Radio Kootwiek

Uut Wikipedia, de vrye encyklopedy
Radio Kootwiek in 1922

Radio Kootwiek (Nederlands: Radio Kootwijk) is n buurtschap in de gemeente Apeldoorne, in de Nederlandse provinsie Gelderland, mit net iets meer as 100 inwoners. Eerst heetten t Kootwiek Radio, um t te onderscheiden van t oorspronkelike darp Kootwiek dat n paor kilometer verderop ligt; Radio Kootwiek is de name van t vroggere zendstasion waorumhen t darp ebouwd wordden. t Ligt in t midden van n bos-, stoefzand- en heedriek gebied op de Veluwe, ten oosten van t Kootwiekerzand en t darp Kootwiek, dat bie de gemeente Barneveld heurt. Tot augustus 1966 beheurden Radio Kootwiek veur de ene helfte bie Barneveld en veur de andere helfte bie Apeldoorne.

Relasie mit t zenderpark[bewark | bronkode bewarken]

De woonbebouwing van Radio Kootwiek is ontstaon as gevolg van de bouw vanof 1918 van t gelieknamige zenderpark. In 1923 begun de PTT op disse ofgelegen plekke transoseaniese telegrafie via de lange golve. In de drekte umgeving van de zenders wordden huzen veur de medewarkers ebouwd. Sosiologies was t darp n smeltkroes van regionale, religieuze en kulturele identiteiten, die uutmondden in n biezundere samenlaeving mit n, töt halverwaegen de jaoren zestig, uutzunderlik riek verenigingslaeven in n unieke sosiale kontekst. In 1964 wordden t darp baeter bereikbaor veur de butenweerld deur de anleg van n verlenging van de asfaltweg Hoog Buurloseweg uut de richting van Ugchelen.

Naodat in 2000 elke zendfunksie verdwenen was kwam t terrein van t zenderpark in 2004 in handen van Dienst Landelik Gebied (DLG) en Staotsbosbeheer. DLG gong op zuuk naor n nieje eigenaar/beheerder veur de gebouwen die veurhen bie t zenderpark heurden. n Eerste herbestemmingsproses liep op niks uut deurdat ze teveule van mening verschilden, mar n tweede ronde die in 2007 startten, kreeg meer steun, zowel van inisiatiefnemmers as de darpsraod, die grege de natuurweerde van t darp en de umgeving behouwen wilt.

Bestemming en bescharming[bewark | bronkode bewarken]

Op 6 juni 2012 wordden t darp Radio Kootwiek samen mit t vroggere zendterrein deur de rieksoverheid an-ewezen as bescharmd darpsgezichte, op veurdracht van de gemeenteraod van Apeldoorne.[1] In dit jaor speulden de tegenstellingen tussen de rekreatieve en kulturele ambisies van Staotsbosbeheer en de natuurweerden van t gebied weer hoog op, waorbie t leste belang benaam in-ebracht wordt deur de Stichting Warkgroep Milieuzörg Apeldoorne (SWMA). Ze dringt al jaoren an op terughouwendheid in t antrekken van publiek naor Radio Kootwiek, mit wisselend sukses.[2][3] In april 2013 zetten de Raod van Staote n strepe deur de vergunning van de provinsie Gelderland an Staotsbosbeheer veur t plan waorin t vroggere zenderpark meer kulturele en rekreatieve aktiviteiten toe-espeuld zol kriegen. Hiermee wordden de SWMA, die de rechtszake had an-espand, in t geliek esteld.[4]

Mar toch nam t bezuuk van daggiesmensen toe, ok al was niet iederene der blie mee. In 2014 wordden n konvenant tussen SWMA en Staotsbosbeheer op-esteld, waorin steet dat Staotsbosbeheer verplicht is um zich der hard veur te maken dat de verkeerstoestroom naor Radio Kootwiek en t antal bezukers an Radio Kootwiek weer ofnemmen.[5]

Referensies[bewark | bronkode bewarken]

  1. Anwiezing bescharmd darpsgezichte Apeldoorne: Radio Kootwiek, besluut van de Staotssikketaoris van Onderwies, Kultuur en Wetenschap en de Minister van Infrastruktuur en Milieu van 6 juni 2012, wetten.overheid.nl
  2. SWMA te late mit protest tegen fietspad bie Radio Kootwiek, de Stentor, 30 meert 2012
  3. Radio Kootwiek onder vuur, de Stentor, 11 desember 2012
  4. n Strepe deur vergunning veur Radio Kootwiek, Stichting Apeldoornse Monumenten, 24 april 2013
  5. Rem op bezukers Radio Kootwiek, de Stentor, 2 desember 2014

Uutgaonde verwiezingen[bewark | bronkode bewarken]


Dit artikel is eskreaven in et oustveluwske dialekt van Apeldoorne, in de Algemene Nedersaksiese Schriefwieze.