Valhalla

Valhalla (ouk wal skreaven as Walhalla) is in de germaanske mytology de steade wåras heldhaftige krygers hengåt as se ümmekummet up et slagveld. Et bedüdt letterlik de halle van de völlenen.

Valhalla is ne majestuöse, machtige halle den as steyt in Asgaard. Et is et huus van den uppergod Woden. De hälvde van dee wat doudedån wordet in den stryd, gåt når Valhalla. See wordet uuteköären en der hen ebracht döär de valköären, mytiske vrouwlüde. De andere hälvde gåt med Freya med når et veld Volkvanger. De doude krygers in Valhalla kummet an tåfel med andere vechters (de Einherjar) en verskillende legendariske germaanske helden en köäningen. See bereidet sik vöär um Woden te helpen vechten up Ragnarök, den grouten endstryd. Vöär de halle steyt nen grouten golden boum, Glasir. Et dak is bedekked med goldene skilden. Rund Valhalla woanet verskillende weasens, sou as de härtenbulle Eikþyrnir en den sik Heiðrún. In de geskrivten steyt dat dee up et dak van Valhalla klimt üm et blad van den boum Læraðr to eaten.

Valhalla wördt enöömd in den dichtedda, upesteld in den 13. eywe uut eyrdere traditionäle brunnen, en in de verhaaledda (daleskreaven in den 13. eywe döär Snorri Sturluson), in Heimskringla (ouk eskreaven in den 13. eywe), un in de versen van Eiríksmál, en gedicht van nen unbekenden skryver uut den 10. eywe oaver den doud van Erik Bloodakse.

Der sint untelbåre kunstwarken en uutgaves oaver Valhalla maked. In de popkultuur kümt Valhalla regelmåtig weaderümme en et is en geleevd tema binnen metal-kringe.