Jörmungandr

Uut Wikipedia, de vrye encyklopedy
Nå navigaty springen Nå söken springen
Jörmungandr kümt uut et water üm den ossenskop te grypen. Teykening uut et 17.-eywske yslandske handskrivt AM 738 4to.

Jörmungandr of Jormungander (ouk wal bekend as de Midgårdslange of Wearldslange) is ne seyslange uut de germaanske mytology. Et is et middelste kind van stoakegod Loki en de röäsinne Angrboða, en verwant an Hel en de wulv Fenrir. Volgens de verhaaledda smeyt Wodan Jörmungandr in de groute oceaan dee as Midgård ümslüt. De slange groiden sou lange dat et de heyle wearld kunde umsluten en syn eygenen start kunde grypen. Dårmed is et en vöärbeald van en ouroboros. Den grötsten teagenstander van Jörmungandr, synen årtsvyand, is Donar den dundergod.

Naamherkumst[bewark | bronkode bewarken]

De name Jörmungandr kümt uut et oldnoorsk en besteyt uut twey deylen: Jörmun (unmündig grout en boavennatuurlik), wat verwant is an byvöärbeyld de Irminsule; en -gandr, wat verskillende brunnen oaversettet as 'staf' (verwysend når de längde van et weasen) of 'verskrikkelik monster'.

Verhalen[bewark | bronkode bewarken]

Oaver Donar synen untmöting med de Jörmungandr sint dree myten oaverbleaven.

De katte upböären[bewark | bronkode bewarken]

In eyn verhaal kümt Donar de röäsenköäning Útgarða-Loki teagen. Den hevt allerhande klüskes vöär Donar. Eyne dårvan is ne uutdaging vöär synen kracht. Útgarða-Loki porket Donar up üm de wearldslange up te böären, den as med magy in ne groute katte veranderd is. Donar gript de katte by den balg by, mär krigt em mär net med eynen poat van de grund. Útgarða-Loki legt wat later uut dat et en gräpken was en dat et Donar al sou wyd lükkeden nen indrukwekkenden dåd was. Hee had de slange håste töt an den heamel upeböärd. Dee wat et saggen warren der bange van wörden. As et em heylemål lükked was, warren de grensen van et heylal verwrüngen.

Donar syn visketripken[bewark | bronkode bewarken]

Donar geyt en mål hen visken med de röäse Hymir. Donar hevt up seaker ougenblik gin aas meyr en vrögt of Hymir em wat wil doon. Niks van an, segt Hymir. Donar wördt hellig en hauwt den kop af van Hymir synen ossen. Donar en Hymir stüürt öären boat up ne steade wåras Hymir vake visken up platviske en al es twey walvisken evöngen had. Mär Donar wil wyder de sey up. Hymir hevt dår weinig dörst up, mär Donar is eygenwys en geyt toch. Donar maket sik ne starke lyne en håken, en prikket der den ossenskop up. Jörmungandr bit to. Donar trekket de slange uut et water en de beiden kummet oug in ouge. Jörmungandr spyt gif en Hymir wördt bleak van bangigheid. Terwyl as Donar synen hamer wil grypen üm Jörmungandr af te hauwen, snid Hymir gauw de lyne döär. De slange sakket weader under water en krunkelt sik rund de wearld.

Et eddiske gedicht Hymiskviða eandigt ungeväär etselvde. In vrogere skandinaviske vertellingen weat Donar de slange doud te hauwen döär et den kop in te slån.

Donars visketripken was eyne van de geleevdste verhalen in noordske künst. Et steyt up veer bealdhauwde steynder afbealded, sou as de runesteyn van Altuna en de Ardre VIII in Sweyden, de Hørdrum-steyn in Dänemarken en nen vlakken steyn in Gosforth in Noordengeland. Up de meyste afbealdingen steyt de röäse den as de lyne döärsnidt. Up den steyn van Altuna steyt Donar alleyne, wat der up kan düden dat hee de slange doud hevt. Up de Ardre VIII ståt möägelik meyrere stadia in et verhaal: nen kearl den as en ossenstal binnenkümt, twey kearls dee as der up uut gåt, eyne med wat up de skolders en twey kearls dee as visken doot med spears. Et bealdhauwwark up de steyn wördt dateerd tüsken de achtste töt de teende eywe, wat solde angeaven dat disse myte verskillende hunderden jåren unveranderd döäregeaven wör, vöärdat et vastelegd wör in de verhaaledda rund et jår 1220.

Ragnarök[bewark | bronkode bewarken]

In et historiske wark Gylfaginning van den yslandsken skryver Snorri Sturluson steyt dat et begin van Ragnarök te marken is in de wilde unröste van de sey, döärdat Jörmungandr synen start löslöt en sikselv up et land warpet. Hee krupt med den wulv Fenrir voordan en spyet de lucht en et water vul med gif, terwyl as Fenrir vüür spyet uut syne ougen en nöäsegaeter en med synen bek wyd lös de aerde en de lucht upvreat. See vereyniget sik med de söäns van Muspell üm de goden up de vlakte van Vigrid te bestryden. Hyr wördt vöärspeld dat de slange Donar mekander vöär de lätste mål treffet. Donar krigt Jörmungandr doud, mär valt selv nå noch neagen trad doud dale döär et gif van de slange. Donar syn lätste gevecht med de slange steyt, nöäst andere afbealdingen van Ragnarök, up et Krüüs van Gosforth.