Sassische Schrieversbund

Uut Wikipedia, de vrye encyklopedy
Nå navigaty springen Nå söken springen

De Sassische Schrieversbund was een aoverkoepelnde organisatie veur literaire schrieverije in de verscheiden Nedersaksische taalvariaanten van Nederlaand en de angrèenzende Duutse streken. De bond wördden op 25 juni 1955 opericht in Maarkel, Twente, onder de leiding van de Grunninger regionalist Willem Diemer.

De bond wördden onderverdield in de ofdielings Twente, Sallaand mit Oost-Veluwe, Grunning, Drenthe (as de 'Drentse Schrieverskring') en de Gelderse Graofschop. 't Sikketariaot van de bond was in Almelo evestigd. Bij de oprichtingsbijienkomst höld Diemer zien correspondent, de Benthemer taalkundige Arnold Rakers, de veurdracht 'Stried föör de Moderspraoke', die in 1955 uutkwaamp in de Schriftenriege Sassische Weddergeboorte van uutgeverije J. A. Eerelman.

End jaoren vieftig stapte Diemer wegens verschil uut 't bestuur van de bond. Umdet gieniene zien organisatorische inbreng aovernaamp, völt de aoverkoepelnde bond uutien. De schrieverskringen in de verschillende regio's bleven ampart bestaon, mar mit de interregionaole samenwarking was 't veurlopig daon.

De Sassische Schrieversbund hef onder wat naamsvariaanten en schriefwiezen bekendestaone, zoas Nedersaksische Schrieversbond, Nedersaksische Schrieversbund, Bůnd van Schrieverskringen en Bond van Saksische Schrievers.

Bronnen[bewark | bronkode bewarken]

  • Bloemhoff, Henk, Jurjen van der Kooi, Hermann Niebaum en Siemon Reker (red.) (2008), Handboek Nedersaksische Taal- en Letterkunde, Assen: Van Gorcum
  • Löwik, Frank (2003), De Twentse Begewing: Strijd voor Modersproake en Eigenheid (proefschrift), Stad: Rieksuniversiteit Grunning
  • Rakers, Arnold (1955), Stried föör de Moderspraoke, Knoal: J. A. Eerelman N.V.
Nuvola apps ksig.png Dit artikel is eschreven in 't Zuudwest-Drèents.