Anne Doornbos

Uut Wikipedia, de vrye encyklopedy
Nå navigaty springen Nå söken springen

Anne Doornbos (Erica, 28 juli 1948) is een Drèents schriever en bestuurder.

Opgruien en wark[bewark | bronkode bewarken]

Doornbos is opgruid op de boerderij van zien olders op Erica. Nao de HBS hef e studeerd an de sociaole academie in Grunning en Nijmegen. In Emmercompas en Emmen hef e in 't jongerenwark zeten. Op Et Vene was e directeur van een welzijnsinstelling. Tegenswoordig is e gemientesikketaoris van de Noord-Drèentse gemiente Noordenveld. Hi'j woont in Eein.

Doornbos is wieder ok veurzitter - vanof 2006 - van uutgeverij Het Drentse Boek. In dizze hoedaonigheid hef hi'j metwarkt an de totstandkoming van 't Huus van de Taol. Hi'j is volmacht van 't schrieverscontractpunt 't Nei Drèents Geneutschap (deur hum opricht met Martin Koster) en sikketaoris van de stichting Drentse Muziek Maatschappij.

Schrieveri'j en wieder[bewark | bronkode bewarken]

Zien eerste schrieveri'j bestund uut Nederlaanse gedichten en teksten veur schoel- en jeugdverienigingscabaret. Hi'j was oprichter en tien jaor lang tekstschriever en speuler van 't Heerenveens Ambtenaoren Cabaret.

Kört veur de ieuwwisseling is Doornbos Drèents gaon schrieven. Zien vertellegies, gedichten en columns hebt onder aandere in 't letterkundig tiedschrift Roet staon; een antal gedichten bent opneumen in Scheupers van de taol: Bloemlezing van de Drèentse Schrieverij 1837-2003 (Het Drentse Boek, 2003).

Zien dichterlijke begunbundel is Een eerder laand (Het Drentse Boek, 2007), daorin vernaomelijk sonnetten staot. Belangrieke thema's bent de verbundenheid van mèensen met 't laandschop en 't verglieden van de tied. De twei besprekers in Roet waren iensludend verdield: ze vunden 't 't wark van een 'nuvere dichter' , die nog een toertien had mutten riepen: 'Gedichten van wisselnd niveau en liedteksten die veul weg hebt van traditionele volksballades.' Ze vunden hum schier um zien ienvold, met 'zinnen die argens blieft hangen en die as ie soms later nog ies kunt anhalen.' Veur later wark kiekt ze uut naor 'wat meer spanning en variatie in vorm en underwarpen'.

In 2011 verscheen Doornbos zien eerste vertellegiesbundel, Dèenken an een zebra (Het Drentse Boek). De verhalen bint vaok situeerd in de mederne Drèentse dörpsgemienschop.

Citaot[bewark | bronkode bewarken]

Twei staolen balken spliet de tied,
links en rechts tot blokkies sneden.
Een mèensenleven perst in 'n turf,
in bulten stoekt verleden.
Spoorbielsen slaot een brug naor 't heden
en woord nao woord kom ie weer in mien riek.
Tot in het lest de grèenze overschreden
en ie in elke vezel op mij liekt.

Uut Speurtocht (Een eerder laand, p.37)

Bronnen[bewark | bronkode bewarken]

Uutgaonde verwiezings[bewark | bronkode bewarken]

Nuvola apps ksig.png Dit artikel is schreven in 't Zuudoost-Veen-Drèents.