Christa Brinkers

Christa Brinkers (Wietmöschken, Graofschop Benthem, 18 juli 1891 - Twist, Emslaand, 30 jannewari 1975) was een Duutse schriefster in 't Graofschopper plat en onderwiezeres.

Opleiding en onderwieswark

Brinkers was de dochter van een boer en ondernemer. Töt heur veertiende gunk ze in Wietmöschken naor de volksschoele; daorop volgden twee jaor op 't lyceum en drei jaor op de lerarenopleiding in Ossenbrügge. In 1911 dee zeu heur lerarenexaomen veur de volksschoele. In de plaatse Stadthagen bij Hannover wördden ze lerares an de bisschöppelijke privéschoele. Vanof 1915 was ze plaatsvervöngend leraren in Haltern, in Hesepe en op Helgolaand. In 1920 kreeg ze een vaste anstelling in Herbrum (vandage onderdiel van Papenbörg). Van 1928 töt 1932 woonde ze in Ossenbrügge, waor ze exaomen deu in neiwark en in 't onderwiezen van nijverheid an beroepsschoelen. Umdet ze gien bane in een beroepsschoele vund, gunk ze weerumme naor de volksschoele in Herbrum. Vanof 1934 was ze lerares an de kathelieke volksschoele in Meppen in 't Emslaand.

Brinkers wördden veur de gouw Werser-Eems leidster van de nationaal-socialistische vrouwenveriening 't NS-Frauenschaft. In 1945 wördden ze uut heur dienst ontzet en gevöngen ezet; rond de jaorwisseling 1946-1947 kwaamp ze weer vrij. In 1948 gunk ze mit pensioen. Ze woonde in Meppen en vanof 1965 in Nordhorn; in 1971 gunk ze naor bejaordenhuus St. Anna in Twist.

Schrieverije

In 1924/5 gunk Brinkers veur 't eerst an de schrieverije. Eerst nao heur pensionering kwaamp de literaire bedrievigheid vanneis op gaank. Ze was mitwarkster van de in 1948 opezette Emslandske Sellskup. Vanof 1954 had ze riegelmaotig bijdragen staon in de jaorboeken van de Emsländische Heimatbund en van de Heimatverein der Grafschaft Bentheim. Ok schreef ze in de kraante de Grafschafter en dreug ze bij an Nedersaksisch literair tiedschrift 't Swieniegeltje. Mit Geschichten und Gedichte aus der Grafschaft Bentheim und dem Emsland (1992) verscheen der veur 't eerst een keuze uut heur volledige wark. Dizze uutgave was verlochtigd mit tiekenings van heur haand. Ze hef ok schilderijen emeuken.

Uutgaves

• Emsland singt und tanzt (Meppen: Verlag des Emsländischen Heimatvereins, 1955)
• Emslandkinder singen, spielen und tanzen (mit Maria Mönch-Tegeder, Meppen: Verlag des Emsländischen Heimatvereins, 1960)
• Sagen und Volkserzählungen aus dem Emsland (Meppen: Verlag des Emsländischen Heimatvereins, 1962)
• Christa Brinkers (gedichten, speciaoldrok uut 't Jahrbuch des Heimatvereins der Grafschaft Bentheim, Nordhorn, 1968)
• Geschichten und Gedichte aus der Grafschaft Bentheim und dem Emsland (Heimatverein der Grafschaft Bentheim, 1992)
• Unse aule Platt: Gedichte und Geschichten aus der Grafschaft, Nordhorn: Private Room, 1996)

Bronnen

• Plattmakers aover Christa Brinkers
• Watt-up-platt.de aover Christa Brinkers

Dit stok is eschreven in 't Zuudwest-Drèents.