Höder

Höder of Höðr (oldnoorsk: Hǫðr) is nen blinden gud uut de germaanske mytology. Hee is de söäne van Woden en Frigg, bröder van Donar en Balder en halvbröder van Váli.

Volgens de verhalen kryget Frigg en Balder in nen dröym vöärspeld dat Balder uut de tyd sal kummen. Frigg is dår sou van van de wyse dat se alle vöärwarpen en saken up de wearld (behalve den misteltak) löt swearen em niks te doon. Sou waant sik Balder unstarvelik, en de andere guden hebbet der groute wille an üm allerhande wåpens en saken up em te smyten. Stoakegud Loki krigt der lucht van dat de misteltak niks evrågen is. Hee maket der ne speare (of pyle) van en drükket ne den blinden Höder in de handen. Med Loki's hülpe smit Höder de speare. Balder sakket vöär doud vöär de grund. Alleman is kats van de wyse, sou wat is in de halle van de guden noch nooit geböärd. Vandår dat Höder neet direkt egreapen wördt. Wodan wil wraak. Hee verkrachtet de åsinne Rinda en see krigt ne söäne, Váli. Den groit binnen eyn dag uut töt nen starken kearl en vermoardet Höder. Nå Ragnarök söllet beide Höder en Balder weader upstån, sik weader verbroderen en med mekander de wearld vannys bevolken.

Den däänsken geskydskryver Saxo Grammaticus skreav et net yts anders in synen Gesta Danorum. Volgens em vöchten den starveliken held Høtherus en den halvgud Balderus üm de hande van Nanna en wün et Høtherus van Balderus.

Höder kümt in vöäle andere verhalen geheyls neet vöär.