Ska
Oet Wikipedie, de vraaie enzyklopedie
Ska is n meziekstiel den is ontstoan op Jamaika zo um en noabiej de joarn '50 van n twentigsten eeuw, duurdet Jamaikaanse Jazz-spöllers t kenmoarknde jazz-ritme oawer de moate hen skeuwn, en dus neet mear op n tel, mear noa de tel speuldn.
[bewark] Oontstoan
De jamaikaann lusterdn völle noar Amerikaansen rhythm & blues en jazz, wat toew oawer de heele wearld bekeand was. De jamaikaann woln dèt zelf ook spöln en prebeerdn op alle meugelike maneern um t good noa te doon. Jazz hef n slaggitaar met stakkato-akkoordn rech op n tel. De Jamaikaann verskeuwn dèt tusken de teln in, woerduur t geheel vlotter kleunk en n gitaar bètter te heurn was. Dat gaf ook t welbekeande ska-geluud.
[bewark] Karakteristiekn duur vergeliekn
Umdèt ska vaake in eenn oam wörd eneumd met reggae en völle leu t verskil tusken dee twee fealik nit weet, wördt hier met behulp van n vergeliekn de peuntn op de riege zat woeran of ze te herkennn en te oonderskeaidn beent.
- Umdet ska dichte biej jazz steet, wördt vuural de oole ska-nummers in swing-tempo espölt. Dit wör op n doer wal aans toew as n stiel zik vearder oontwikkeldn, mear reggae kan alleene op n veerkwartsmoate espölt wordn.
- Ska hef oawer t algemeen n heugerder tempo as reggae. Reggae steet r um bekeand dèt t troag en lui is.
- In ska zeent de bloazers nog onmöhnig belangriek. Ze hebt völle solo's, net as in jazz, en ze kommt vaake in plaatse van n zaank, terwiel as t biej reggae t juust um n boskop in n tèks geet en de bloazers n oonderstönnden taak hebt, of mangs heemoal vort eloatn wordt.
- Ska hef duurloopnde basgitaar-partiejn. Dèt heult in dèt-e lange nötn spölt, meestieds op n tel, net as in n jazz. Reggae hef korte nötn in de baspartiejn, dee-t fealik mear nen ritmiesen oard hebt, mear ook as belangriek heuwdinstremeant geeldt.
[bewark] Veardere oontwikkeling
Toew dr völle Jamaikaann noar Engelaand emigreerdn noa n Jamaikaansn onofhaankelikheaid, en Ska met zik metbrachn, wör dissn stiel ook in Engelaand machtig populair. t Sleug zo an dèt blaanke jongern zik, net as de Jamaikaanse immigraantn in dee tied, n kop kaal sköardn en ne nieje groepering vörmdn: skinheads (kaalköppe). Later wör dissn groep vaake met rechts-extremisme in verbaand ebrach, mear in t begin har t hier niks met te steln. In de joarn '80 har ska duur bands as Madness en The Specials n opleawing. Duur invlood van n aandern meziekstiel den populair was in dee tied, punk, kreeg ska oet Engelaand n aander geluud; t wör n luk schöarper. Dit heetn Two Tone Ska. Bekeande Two Tone Ska-nummers beent:
- Baggy Trousers en Nightboat To Cairo van Madness
- On My Radio van The Selecter
 |
