Roet (tiedschrift)

Uut Wikipedie, de vrye encyklopedy
Naar navigatie springen Naar zoeken springen
Roet, harfst 2008, 30e jaorgang

Roet (ondertitel: Drents Letterkundig Tiedschrift) is een Drèents- en aanderstalig kwartaolblad veur literetuur, daoras 't eerste nommer van uutkwaamp op 1 april 1979. 't Blad wördden oorspronkelijk uutegèven deur Martin Koster; vandage döt det Het Drentse Boek, onderdiel van 't Huus van de Taol in Beilen. Een zölfstaandige redactie, die op 't mement bestiet uut Lukas Koops, Ton Peters en Jan Harbers, bepaolt wat of d'r in 't blad kump.

In Roet stiet veural Drèents- en Nederlaandstalig wark. Vake viej d'r ok bi'jdragen in 't Grunnings in. Riegelmaotig is d'r een themanummer. De mieste bi'jdragen bestaot uut gedichten en körte verhalen; daornaost hej ok beschouwings en boekbesprèkings. Schrievers die tègenwoordig riegelmaotig an Roet bi'jdraagt, bint onder aandern Rouke Broersma, Anne Doornbos, Jan Germs, Lukas Koops, Gerard Stout, Gerrit Wassing, Ria Westerhuis, Atze van der Wijk en Tonko Ufkes.

Roet wördden in Grunning nao-evolgd deur Krödde en in Oost-Frieslaand deur Diesel.

Geschiedenis[bewark | bronkode bewarken]

De studenten Nederlaands Martin Koster en Ton Kolkman, die al ervaring hadden as redacteurs van 't Nedersaksische tiedschrift De Pennevogel, hebt Roet op-ezet um een stee te bieden veur Drèentstalige literetuur die naor heur mening niet goed terechte kun in 't treditionelere blad Oeze Volk. Koster schreef oaver 't opzetten van Roet:

De anleidende woorden bint espreuken in café De Slingerij an de Aweg. [...] Wij (een man of zeuven, achte) die oenze moederspraok niet vergeten wolden [...]
'Der zul een literair tiedschrift in 't Drèents komen mutten', zee ik tegen Anton, 'Oeze Volk, dat ken ik nou wel.'
'Dan muw op stee an de slag', zee Anton mit een voortvarendheid die mij van hum hogelijk verbaosde. En hij gung verdan: 'kom mit naor mien huus, dan begunne wij votdalijk.'
Die naomiddag, aovend en nacht weur de eerste Roet, 't tiedschrift daor Drenthe nooit op ewacht hef, bij menare bedacht. Inclusief de name (ik bin gek op 't bedèenken van namen) en de VVV (de geachte redactieleden Vosbargen, Vlintenhouwer, Voestbiel).[1]

In 1984 verscheen de bloemlèzing Old zeer: vief jaor Roet (Het Drentse Boek, Zuudwolde), mit een aordig edetailleerd veurwoord van de oprichters Koster en Kolkman oaver de beguntied van 't tiedschrift. In 2004 verscheen (as jaorgaank 26, nommer 3 van Roet) de bloemlezing Strèupers van de taol: 25 jaor Roet, bij 'nkander gaard deur Martin Koster. De titel hiervan is een knipoog naor de bloemlèzing uut de Drèentse schrieveri'je Scheupers van de taol, det 't jaor daorveur verschenen was.

Roet was in 't begun hielemaol in 't Drèents, mar na tien jaor wördden 't beleid veraanderd en wördden d'r ok wark in 't Nederlaands en of en toe een aandere taal op-eneumen. De schriever Jan Veenstra, redactielid van 1984 töt en mit 1998, hef dit as volgt verantwoord:

Op mijn initiatief is het blad, dat eerst alleen Drentse teksten publiceerde, tweetalig geworden. Het samen optrekken van Drentse en Nederlandstalige schrijvers leek mij een goede en voortdurende impuls voor kwaliteitsverbetering van de Drentse literatuur.[2]

Reyer Onno van Ettingen-pries[bewark | bronkode bewarken]

In 1984 zette Roet een tweijaorlijkse literaire anfieterpries op, de Reyer Onno van Ettingen-pries. De pries mus jonge schrievers anfietern die mit ni'jmoods Drèentstalig proza, dichtwark, teniel of essayistiek kwamen det uutsteeg boaven 't traditionele. Mit ingaank van 1994 vund de pries een voortzetting in de SNS-Bank Drenthe Cultuurpries, ofdieling literetuur.

Winnaars van de Reyer Onno van Ettingen-pries hebt ewest:

  • 1985: de Nörger schriefster Jannie Boerema veur heur hiele oeuvre
  • 1987: de Exlooër schriefster Miny Hofsteenge wègens heur verdiensten veur 't eschreven Drèents
  • 1989: de Ni'j-Balinger schriever Rieks Siebering veur In de varte giet de harmonie veurbij
  • 1991: de schriefster Suze Sanders veur heur Drèentstalige gedichten en heur oaverzettings uut 't Noors
  • 1995: SNS-Bank Drenthe Cultuurpries veur de redactie van Roet veur heur hiele wark

Rifferenties[bewark | bronkode bewarken]

  1. Martin Koster oaver zien tied as student an 't Nedersaksisch Instituut in Grunning, en 't opzetten van Roet mit Anton Klokmann (Ton Kolkman). Uut Rouke Broersma (samenstelling en inleiding) (2003), Scheupers van de taol: Bloemlezing van de Drèentse Schrieverij 1837-2003, Zuudwolde: Stichting Het Drentse Boek
  2. Jan Veenstra op zien webstee

Uutgaonde verwiezing[bewark | bronkode bewarken]

Nuvola apps ksig.png Dit stok is eskreven in 't Zuudwest-Zuud-Drèents van de Drèents-Oaveriesselse grèensstreek.