Washington, D.C.

Uut Wikipedia, de vrye encyklopedy
(döärstüürd vanaf "Washington D.C.")

Washington, D.C., officieel et Distrikt Columbia en ouk bekend as gewoan D.C. of Washington is de höyvdstad van de Vereynigde Ståten van Amerika.[1] Et ligt an de rivyr Potomac en grenset an de ståten Maryland en Virginia. Et Kungres van de Vereynigde Ståten hölde hyr de eyrste sitting in 1800. De stad is nöömd når George Washington, den eyrsten president en eyne van de grundleggers van Amerika.[2] en et federale distrikt is vernöömd når Columbia, ne vrouwelike verbealding van et land. As den seatel van de federale regeyring van de VS en verskillende internationale organisatys is de stad ne vöärname wearldstad. Med meyr as 20 miljoon besökers in 2016 is et eyne van de meystbesöchte städen van de VS.

In de amerikaanske grundwet is vastelegd dat en federaal distrikt under et uutslutende seggenskap van et kungres van de VS valt. Dårümme höyrt Washington D.C. by gin enkelen ståt. Med et underteakenen van de Bewoaningsklausule up den 16. juli van 1790 wör et höyvdstädelike distrikt langs de Potomac goodeköärd. In 1791 Wör de Stad Washington officieel sticht as höyvdstad van et land. In 1801 wör et ümliggende land, wat dårvöär by Maryland en Virginia by an höyrden, deyl van et federale distrikt, med de dörpe Georgetown en Alexandria der by. In 1846 wör et Virginia-deyl weader oaverdrägen an Virginia en in 1871 wör et oaverblyvende distrikt in eyne gemeynde underbracht.

In 2019 wör et inwoanertal van Washington D.C. skatted up 705.749, wårmed et up nummer 20 steyt in de lyste van de drukstbevolkede städen van de VS. Dårmed hevt et ouk meyr inwoaners as de ståten Wyoming en Vermont. Warkvolk vanuut Maryland en Virginia sorget dat der oaverdag meyrr as nen miljoon lüde in de stad sint, lös van de turisten. Et verstädelikte gebeed rundum Washington D.C. strekket sik uut töt in deylen van Maryland, Virginia en West-Virginia. Al med al woanet dår sou'n 6,2 miljoon lüde.

Alledree de takken van de amerikaanske federale regeyring sittet in et distrikt: et kungres (den wetgeavenden tak), den president (uutvorenden tak) en et Amerikaanske Hougerechthov (rechterliken tak).

In Washington bevindet sik vöäle nationale monumenten en museums. Der sint 177 butenlandske ambassades en de höyvdkantoren van vöäle internationale organisatys, handelsverbunden, non-profits, lobbygrupen en professionele gemeynskappen, sou as de Wearldbankgrup, et Internationaal Monetäär Funds, de Organisaty van Amerikaanske Ståten, de AARP, de Nationale Geografiske Societeit, de Kampagne vöär Menskenrechten, de Internationale Corporary vöär Financien en et Amerikaanske Roude Krüüs.

En lokaal köäsen börgemeister en nen råd van 13 leaden bestüúrt et distrikt seyd 1973. Toch hevt et Kungres noch altyd den eandseg en mag lokale verordeningen an de kante skuven. Inwoaners van D.C. keset ne neet-stemmende kongressionele afvaerdiging vöär et Amerikaanske Huus van Afvaerdigden, mär et distrikt hevt gin verteagenwoordigers in den Senåt.

Verwyzings[bewark | bronkode bewarken]

  1. Whitehousehistory.org. 'Introduction: Where Oh Where Should the Capital Be?'.
  2. Dchistory.org. 'Washington, D.C. History F.A.Q.' The Historical Society of Washington, D.C. Skreaven up 27 mei 2014, bekeaken up 7 määrt 2018.