Woapen van Eanske

Et wåpen van Eanske rechtevoord.

Et olde wåpen van Eanske.

Ne leywe med et wåpen van Enskede up de Gedenksule H.J. van Heek (maked in 1874).

Et Wåpen van Eanske is et wåpen van de oaverysselske gemeynde Eanske. Et wör up den 24. November van 1819 deur en Köninklik Besloet an Eanske geaven. Nå at de gemeynden Eanske en Lönneker up den 25. augustus 1936 samengüngen, wör et wåpen in stand hölden.

Blasonering

De beskryving van et wåpen uut 1819 was (in et Neerlaands) "Van zilver, beladen met drie dwarsbalken waaroverheen een St. Andries kruis, formerende te zamen een slaghek, en alles van rood. Het schild gedekt met een gouden kroon en ter wederzijde vastgehouden door een klimmende leeuw."

Et olde wåpen uut 1936 kreag en paar symbolen in de blasonering: de leywe wör ouk in de beskryving by upnöämen, et Andrieskrüüs wör vervöngen döär et woord "schuingekruist", sou dat de uutenden nich meyr wyder as de böävenste en underste balken güngen. En middelste krüüsken güng der uut. Zo wör de blasonering: "In zilver een slaghek van keel, bestaande uit 3 dwarsbalken, waaroverheen 2 schuingekruiste balken. Het schild gedekt met een gouden kroon van 5 bladeren. Schildhouders : 2 aanziende leeuwen van natuurlijke kleur."

De heraldiske klören bint silver (wit), keel (roud), gold (geal) en sinopel (gröön).

Wegkomst

Eanske kreag up den 15. december van 1325 stadsrechten van den utrechsken biskop Jan van Diest. Eyne van de rechten van ne stad was et möygen voren van en "stadtsigeli" (stadsseagel). By in et öldst bekende seagel van de stad steyt et beald van nen parochyheiligen, den heiligen Jakobus den Ölderen. Dat seagel is töt an de Vreyde van Kleef (1666) bruked weasd, wårnå et vervöngen wör döär en wåpen med dårup en slaghek, wat lyk is an et hüdige wåpen. Ouk in dotyds warren klören wårskynlik keel up silver.

Et slaghekke kan meyrere oarsprungen hebben. Et kan düden up en tolhekke, as verwysing når en grenspost (Eanske ligt ja kört an de düütske grense). Ouk kan et slån up et familywåpen van Van Beveren, en old adelik geslacht. Wat Van Beveren med de stad te maken hevt is nich düdelik. Ne darde möägelikheid is dat et ne verbastering is van den vöärkristeliken hagalrüne, den as in et heyle neadersassiske gebeed noch wal es bruked wördt as unheilafweyrend symbool up müren en stypelteykens.

Verwysingen

Dit artikel is eskreaven in et twentske dialekt van Nysassiske Skryvwyse.