Bassdrum
De grote tromme of bassdrum is ne tromme met nen leegn, zwoarn klaank. t Is nen roondn kettel met ne ofmetting tusken 70 en 100cm diameter, wat an beaide kaantn bespönn is met vel. Meesttieds wörd de grote tromme an ene kaante bespöld. Behalve in muziekkorpsen, woer't t deenk vuur n boek haank en van beaide kaantn bespöld wörd met twee stökke met zachte nylon of veltne köppe.
De bastromn zeent in dree kattegoriejn te verdeeln:
- Concertbastromme
- Drumstelbastromme
- Marsjeerbastromme
Kömp an bod |
Concertbastromme [bewark]
Wörd völle in zitnde orkestn gebroekt. t Is n groot apparaat, wat op n rek met raadkes is monteerd, zodat t verjag kan wordn. t Deenk wördt as oonderstönnige broekt, um bepoalde stukn kracht bie te zetn, of nen onmeundigen plear te geewn, en is dus ginne konstante in de muziek. Op disse wieze keump he ook vuur in t frontwoark van Drum & Bugle Corps.
Drumstelbastromme [bewark]
Steet in t midn van t drumstel, en de rest van de slagwoarkinstremeantn stoat dr umhen of zeent dr op vaste maakt. Iej bespölt t met n voot, woervuur n spesjaal pedaalken an de tromme vast zit. Duur op t pedaalken te trean slöt n klopper teegn t vel van de tromme.
In t seempelste drumritme keump n bastromslag op n eersn en n doardn tel van de moate. t Instrumeant is dus bedoold um de moate te hooldn.
Techniekn [bewark]
Dr zeent verskeaidene techniekn um dit soort bastromme te bespöln. As eerste he'j de manere duur met t been umhoge te spöln, woerbie dus t been nit op de groond steet en allene met de tene t pedaal in edrok wördt. Iej munn dan dus krach zetn met de basse van t been. Dit het met n Engels woord de Heel-up-techniek. Vanzelf is dr dan ook ne Heel-down-techniek, woerbie n voot plat op t pedaal steet. t Noadeel hiervan is det mangs n voot t pedaalken noa n slag inedrok heult, woerduur n klopper teegn t vel an blif stoan. Hierduur krie'j geluudsverlees.
Marsjeerbastromme [bewark]
De "basliene" is n ampat oonderdeel van n muziekkorps. Ne basliene kan bestoan oet één tot vief spöllers. In de wat tradisjonele muziekkorpsen is t dr vake mear ene. Disse tromme gef de moate an en dut meestieds niks aanders as op alle veer de teln van de moate houwn. In tradisjonele korpsen wörd disse tromme ook nog wal es n oawerslag eneumd, noar nen visuelen techniek woerbie met n rechteroarm op t leenkervel wörd ehouwn (en aandersumme), woerbie n knuppel oawer de tromme hen eslingerd mut worden.
In de Amerikaans-oriënteerde meziekkorpsen zeent t dr gemiddeld 4 of 5. Disse zeent op verskilnde toonheugtes op mekoar of estemd en spölt ingewikkelde ritmepatroonn. Hierduur munn de spöllers onmeundig op mekoar in espöld wean, want bie disse korpsen mut ne bastromme net zo ingewikkeld muziek maakn as de aandere instremeantn.
 |
Disse pagina is eskreewn in t Riesns |
