Arno Piechorowski

Arno Piechorowski (15 juni 1930 - Reicheneck, 9 november 2019) was een Nedersaksische schriever uut de Graofschop Benthem in Duutslaand. Hij gebruukte ok de schrieversname A. P. Kreggemeyer (Kreggemeyer was de achtername van zien moe). Ok tiekende e wal mit: 'Arno Piechorowski, gen. Kreggemeyer'.

Piechorowski was schoelmeister in Nothoorn. In de joaren vieftig was e, mit aandere Graofschoppers, betrökken bij de Nedersaksische Beweging, een riege initiatieven waorbij Nederlaanders en Duutsers in de maande warkten um 't Nedersaksisch uut te bouwen as cultuurtaal. Via hum koj in Duutslaand 't in Grunning edrokte Nedersaksische tiedschrift 't Swieniegeltje verkriegen. Mit Christa Brinkers naamp e 't sikketariaot waor van de in 1956 operichte Schrieverkring an Ems un Vechte, een veriening die töt in de eerste helfte van de jaoren zestig bestund.

Ok sleut e hum an bij De Junge Graofschup, een in 1955 deur de taalstrieder Arnold Rakers opezette warkgroep veur Heimat en moederspraoke. Van Piechorowski was de observatie, nao 't aoverlieden van Rakers: "Arnold Rakers lewde ůůt den geest van et gemeenschůppelike leven ůp weerskanten van de grense. Hee lewde in dissen geest, hee lewde föör dissen geest".

Piechorowski schreef meermaols aover de Jeudse gemienschop in Nothoorn in de tied van 't nationaalsocialisme; zo schreef e Der Untergang der jüdischen Gemeinde Nordhorn (1964), det nog aordig wat lösmaakte. As A. P. Kreggemeyer schreef e Bestevaar vertelt. Olde geschichten föör kinder (1968), mit tiekenings deur de Twèentse regionalist Everhard Jans. Rond 1980 verhuusde e naor Reicheneck in 't zuud-Duutse Baden-Wurttembarg. Daor bestierde e de bekende Aldus-Presse, een haanddrokkerije.

Schrieverije

• Der Untergang der jüdischen Gemeinde Nordhorn (Nothoorn: Stad Nothoorn, 1964)
• Mijn vrienden in Amsterdam. Begincursus Nederlands voor jonge Duitsers (Dealdn: Stabo, 1966)
• 'Bibliographie van Arnold Rakers', in Driemaandelijkse Bladen 17, 1965, pp. 129-133
• 'Volk van de Moderspråke. In memoriam Dr. Arnold Rakers', in Jahrbuch des Heimatvereins der Grafschaft Bentheim (Das Bentheimer Land 61, 1967)
• Bestevaar vertelt. Olde geschichten föör kinder (Dealdn: Stabo, 1968)
• Beiträge zur Geschichte der Juden in der Grafschaft Bentheim (as redacteur en bijdrager, Benthem, 1982)

Bronnen

• Helmut Lensing (2020), 'Die Niederdeutsch-Bewegung nach 1945 in den Regionen Grafschaft Bentheim, Emsland und Ost-Niederlande', in Osnabrücker Mitteilungen. Mitteilungen des Vereins für Geschichte und Landeskunde von Osnabrück (Historischer Verein), diel 125, Ossenbrügge, pp. 91-116
• F.G.H. Löwik (2003), De Twentse Beweging: strijd voor modersproake en eigenheid, Stad: Rieksuniversiteit Grunning
• Arno Piechorowski (1965), 'Bibliographie van Arnold Rakers', in Driemaandelijkse bladen voor taal en volksleven in het oosten van Nederland, 17e jk., nr. 4
• Plattmakers aover Arnold P. Kreggemeyer (sic)

Dit stok is eschreven in 't Zuudwest-Drèents.