Drums
Oet Wikipedie, de vraaie enzyklopedie
n Drumstel (ook: drums) is n meziekinstrumeant of better ezeg n antal slagwoarkinstrumeantn dät duur 1 persoon, nen drummer, bespölt wördt. n Standaard drumstel besteet oet n poar trommels en een antal bekkns:
- bassdrum (1)
- snaredrum of snarentrom (3)
- high-tom mid-tom low-tom (4)
- floor-tom (2)
- hihat (5)
- bekns (6)
t Hatte van n drumstel besteet oet n bassdrum, de snaredrum en n hihat. n Bassdrum wördt met n vootpedaal bespölt en gef de leege klaankn. Oonder t euntervel van n snaredrum is n mätje met metaaln snoarn espann. Hierduur maakt n snaredrum (kortweg 'snare') n fel en schoarp geluud. n Hihat is n duur n voot beweagboarn bekkenset woer n drummer met zinne stökke n ritme op slöt. n Hihat kan met n voot lös en dichte wordn edoan (de bekkns kommt dan lös van mekoar). As dr op n hihat ehöwn wördt a-j ne lös doot, en ne doarnoa wier too doot, ontsteet het bekeande 'sis-geluud' van n Hihat.
De velle wordt van alle trommels zo espannn, dät t geluud van iedere tromme op mekoar is ofestemd. Dät kö-j gin 'toonheugte' neumn, want ze hebt gin regelmoatige geluudstrillingn. Ze maakt n 'ruusend' geluud en doarumme wordt r bie trommels oawer n 'klaank' esprökn.
n Drummer bespölt t drumstel met drumstökke of brushes/kwäste. De stökke geewt n hard geluud, de brushes geewt n zach en soezend geluud. Kenmoark van n drummer is dät-e zinne haande en veute onofhaankelik van mekoar kan beweagn in n bepoald ritme. Wat bekkns (Engels: Cymbals) angeet, is dr n verskil tusken ofslagbekkns (Engels: Crash cymbals) en ritmebekkns (Engels: Ride Cymbals). Doarnöast zeent r ook ampatte soortn bekkns zoas de 'splash' (klean ofslagbekkn met nen hoogn klaank) en n 'china' (n spesjaal evörmd ofslagbekkn met nen kotn en robuustn klaank).
Sommige drummers gebroekt 2 bassdrums; meestieds zeent disse nit geliek van deepte en umtrek. Mangs gebrok n drummer n dubbel-bassdrum pedaal. Hiermet krie-j t effect van n dubbeln bassdrum zoonder dät r twee bassdrums stoat op-esteeld. Wieter gebroekt sommige drummers meerdere hihats en/of snaredrums. t Geluud van n drumstel wördt vuural bepoald duur de bekkns, snaredrum en bassdrum.
 |
