De Kuunder (Stienwiekerlaand)

Uut Wikipedia, de vrye encyklopedy
Woapen van De Kuunder

De Kuunder (Nederlaans: Kuinre) is een plak in Overiessel in de gemiente Stienwiekerlaand. De ooldste notities waorin spraoke is van Cuinder bin vanof omdebi'j et jaor 1100.

De inwoners wodden Kuundersen nuumd. De bi'jnaeme veur de inwoners van De Kuunder is Kuunderse krongen.

De Verleuren Haeven van De Kuunder[bewark | bronkode bewarken]

De Kuunder was een vissers- en haevenplakkien, mar kwam bi'j anleg van de Noordoostpoolder op et dreuge te liggen. De Noordoostpoolder wodde veur een groot part, in stried mit de Zuderzeewet, dreks an et bestaonde laand (Overiessel) vaastelegd. Zo kon et gebeuren dat De Kuunder 'as een vis op et dreuge' vongen in et laand kwam te liggen. De haeven en anlegsteigers liggen sund die tied op et laand. De steiger leit in Overiessel, et gröslaand d'r veur leit in Flevolaand.

De Kuunderburcht[bewark | bronkode bewarken]

Ok in de greiden en bossen vlak veur De Kuunder in Overiessel liggen now op et dreuge de rekonstreweerde overbliefsels van een zeerovernust, de eerste Kuunderburcht. De Heren van De Kuunder weren de argste zeerovers van Noord-Nederlaand, te vergelieken mit roofridders as Zweder van Bentheim, Herbrun van Putten ('de gesel der Veluwe') en Zweder van Voorst. Heur kesteel lag op een utermate strategische lekaosie ten opzichte van de Hanzeroutes naor et Oostzeegebied. Kooplieden uut onder aandere Daanswiek (ok wel: Gdansk of Dantzig) en Hamburg wodden nogal es opbrocht en veur losgeld op et slot in De Kuunder vaastezet.