Minnesota

Uut Wikipedia, de vrye encyklopedy
Minnesota
Vlagge van Minnesota Woapen van Minnesota
Kaarte van Minnesota
Kaarte van Minnesota
Land van 10.000 mearen
Gofferståt, Agaatståt, Et Echte Noorden
Ofkorting MN
Heufdstad Minneapolis
Tiedzone UTC −6/−5
Informasie
Oppervlak laand 225.163 km² (8,4)
Inwonners
- Dichtheid
5.639.632
26,6 inw./km²
Geografie en bevolking
Too-etreaden 11. mei 1858
Antal groafskoppen 23

Minnesota (uutspreaken as minne-SOU-ta) is eyne van de 50 ståten van Amerika. Et höyrt by et Midwesten, ne kulturele streake en de Groute Mearen, ne geografiske andüding. Up den 11. mei van 1858 tröäd et as 32. ståt to töt et Amerikaanske Verbund. Den ståt hevt heyl wat mearen, wårdöär et de byname drägt van "Land van de 10.000 mearen". Et officiele ståtsmotto is L'Étoile du Nord (fransk vöär Steare van et Noorden).

In et noorden grenset den ståt an de kanadeeske provincys Ontario en Manitoba, in et noordousten an Michigan en Wisconsin, up et süden an Iowa en up et westen an Noord- en Süüddakota.

Wat uppervlak angeyt is Minnesota den up 11 nå grötste en up inwoanertal den up 21 nå ümvangryksten ståt van Amerika. Souwat 55% van de inwoaners woanet in et verstädelikte gebeed wat Minneapolis en Saint Paul verbindet. Dee ståt dårümme bekend as de Tweylingstäden. Dit gebeed is et middenpunt vöär vervoor, handel, industry, underwys en ståtsregeyring. Andere belangryke verstädelikte gebeden in Minnesota sint Duluth, Mankato, Moorhead, Rochester en St. Cloud.

Wat landskap angeyt besteyt den ståt uut westelike prairies dee nu stark bebuurd wordet. In et süüdousten stünd dicht louvbusk, wat rechtevoord erodet is en nu bebuurd of bewoand wördt. Et dünbevolktere noorden wörd gebruked vöär mynbouw, holtbouw en vermaak.

Dusenden jåren vöärdat de europeanen der kömmen, wör Minnesota al bewoand döär verskillende Inheymske Amerikanenvolker. Franske verkenners, kristelike sendelingen en vellenhandelslüde tröäken et gebeed in rund et 17. jårhunderd. See löypen dår de Dakota-, Ojibwe- en Anishinaabe-volker teagen et lyf. Vöäle van wat nu Minnesota is, höyrden oorsprunglik by Fransk Louisiana. De Vereynigde Ståten kochten et oaver in 1803. Meyrdere herindeylingen volgden. Minnesota in hüdigen form wör inskreaven as den 32. ståt van Amerika up den 11. mei van 1858. Lyk as vöäle andere ståten in de Midwestenstreake bleav Minnesota altyd dünbevolked en must vöäral leaven van buren en holtkap.

Tüsken halv 19. en begin 20. eywe tröäken der vöäle europeeske immigranten hen. Vöäle van dee kömmen uut Skandinavie, Düütskland en Middeneuropa (med name de Tsjechen en Slovaken). Dårümme is Minnesota noch altyd een middenpunt vöär skandinavisk-, düütsk- en tsjechisk-amerikaanske kultuur. Uut undersöök blikt at vöäle lüde når Minnesota kömmen weagens mislükkede revolutys in Europa in 1848.

De minnesotaanske döärsneyde leavensstandaard is eyne van de höygsten van de Vereynigde Ståten. enkel Massachusetts en Connecticut hebbet ne höygere index. Wyders is den ståt eyne med de höygste gråden van underwys en rykdom. De ekonomy is de lätste jåren verskeidener wörden, med ne verskuving van enkel burenbedryve en grundstofwinninge når (financiele) deenstverleyning. De bevolking van Minnesota besteyt noch altyd vöär et gröätste deyl uut nåwas van skandinaviers en düütskers, mär de lätste jåren kommet der ouk vöäle lüde uut Asie, de Hoorn van Afrika, et Middenousten en Latynsk Amerika by.