Rieks Siebering
Rieks Siebering (Nei-Baolinge, 1941) is een onderwiezer en Drèentstalige schriever uut Drenthe.
Leven
[bewark | bronkode bewarken]Siebering gruide op Nei-Baolinge op, daor as zien va schoelheufd was. Nao de middelbare schoele deu e de kweekschoele in Coevern, daor as e via zien leraar Nederlaands in de kunde kwaamp mit mederne Nederlaandse poëzie. In 1964 wördden e onderwiezer op een schoele veur speciaal onderwies op 't Ogeveine. Ok daor was e vanof 1975 directeur van de School voor Praktische Vorming (voortezet speciaol onderwies). Sinds een hartanval in 1987 warkte e dieltieds. Vanof 1998 was e baoverschoels directeur bestuurszaken.
Literair wark
[bewark | bronkode bewarken]Tiedens een psychiatrische behaandeling in 't Ogeveinse ziekenhuus in 1983 zette de therapeut van Siebering hum an töt schrieven in de taal daor as e in dreumde, 't Drèents. In 1987 stund e veur 't eerst in Drèents letterkundig tiedschrift Roet. 't Aandere jaor verscheen zien eerste dichtbundel, In de varte giet de harmonie veurbij, daor as e in 1989 de Reyer Onno van Ettingen-pries, een literaire anfieterpries van Roet, mit wun.
Siebering orgeniseerde optredens van Drèentse schrievers en prissenteerde veertien jaor laank 't Vara-café, een politiek-culturele talkshow. Vanof 1993 gunk 't Vara-café wieder as Taal an taofel, een pergramma mit Drèentstalige veurdrachten, Drèentstalige meziek en streekkost. Wieder was e bestuurslid van Stichting Het Drentse Boek en veurzitter van de pregrammaraod van RTV Drenthe. In 2001 richtte hij Multi Culturele Rijkdom op, een orgenisatie die optredens van allochtone en autochtone schrievers verzörgde. Ok zette hij de warkgroep Publicatie Allochtone Landgenoten op, waorvan in 2002 een eerste bundel uutkwaamp.
In opdracht van Stichting Drentse Taol wördden der een schrieverspetret van Siebering op dvd emeuken. Veur zien in de weer wezen veur de Drèentse taal kreeg e in 2008 't eretieken van 't Huus van de Taol, de orgenisatie waorin Stichting Drentse Taol in 2007 is opegaone. 't Veurjaorsnummer 2013 van Roet was een an hum ewijd themanummer.
Boekpublicaties
[bewark | bronkode bewarken]- In de varte giet de harmonie veurbij (gedichten, Het Drentse Boek, 1988)
- An een bevreuren riviere (gedichten, Het Drentse Boek, 1992)
- Asof het zummer is (novelle, Het Drentse Boek, 1996)
- Stromen deur leeg laand (verhalen, Het Drentse Boek, 2001)
Bronnen
[bewark | bronkode bewarken]- Rouke Broersma (red.) (2003), Scheupers van de taol: Bloemlezing van de Drèentse Schrieverij 1837-2003, Zuudwolde: Stichting Het Drentse Boek (blz. 141-6)
- Huus van de Taol aover Rieks Siebering
|
Dit artikel is eschreven in 't Zuudwest-Drèents. |