Iesvene

Uut Wikipedia, de vrye encyklopedy

Iesvene (Nederlaans: Eesveen) is een dörpien in de gemiente Stienwiekerlaand, in de Nederlaanse perveensie Overiessel. Et leit in de Kop van Overiessel langes de N855 (plaetselik bekend as de Iesveenseweg), in et noorden van Stienwiek kotbi'j de perveensiegreens mit Drenthe. Iesvene is in de wiede omgeving bekend, veural bi'j jongeren, deurdat d'r een diskotheek zit (Smithy's Palace).

In et westen van Iesvene leit et laandgoed De Iese, gedieltelik in pattekeliere hanen en gedieltelik in hanen van Staotsbosbeheer, bestaonde uut laandbouwgebied en bossen. In et oosten liggen de Iesveense hujlanen. Disse vri'j leeglegen gronden (tussen de 0 en 1 meter boven NAP, liggen in de naobi'jhied van de Stienwieker Aa. Heur naeme daanken ze an et feit dat ze in vroggere tieden te nat weren veur beweiding en daoromme as hujlaand in gebruuk weren.

In 1914 wodde de tramliende Stienwiek - Hoek Makkinge van de NTM eupend, waoran in Iesvene een tramstesjon eupend wodde. In 1947 wodde et personevervoer op disse liende stopzet, mar de NTM gong deur mit et vervoer van spul op disse liende die in 1959 overneumen wodde deur de NS. In 1962 wodde ok et vervoer van spul stopzet en wodde de liende opbreuken.