Schrieverkring an Ems un Vechte

De Schrieverkring an Ems un Vechte was een in 1956 in 't ende ezette veriening van lu die schreven in 't Emslaander plat van 't Emslaand en 't Graofschopper plat van de Graofschop Benthem, beide in Duutslaand tegen de Nederlaandse grèenze an. Veurzitter was de Graofschopper taalkundige en veurvechter van 't Nedersaksisch Arnold Rakers.

De Schrieverkring wördden in Nothoorn opericht op 25 febrewari 1956. Op de oprichtingsbijienkomst waren ok lu uut 't Mönsterlaand en Oostfraislaand, asok veertien Nederlaanders, onder wie hoogleraar Nedersaksisch Klaas Heeroma en de Twèentse streekkenner Jan Jans. De wèens wördden uutespreuken um samen te warken mit Nedersaksisch tiedschrift 't Swieniegeltje, det twee jaor eerder opezet was.

Leden van de kring waren onder meer: uut 't Emslaand Maria Mönch-Tegeder, Hans Wessels, Bernhard Uphus en Josef Hugenberg; uut de Graofschop Benthem Ludwig Sager, Karl Sauvagerd en Christa Brinkers. De kring lek op zien lest midden jaoren zestig stillegies inesleupen te wezen: verscheiden mitwarkers waren al aordig op leeftied, en de bezielende kracht Arnold Rakers kwaamp september 1965 uut de tied. Al eerder was e teleurgesteld eraakt in 't uutblieven van de Nedersaksische taalrenaissance daor as e hum veur inespand had, en waorvan hij mienden det schrievers en dichters der een sleutelrolle in hadden.

Bronnen

• Helmut Lensing (2020), 'Die Niederdeutsch-Bewegung nach 1945 in den Regionen Grafschaft Bentheim, Emsland und Ost-Niederlande', in Osnabrücker Mitteilungen. Mitteilungen des Vereins für Geschichte und Landeskunde von Osnabrück (Historischer Verein), diel 125, Ossenbrügge, pp. 91-116.
• Helmut Lensing (2021), 'Die Bentheimer Plattdeutsch-Bewegung öffnet sich nach Westen', in Henk Bloemhoff en Henk Nijkeuter (red.), Jaorboek Nedersaksisch 2 (2021), Oosterwoolde: Stichting Sasland, pp. 50-61.

Dit stok is eschreven in 't Zuudwest-Drèents.