Miny Hofsteenge

Lammina Harmina (Miny) Hofsteenge (Eksel, 11 september 1946 - Emmen, 2 juni 2018) was een Drèentstalige schriefster uut Drenthe, Nederlaand.

Hofsteenge gruide as boerendochter op Eksel op. Nao de huusholdschoele warkte ze töt heur trouwen in 1971 as verkoopster. Ze verhuusde hen Emmen en deu mavo-cursussen en cursussen creatief schrieven en tenielschrieven. Ze was bestuurslid van de Emmer bieb, de Waddenkunstkring en Stichting Drentse Taol. Een poze was ze administratief en artistiek betrökken bij volksdaansgroep 't Aol Volk.

Schrieverije

Hofsteenge schreef veur groten en veur prugels. Vanof 1984 had ze verhalen en gedichten in Drèents letterkundig tiedschrift Roet staon. In 1987 kreeg ze van Roet de Reyer Onno van Ettingenpries anelangd, de tweejaorlijkse literaire anfieterpries van 't tiedschrift. Ze dreug ok bij an de bladen Oeze Volk, Maandblad Drenthe, Pennestreken en Surplus, en schreef een köppeltien tenielstokken. Aover heur Drèentstalige schrieverije zee ze: "As ik Nederlands schrief, stiet der nooit wat der stiet. In het Drèents zeg ik wat ik zeggen wil."

Tussen 1987 en begun 2003 had ze, mit een onderbreking van drei jaor, alle maonden de Drèentstalige column 'Miny's Hof' in de Drentse Courant en anslutend in 't Dagblad van het Noorden. Heur wark kreeg een stee in verscheiden bloemlezings.

Uutgaves

• Dwelen deur dook (verhalen, Het Drentse Boek, Zuudwolde, 1993)
• Veenarbeiders in Emmer-Erfscheidenveen 1948-1954 (1994, mit Meent van der Sluis; gedichten van Hofsteenge)
• Marinus Moesie en aandere vertellegies (Servo, Raol, 2000, mit Beate Plenter)
• Strapatsen (verhalen, Stad, 2000)

Bronnen

• Rouke Broersma (red.) (2003), Scheupers van de taol: Bloemlezing van de Drèentse Schrieverij 1837-2003, Zuudwolde: Stichting Het Drentse Boek (blz. 154-8)
• Huus van de Taol aover Miny Hofsteenge
• RTV Drenthe: 'Schrijfster Miny Hofsteenge overleden', 4 juni 2018

Dit artikel is eschreven in 't Zuudwest-Drèents.