Washington (stoat)

Oet Wikipedie, de vraaie enzyklopedie
Gao naor: navigasie, zeuk
Disambig-dark.svg Zeet de duurwiesziede Washington vuur aandere betekenissen van Washington.
Washington
Vlagge van Washington Woapen van Washington
Vlagge van Washington Woapen van Washington
Kaarte van Washington
Kaarte van Washington
Evergreen State
(Aait greun stoat)
Ofkorting WA
Tiedzone -8/-7
Informasie
Oppervlak laand 184.827 km² (6,6%)
Inwonners
- Dichtheid
7.061.530 (2014)
39,6 inw./km²
Geografie en bevolking
Too-etreaden 11 november 1889

Washington (oetsprekken as WAH-sjin(g)-tən) is nen stoat in et noordwesten van de Verenigde Stoaten van Amerika. Et ligt noordelik van Oregon, op et westen van Idaho, zudelik van de Kanadese proveensie Brits Columbië, an de kuste van den Pasifiesen Oseaan. Den stoat is neumd noar George Washington, den eersten presideant van de Verenigde Stoaten. Et hudige Washington is et westelike deel van et Washingtonterritorium, wat in et Verdrag van Oregon in 1846 wör of esplitst noa et Greansverskel van Oregon. Et köm in 1889 as 42sten stoat bie de VS.

De heuwdstad is Olympia, mer 60% van de inwonners wont in (vuursteaden van) Seattle. Et is et middelpeunt vuur vervoor, haandel en industrie en ligt an et Pugetsond, nen groten baai van de Salish-zee. Det is wier nen ingaank van den Pasifiesen Oseaan, met verskeadene eilaanden, depe fjorden en baaien, dee duur gletsjers oet esletten zeent. De rest van den stoat is in et westen bedekt oonder meeld reagenwoold, boargkettens in et westen, midden, noordoosten en zuudoosten en nen halfdreug bekken in et oosten, midden en zuden. Doar wörd fleenk eboerd. Noa Kalifornië is Washington den droksten stoat an de westkuste van de VS.

Washington leawert et meeste hoolt van alle Amerikaanse stoaten. Douglas- en hemlocksparre, gelle en witte danne, gewone sparre, larix en ceder weelt der mirakels best gröaien. Doarnöast leawert den stoat de meeste appelen, hop, pearen, hennebeazen, greune meunt en beazen. Doarnöast weelt der abrikozen, asperges, oarften, droewen, leenzen, peppermeunt en earpel best gröaien. Vee en bieheurende produkte dreagt ook fleenk bie an de opbrengst van et boeren. Doarnöast wör der völle visket op zalm, helbot en mearvallen.

Fabrieken in Washington bouwt vleegtuge en raketten, skepe en vervoorsmiddelen. Doarnöast verwoarket ze hoolt, etten, metalen en metaalprodukte, chemikaliën en machines. Washington hef mear as 1000 dammen, zo as de Grand Couleedam. Den is der vuur bevlöaiing, stroomopwekking, oawerstreumingsbehear en wateropslag.

Den offisjelen naam is wal "Den stoat Washington", mer et wörd vake "Washingtonstoat" eneumd um et te oonderskeaiden van den stad Washington D.C.. Den bienaam van den stoat is "the Evergreen State", umdet et der aait greun is.