Nebraska

Uut Wikipedia, de vrye encyklopedy
Wöär at Nebraska ligt

Nebraska (engelske uutspråke: /nəˈbræskə/, ne-BRAS-ka) is nen ståt in de Groute Vlaktenstreake in et Midwesten van de Vereynigde Ståten. Et grenset an Süüddakota in et noorden, Iowa en Missouri up et ousten en süüdousten, beide an de oaverkante van de rivyr de Missouri. Kansas up et süden, Kolorado up et süüdwesten en Wyoming up et westen. Nebraska hevt ne uppervlakte van yts meyr as 200.000 km² med ne bevolking van souwat 1,9 miljoon. De höyvdstad is Lincoln en de grötste stad is Omaha.

Dusenden jåren vöärdat de europeanen kömmen, wör et gebeed van Nebraska bewoand döär verskillende inheymske volker, sou as de Omaha, Missouria, Ponca, Pawnee, Otoe, en verskillende Lakotavolker.

Wat landskap angeyt is Nebraska updeyld in twey groute deylen: de Dissected Till Plains en de Great Plains. Dee eyrste besteyt uut sachte höävels. Hyr ligget de grötste städen van den ståt: Omaha en Lincoln. Et grötste deyl van et westen van Nebraska höyrt by de Great Plains: boumlouse prairie.

Nebraska valt under twey klimaten. Et ousten is vuchtig landklimaat. Up de südelike vlaktes besteyt een unik subklimaat wat te book steyt as "måtig-warm". Dat slüt an up et vuchtige subtropiske klimaat in Kansas en Oklahoma. Et westen van Nebraska valt under halv-dröyg klimaat. Sommer- en wintertemperaturen verskilt flink, al wördt et minder stark richting et süden. In de lente en sommer (mangs ouk in den harvst) kommet der heavige dunderskuwers en warvelwinden vöär. In et winter en vrog in et vöärjår blivt den ståt når verholding warm med ne Chinookwind.