Hiphop

Uut Wikipedia, de vrye encyklopedy
Eminem, ene van de bekeandste rappers van de wearld

Hiphop (mangs wal skrevn as hip hop of hip-hop) is ne kulturelle streuming, moar veural bekeand as muziekstiel. Hiphop is ontstoan in de zövntiger joarn van t twentigste joarhonderd in Niej Jork in de Verennigde Stoatn, in de arme wieke The Bronx, woar dootieds völ Afro-Amerikaanse en Latinoleu wondn.

Hiphopkultuur wörd kenmearkt deur vief ellemeantn: DJen, Rapn, Beatboksn, Graffiti en Breakdaans.

Anhangers van de hiphopkultuur zunt vaak te herkenn an de klear dee ze dreagt. Dat zunt meestal ne pette, wiede, te grote t-shirts van bekeande Amerikaanse voetbalklubs met grote siefers dr op en wiede, ofzaknde bokses. Doar heurt vaak ok nog t dreagn van opzichtige (leewst goaldne) opsmuk bie, zo as lange ketns, grote ringe en glemmige oorbeln.

Geskiedenisse[bewark | bronkode bewarken]

De meeste leu kent hiphop veural as muziekstreuming, moar veur de leedn van de subkultuur geet hiphop vaak wieder as allennig muziekmaakn. Wat hiphoppers probeert de saamnleaving ne spegel veur te hoaln. Vake zunt tekst van hiphoppers tegn de saamnleaving in t algemeen, of de (slechte) umstandigheedn van n rapper zölf. Op zo ne wieze kreg de Amerikaanse onnerklasse ne maneer um zik oet te drukn. Dit begun onner de zwarte inwonners, mer breidn zik vlot oet oaver heel Amerika, en later ook anner laandn. Hiphop wör zo deel van ne emansipasiebeweaging van de onnerloag van de saamnleaving, en hef zo t beeld wat oaver hiphop besteet teknd.

Hiphop begun in de Verennigde Stoatn, in de binnstad van Niej Jork City. hiphop is woarskienlik voortkömn oet dub, moar wör ne eegn streuming in de Bronx, op 'block parties' (wiekfeeste). Dit hef völ invlood kregn op de rapmuziek, zo as is te heurn bie artiestn as Cypress hill, Beasty Boys, Wu-Tang Clan, Ice T en Jay-Z. Op de wiekfeeste in de zövntiger joarn deudn de DJs zo as DJ Kool Herc met twee kopiejn van éénzölfde nummer de drumsolo's an mekaar mixen. Op dizze wieze kree'j n niej nummer met eankel drums. Doar deudn de Dj's dan wier oaverhen scratchen.

Ne MC, wat steet vuur Master of Ceremonies (Seremoniemeister) of rapper is n oetvoerenden artiest. Völ rappers hebt ne artiestnnaam dee begunt met MC (oetsprekn as Em-Sie). Rapn is ne wieder ontwikkelde versie van Toasten. Det is n soort half-zingend kuiern, of allennig kuiern in n soort ritmiese, riemelige maneer oaver t nummer hen.

Breakdaans en graffiti zunt twee onnerstönnende kunstvörm. n Eerstn is ne vorm van daans, n tweedn is t maakn van vearfkunstwearke, vaak op geböwwe en openboare bouwsels, met spuitbusse. Deurdat t meestal op geböwwe doan wörd dee't de kunstener nich tooheurt, wörd deur völ leu nich as kunst zeen, moar as vandalisme en versmearing van openboare ruumte.

Bie turntablisme (letterlik dreaitoafelisme) geet dr umme n dreaitoafel te broekn as n soort muziekinstrument. t Geet hierbie nit allene um de vlöainige oavergang tuschen nummers, mer t zo kreatief meugelik umgoan met geluud, deur te knipn in stukskes geluud, deur scratchen, spinn en jugglen. Eankele bekeande DJ's dee hiermet doot zunt Mix Master Mike, Jean, Erick-E, DCS, Marco V., Hyped hendriks en DJ Garry.

Völ ooldere hiphopleefhebbers zunt ofhaakt, umdat ze meant dat de hudige hiphop nich mear t zölfde geveul hef as vrogger.

Hiphop en annere stieln[bewark | bronkode bewarken]

Hiphop löt zik good mengn met annere stieln. Veural omdat t van zikzelf al ne mengvörm is. Veural in de Latiens-Amerikaanse weald wörd Spaanse rap mengd met merengue of reggaetón, woar zöls wat grote hits oet zunt kömn, zo as Lorna met Papi Chulo en Daddy Yankee met Gasolina. Doarnöast löt t zik good mengn met metal. Veurbeelde hiervan zunt Linkin' Park en Limp Bizkit oet de Verennigde Stoatn.

Nedderlaand[bewark | bronkode bewarken]

In Nedderlaand begun in de neggentiger joarn de groep Osdorp Posse oet Amsterdam met rapn in t Nederlaands. ze hadn ne rauwe stiel wat ze hadn oavernömn van Amerikaanse groepn oet de joarn tachtig. De vuurman van dee groep, Def P, was ooit begunn met t oaverzetn van Amerikaanse tekst in t Neerlaands vuur zin kameröa dee nich zo good Engels konn. t Letterlike oaverzetn van bepoalde Amerikaanse oetsproakn en begripn har veural n komies effekt. Dit was t begun van de Nederhop.

n Eersten Nedderlaandsen raphit was van Extince, den in 1995 op nummer 1 in de hitliest köm met zin nummer Spraakwater. De Nederhop bleef hiernoa gröain met nieje artiesten zo as Brainpower, Spookrijders en Opgezwolle. Annere grote nederhophits warn van Def Rhymez, de Partysquad, Ali B, Lange Frans en Baas B. De niejste gennerasie populeare rappers zint onner mear de Jeugd van Tegenwoordig.

Neersassies[bewark | bronkode bewarken]

In t Neersassies wörd nit völle met rap doan. De groep met t meest sukses zunt de Fofftig Penns oet Berlien. In Grunning zunt dr de Bond tegen Harries (hiphop/hardcore) en Wat Aans!. As dr in t Neddersassies rapt wörd, is dat ok vaak nich serieus bedoold, zo as bv. van Jelmer Gussinklo. Toch zunt dr lokaal wal völle rapartiesten, dee meestal in t Neerlaands rapn doot. Zo he'j bv. Siroc oet Riesn of Tomba Artz oet Eanske. De bekeandste rapgroep oet t Neersassiese gebeed, Opgezwolle, kump oet Zwolle.

Bekeande hiphopartieste[bewark | bronkode bewarken]

   

Bekeande hiphoppers wearldwied[bewark | bronkode bewarken]