Balder

Uut Wikipedia, de vrye encyklopedy
Nå navigaty springen Nå söken springen

Balder (ouk skreaven as Baldr of Baldur) is nen gud in de germaanske mythologie. Hee is de söäne van den gud Woden en de gudinne Frigg en hevt meyrere bröders, sou as Donar en Váli. Den name stamt van et protogermaanske *Balðraz, wat 'heldhaftig' bedüdet.

Van Balder sint weinig verhalen bekend, behalve dat hee en syn moder Frigg beide deselvde vöärspellende dröyme hebbet wårin hee starvet en dårmed Ragnarök sal untkeatenen. Nå Ragnarök sal Balder weader upstån en de nye wearld bevolken. In de Gylfaginning, eyn book van den yslandsken geskeedkünnigen Snorri Sturluson in syne verhaaledda, wördt hee beskreaven as strålend wit van lecht en prachtig üm te seen.

Balders doud en grove[bewark | bronkode bewarken]

In de dichtedda's wördt Balder syn doud neet rechtstreyks beskreaven, mär når verweysen in verskillende vöärspellingen. De guden bespreaket Balder syne unheilspellende dröyme, mär kummet der neet uut med mekander. Wodan geyt by Hel an üm nen douden wårsegster üm råd te vrågen. Hee wekket öär med syne krachten töt leaven. Ümdat see Wodan neet herkennet en hee sik vöärdüt as Wegtam (swarver), düt see ne vöärspelling van Balder in ne halle med banken vul ringen en ne vlore van gold, wår as meade vöär Balder brouwen wördt. Mär se segt et neet gaerne en wil sik wyder stille holden. Et begint Wodan te dagen dat dat Valhalla müt weasen, düs hee dringt an by de wårsegster üm te vertellen wee as Balder doudhauen sal. See segt dat et Höder sal weasen, Balder synen bröder. Wodan vrögt wee as em wreaken sal. See antwoordet dat et Váli sal weasen, en kind wat in eynen nacht sal upgroien.

Balder syn moder, Frigg, krigt sou vöäle skrik van de vöärspelling van Balders doud dat se alle dinge en leavende weasens in et land löt beloaven dat se Balder niks sölt doon. Se vergeat enkel de misteltak te vrågen, want den acht see neet belangryk genog (en alternative verklåring is hyr dat et der up wist dat junge kinder noch neet ansprakelik wordet eholden vöär emakede afspraken en eswöärene beloavdes, mär dat dee vanselv en mål upgroiet en sik der dan neet an hoovt te holden). Dår krigt stoakegud Loki lucht van en den maket sik ne speare uut misteltak. Terwyl as de guden skik hebbet med Balder en em bekoagelet med swåre steynder en andere vöärwarpen ümdat hee toch unstarvelik is, düt Loki de speare in de handen van Höder, Balder synen blinden bröder. Sou vermoardet Höder syn eygenen bröder. Wodan, den as wraak wil, geyt weader by nen wårsegster an üm te höyren wo as hee Loki et beste kan anvatten. Den verwist em når de åsinne Rinda, mär see wil neet med em küren. Hee vergiftigt öär med magiske runen en düt sik dårnå vöär as heylmeisteresse under den name Wecha. Hee segt dat hee wal ne küre hevt, mär dat den wal ne flink swåre uutwarking sal hebben. Hee verkrachtet dårup Rinda, dee as neet vöäle later ne söäne Váli krigt. Váli sal uuteandelik de doud van Balder wreaken en Höder douddoon.

Balder wördt uutleided in syn skip hringhorni, et beste skip ooit. Et skip wördt ritueel in brand estöäken döär Donar, den as et löt lüchten en dunderen med synen hamer. Den dwarg Litr löpt em underwyl voordan vöär de vöte en uut argernis sküppet hee em by up de brandstapel. Ouk Nanna, Balder syne vrouwe, löt sik up et vüür vallen üm uuteyndelik by Ragnarök weader by Balder te weasen. Balder syn paerd wördt ouk med verbrand. De röäsinne Hyrrokin kümt anjagen up nen wulv. See gevt et skip sou nen duw dat et vüür van de rullebalkens sküt en de aerde der van beavet.

Vul verdreet stüürt moder Frigg den boadskapper Hermod når Hel, de heyresse van neavelheym, de underwearld. Den beloavet Balder uut de underwearld te låten as alle leavende en doude objekten vöär Balder sölt tröären. Dat doot se allemåle, up eyne nå. De röäsinne þökk (vake der van verdacht Loki in vermumming te weasen) düt der neet an med. Balder müt in de underwearld blyven en kümt der pas med Ragnarök weader uut, wårnå hee wördt vereynigd med syn bröder Höder en tehoupe med Donar syne söäns de nye aerde sal regeyren.

Brunnen[bewark | bronkode bewarken]

Däänske brunnen uut de 12. eywe, sou as van Saxo Grammaticus en andere däänske geskedenisskryvers, hebbet en vermenskelikt verhaal van Balder daleskreaven. In beide de dicht- en verhaaledda ståt verwysingen når Balder syn doud as nen grouten tragedy vöär de Æsir en den veroorsaker van Ragnarök.

Volgens de Gylfaginning is Nanna de vrouwe van Balder en Forseti öären söäne. Balder syn skip Hringhorni is et beste wat der ooit ebouwd is en der is ginne halle mööier as syn Breidablik.