Sassische Schrieversbund

Uut Wikipedia, de vrye encyklopedy
(döärstüürd vanaf "Nedersaksische Schrieversbond")

De Sassische Schrieversbund was een aoverkoepelnde organisatie van schrieverskringen in de verscheiden Nedersaksische taalvariaanten van Nederlaand en de angrèenzende Duutse streken. De bond wördden op 25 juni 1955 opericht in Maarkel, Twente, onder de leiding van de Grunninger regionalist Willem Diemer.

De bond, die as vestigingsplaatse Stad Grunning kreeg, wördden onderverdield in de ofdielings Twente, Sallaand mit Oost-Veluwe, Grunning, Drenthe en de Gelderse Graofschop. Jan Naarding wördden veurzitter, Jan Vredenberg tweede veurzitter en G.G. Kloeke ereveurzitter. 't Sikketariaot van de bond was in Almelo evestigd. As orgaan van de bij de Bund anesleuten schrieverskringen wördden 't al in 1954 operichte Nedersaksische tiedschrift 't Swieniegeltje anewezen. Bij de oprichtingsbijienkomst höld Diemer zien correspondent, de Benthemer taalkundige Arnold Rakers, de veurdracht 'Stried föör de Moderspraoke', die in 1955 uutkwaamp in de schriftenriege Sassische Weddergeboorte van uutgeverije J. A. Eerelman.

End jaoren vieftig stapte Diemer wegens verschil uut 't bestuur van de bond. Umdet gieniene zien organisatorische inbreng aovernaamp, völt de aoverkoepelnde bond uutien. De schrieverskringen in de verschillende regio's bleven ampart bestaon, mar mit de interregionaole samenwarking was 't veurlopig daon.

De Sassische Schrieversbund hef onder wat naamsvariaanten en schriefwiezen bekendestaone, zoas Nedersaksische Schrieversbond, Nedersaksische Schrieversbund, Bůnd van Schrieverskringen, Bůnd van Sassischen Schrieverskringen en Bond van Saksische Schrievers.

Bronnen[bewark | bronkode bewarken]

  • Henk Bloemhoff, Jurjen van der Kooi, Hermann Niebaum en Siemon Reker (red.) (2008), Handboek Nedersaksische Taal- en Letterkunde, Assen: Van Gorcum
  • Helmut Lensing (2020), 'Die Niederdeutsch-Bewegung nach 1945 in den Regionen Grafschaft Bentheim, Emsland und Ost-Niederlande', in Osnabrücker Mitteilungen. Mitteilungen des Vereins für Geschichte und Landeskunde von Osnabrück (Historischer Verein), diel 125, Ossenbrügge, pp. 91-116
  • Helmut Lensing (2021), 'Die Grenzüberschreitende Niederdeutsch-Bewegung in den Jahren nach dem Zweiten Weltkrieg in der Region Emsland/Grafschaft Bentheim und den östlichen Niederlanden', in Henk Bloemhoff en Henk Nijkeuter (red.), Jaorboek Nedersaksisch 2 (2021), Oosterwoolde: Stichting Sasland, pp. 109-147
  • Frank Löwik (2003), De Twentse Begewing: Strijd voor Modersproake en Eigenheid (proefschrift), Stad: Rieksuniversiteit Grunning
  • Arnold Rakers (1955), Stried föör de Moderspraoke, Knoal: J. A. Eerelman N.V.
Dit artikel is eschreven in 't Zuudwest-Drèents.