Bassdrum
Oet Wikipedie, de vraaie enzyklopedie
n Bassdrum of grote tromme is ne tromme met nen leegn klaank of geluud. De bastromn zeent in dree kattegeriejn te verdeeln:
- Concertbastromme
- Drumstelbastromme
- Marsjeerbastromme
Onderwarpen |
[bewark] Concertbastromme
Wördt völle in zitnde orkestn gebroekt. t Is n groot apparaat, wat op n rek met wieltjes is monteerd, zodat t verjag kan wordn. t Deenk wördt as oonderstönnege broekt, um bepoalde stukn krach bie te zetn, of nen onmeundigen plear te geewn, en is dus ginne konstante in de meziek. Op disse wieze keump'e ook vuur in t frontwoark van Drum & Bugle Corps.
[bewark] Drumstelbastromme
Steet in t midn van t drumstel, woer de rest van de slagwoarkinstremeantn umhen stoat. Iej bespölt t met n voot, woervuur n spesjaal pedaalken an de tromme vast zit. Duur op t pedaalken te trean slöt n klopper teegn t vel van de tromme. In t seempelste drumritme keump n bastromslag op n eersn en n doardn tel van de moate. t Instremeant is dus bedoold um de moate te hooldn.
[bewark] Techniekn
Dr zeent verskeaidene techniekn um dit soort bastromme te bespöln. As eerste he-j de meneere duur met t been umhooge te spöln, woerbiej dus t been nit op de groond steet en alleene met de teene t pedaal in edrok wördt. Iej munn dan dus krach zetn met de basse van t been. Dit het met n Engels woord de Heel-up-techniek. Vanzelf is dr dan ook ne Heel-down-techniek, woerbiej n voot plat op t pedaal steet. t Noadeel hiervan is dèt mangs n voot t pedaalken noa n slag inedrok heult, woerduur n klopper teegn t vel an blif stoan. Hierduur krie-j geluudsverlees.
[bewark] Marsjeerbastromme
De "basliene" is n ampat oonderdeel van n muziekkorps. ne Basliene kan bestoan oet één tot vief spöllers. In de wat tradisjonele meziekkorpsen is t r vaake mear eene. Disse tromme gef de moate an en dut meestieds niks aanders as op alle veer de teln van de moate houwn.
In de Amerikaans-oriënteerde meziekkorpsen zeent t r gemiddeld 4 of 5. Disse zeent op verskilnde toonheugtes op mekoar of estemd en spölt ingewikkelde ritmepetroonn. Hierduur munn de spöllers onmeundig op mekoar in espöld wean, want biej disse korpsen mut ne bastromme net zo ingewikkeld meziek maakn as de aandere instremeantn.
 |
