Ragnarök

Uut Wikipedia, de vrye encyklopedy
Nå navigaty springen Nå söken springen

Ragnarök is in de germaanske mytology et verhaal van de eandtyd van de wearld. Dårin untsteyt nen grouten oorlog, wårby de guden Woden, Donar, Dinksel, Frey, Heimdall en Loki uut de tyd kummet, en rygel natuurrampen untståt en de aerde under water sakket. Dårnå kümt de aerde weader vannys boaven as vrüchtbår land, kummet de oaverblyvende guden by mekander en sal de wearld weader bevolked worden döär twey mensken. Ragnarök is en vöärnaam verhaal in de germaanske mytology en geleyrden maket der al lange study van.

De geböärdenis steyt vöärnamelik in de dichtedda, upsteld in den 13. eywe uut eyrdere traditionele brunnen, en in de verhaaledda, ouk skreaven in den 13. eywe döär Snorri Sturluson. Et wördt beide ragnarök en ragnarøkkr nöömd (oldnoorsk vöär "lot van de guden" of "gudsverdüüstering"). As dat lätste presenteerden et den musikskryver Richard Wagner in 1876 as opera, under den düütsken name Götterdämmerung.

Naamherkumst[bewark | bronkode bewarken]

Den oldnoorsken samenstelling ragnarok wördt al lange bedisterd. Et eyrste deyl, ragna, is noch neet sou lastig. Et is den tweyden naamvan van regin, wat "de regeyrende machten, guden" bedüdet. By et tweyde deyl wördt et lastiger, ümdat der twey varianten van bekend sint: -rök en -røkkr. Den vroo-twentigsteneysken filoloog Geir Zoëga saggen de beide förme as verskillend en meynden at ragnarök was "den doom of vernetiging van de guden" en ragnarøkkr de "verdüüstering van de guden."

Et meyrvold van et selfstandige naamwoord røk hevt verskillende bedüdingen, sou as "untwikkeling, oorsprung, oorsake, verband, lot." Et woord ragnarök in syn geheyl bedüdet dan sou wat as "lätste gudsbestemming."

Verloup[bewark | bronkode bewarken]

Voluspá[bewark | bronkode bewarken]

Volgens et dichtsel Voluspá in de dichtedda verlöpt et as volgt:

Ragnarök vangt an med ne vöärspelling döär ne völva, ne wårsegster, an Woden. De sünne sal in de summers swart strålen, et weader unstümig weasen. Drey hanen sölt kraien, nen rouden in et wold, eyne med ne guldene kamme in Valhalla en nen sotterouden in de underwearld by Hel. De Jötunn-herder Eggthér sal sitten up nen höävel en up synen harp spöälen. Den waakhund Garmr, den as vöär de grotte Gnipahellir an de keaten ligt, sal beginnen te julen en lösbreaken. De mensken sint verdeyld: bröders ståt mekander når et leaven, süsterskinder verbreaket öär verwantskap, et is hard up de wearld en der is horery. Lüde hebbet gin genade meyr vöär mekander.

De söäns van Mím sölt spöälen, terwyl as Woden med Mím syn höyvd spreakt. Heimdall steakt synen Gjallarhoorn de lucht in en puustet. De wearldboum Yggdrasil beavt en kröänt. Den Jötunn Hrym kümt vanuut et ousten, syn skild vöär sik. In Middelgård wringt sik de slange Jörmungandr döär de sey en warpet dårmed groute gulven up. Den Jötunn-adelaar Hræsfeldr kryst, en med synen skarpen nebben pikket hee an et lyk. Et skip naglfar slöt lös döär de gulven van Jörmungandr en drivt vord. De vüürjötnars kummet up vanuut Muspelheym.

De wårsegster düt wyder dat Jötunheym, et land van de Jötnar, in upstand is en de Æsir sik berådet. De dwargen kröänet by öäre steynen döären. Den jötun Surtr kümt vanuut et süden med syn swaerd feller as de sünne. De rotsen klippen splytet en de jötnarvrouwlüde valt der in.

De guden bevechtet de indringers: Wodan wördt leavend upesluket in syn gevecht med den wulv Fenrir, wårmed syne vrouwe Frigg öäre tweyde groute verdreet te verwarken krigt (den eyrsten was den doud van öären söäne Balder). Wodan syn söäne Viðarr wreaket syn vader döär de kiwwe van Fenrir uut mekander te trekken en em recht in et härte doud te steaken med syne speare. De slange Jörmungandr düt den bek wyd lös en krigt med Donar te maken. Donar, ouk nen söäne van Woden en beskarmheyr van de wearld leyvert nen swåren stryd. Hee krigt de slange doud, mär kan dårnå noch neagen trad setten vöärdat hee selv doud dale valt. Den gud Freyr bevechtet Surtr, mär verleest. Dårnå vlüchtet mensken öäre hüse uut. De sünne wördt swart en de aerde sinket de sey in. De stearns verdwynt, stoum stigt up en vlammen likket an de heamel.

De wårsegster süt de aerde weader boaven water kummen. Nen adeler vlögt oaver nen waterval en jagt up viske by en barg. De oaverblyvende Æsir kummet by mekander up et veld Iðavöllr. Se besprekket Jörmmungandr, de groute geböärdenissen uut et verleaden en de runen. In et grös ligget de guldene spöälstükken wårmed de guden ooit souvöäle wille hadden in Valhalla. De velden groit vanselv weader vul en rype, sunder saien. De guden Höder en Balder kummet by mekander uut Hel, versonet sik en leavet tevreyden samen.

Volgens de wårsegster least den gud Hœnir höltene stökkes üm de tokumst te vöärspellen. De söäns van twey bröders bewoanet de wyde winderige wearld. See süt in Gimlé ne halle med en golden dak, wår as de adel woanen sal en öäre leavens gemödelik leaven sölt. Vers 65 van et Hauksbók in de dichtedda's verwist når nen "krachtigen machthebber" den as "öäver allens regeyrt" en den as van böäventen kümt an et hov van de guden (oldnoorsk: regindómr). Dit lätste wördt algemeyn eseen as ne kristelike tovoging an et gedicht. In vers 66 beskrivt de wårsegster nen draak Níðhöggr, den as med den bek vul lyken döär de lucht vlögt. Dårup löt sik de wårsegster dalesakken. Et is neet düdelik of de wårsegster in vers 66 når de hüdige tyd of nå-ragnarök verwist.

Vafþrúðnismál[bewark | bronkode bewarken]

In vers 39 van de Vafþrúðnismál wördt de Vanir-gud Njörðr nöömd in verband med Ragnarök. In et gedicht düt Wodan vermumd as Gagnráðr med de wyse jötunn Vafþrúðnir hen en weader wee as et klookste is. Vafþrúðnismál verwist når Njörðr syn ståtus as krygsgevangene in de vrogere Oorlog tüsken de Æsir en Vanir en dat hee weader kummen sal under de wyse Vanir te koste van de mensken.

In vers 44 vrögt Wodan an Vafþrúðnir wee van de mensken de beroomde Fimbulwinter oaverleaven sal. Vafþrúðnir antwoordet in vers 45 dat dat Líf en Lifþrasir weasen sölt. Dee versteaket sik in et Hoddmímis holt en drinket van de morgendauw. See sölt geslacht up geslacht an nåwas krygen. In vers 46 vrögt Wodan wat vöär sünne as der kümt nå at den wulv Fenrir de hüdige sünne upesluked hevt. Vafþrúðnir verkundiget dat Sól ne dochter krigt vöärdat Fenrir öär gript. Dee dochter sal nå Ragnarök öäre moder syn pad volgen.

In vers 51 verkundigt Vafþrúðnir dat nå et uutdöäven van Surtr syne vlammen, Wodan syne söäns Víðarr en Váli in de tempels van de guden leavet. Donar syne söäns Móði en Magni sölt de hamer Mjöllnir draegen. In vers 52 vrögt den vermumden Wodan an de jötunn wat der van Wodan terechte kummen sal. Vafþrúðnir segt dat 'den wulv' Wodan sal upeaten en dat Víðarr em sal wreaken döär in en gevecht syne kolde kiwwe uut mekander te trekken. Wodan hevt dårnå noch eyne vråge vöär Vafþrúðnir: wat segt Wodan teagen synen söäne vöärdat hee syn doudsvüür maket? Dårdöär krigt Vafþrúðnir döär dat hee med Wodan selv te maken hevt. Hee segt dat "Wodan den wysten van alle weasens is" en dat enkel Wodan dat kan weaten. Wodan synen boadskap wördt seen as ne ankundiging van de weaderupstanding van Balder nå Ragnarök.