Grunendaal
Grunendaal (Nederlands: Groenendaal) is n gehucht en natuurgebied in de gemeente Apeldoorne, in de Nederlandse provinsie Gelderland.
Grunendaal is t meest zujelike punt van de gemeente Apeldoorne en ligt in-eklemd tussen de A50 en natuurgebied de Loenermark. De woonkern hef één straote, mit de name Grunendaal, die administratief onder t 6 kilometer noordoosteliker elegen Loenen völt. Der staon zes huzen en n landgoed mar ok sleurhuttenpark. Hoewel t gehucht pal naost de snelweg ligt, ku'j t mit de auto alleen via n lange umweg bereiken. Wel liggen der an weerskanten van de A50 in- en uutritten veur liendebushalten veur Grunendaal, mar die alleen gebruukt kunnen worden as de spitsstroken esloten bint. Tiejens de spitsuren riejen der pendelbussen op de prelleweg.
Grunendaal was in de 20e eeuw veural n landbouwenklave. In 1993 wordden t zujelike gedeelte van t akkergebied (60 bunder) an-ekocht deur de Vereniging Natuurmonumenten. In t begin mos t nog gebruukt worden veur de landbouw, mar tussen 1998 en 1999 wordden de rikkige vortehaald (in verband mit onderzuuk naor interaksies tussen verschillende diersoorten is t in fases edaon), waordeur Schotse hooglanders en andere wildsoorten uut de angrenzende gebiejen Loenermark en Imbosch t konnen begrezen. De noordelike landbouwenklave (83 bunder) is in 2002 van de pachter ekocht deur t Bureau Beheer Landbouwgronden, die t weer deurverkocht an Natuurmonumenten. Hiermee is ok dit terrein deel eworden van de natuurlike eenheid Veluwezeum.
Uutgaonde verwiezing
[bewark | bronkode bewarken]
|
Commons: Grunendaal - plaatjes, filmkes en/of gelüüdsbestanden. |
|
Dit artikel is eskreaven in et oustveluwske dialekt van Apeldoorne, in de Algemene Nedersaksiese Schriefwieze. |