsverlees hebt met n tradisjoneeln greep, en det dit better vuur n leenkeroarm is.
Soortn stökke [bewark]
Stökke beent dr in alle soortn en moatn. Laank, kort, dik, dun, zwoar, lecht, met t gewich vuur of achterin n stok, met nen dikn of nen dunn, of nen hooltn of nylon kop. Ieder soort stok hef zin eegn geluud. n Korps wat völle boetn mut spöln gebrok dikkere stökke, umdet t geluud dan vearder dreg.
n Heel aander soort stökke beent de kwäste. Dit beent oetskoefboare weeiers met iezerne of nylon dröadkes, woermet oawer t vel wördt estrekn woerduur n zacht soeznd geluud ontsteet.
Bekeande moarkn [bewark]
Internasjonaal bekeande moarkn beent:
- Ludwig
- Premier
- Yamaha
- Pearl
- Dynasty
n Hollaands moark wat espesjaliseerd is in Amerikaanse tromn is Vancore.
 |
Disse pagina is eskreewn in t Riesns |
