Harm Agteresch

Uut Wikipedia, de vrye encyklopedy

Harm Agteresch (Riesn, 20 april 1943 - 17 febrewaori 2011) was nen revueskriewer, komiek, leedkesmaker en presentator, den as zien artiestennaamn Harm oet Riessen har. Zinn offisjeeln skeeldnaamn was aait Harm van Biesterwilmke, mear duurdet hee bekeand wör as Harm oet Riessen gebrok iederene den naam non.

Persoonlik[bewark | bronkode bewarken]

Agteresch greuidn op in t Tweantse Riesn en gung noa de legere skole hen woarken bie n textielfabriek in Almelo. Det was um niks weard en det har he rap wier bekekn. Hee volgen doarnoa ne opleaidege as stukadoor. Hee was etrouwd met Dinie, dee at in 2004 oet de tied is ekömn. Ze kreegn twee dochters en twee zöns. Ene van de dochters is direktrise van t kulturele sentrum t Parkgebouw in Riesn. n Aander is nog aait drok vuur de Riessense Revue.

Harm köm in zinne jeugnd völle bie skriewer Koarel van n Notoaris oawer de vloere. Den gavn um muzieklesn en nöm um met op reaize duur heel Europa, in zinne keukelkoare. Hee leardn zikzelf tapdaansen, keunstflöaitn, joekelille en banjo spöln en verdeenn in Paries de ceantn met keunstskildern.

Juli 2010 wör duur de dokters longkaanker bie Harm eveundn. Hee nöm ne nieje chemobehaandeling, den't good oetpakn, mer t was al bekeand at hee op de leste bene leup. Zin nieje vrindin Gree dee um met alns begeleaidn. Zelf zea hee: "Ik hebbe n mooi leawn ehad."[1]

Op 17 februwoari köm Harm oet de tied. Op zinne groowe kömn völle bekeandn oet de Oaweriesselse en Neerlaandse artiestnwearld.

Loopbaan[bewark | bronkode bewarken]

Met zin eerste leedke, Kruus van de koo (1975), kreeg he laandelike bekeandheaid op radio en tv. Zin radioprogramma op de zoaterdagemoarn biej n Oaveriesselsen zeander Radio Oost heetn Harms Farms. t Programma besteund veerntwentig joar en dr köm völle piratenmeziek in an bod. Op TV Oost, woer at he meansken interviewn, is he vake te zeen op ne fietse met ne plaante achterop.

Agteresch was ook eene van de initiatiefnemmers van de Riessense Revue, woer at he töt op t leste vuur skreef en regisseerwoark vuur dee.

In 2007 hef-e t bekeande opera-stuk De Barbier van Sevilla umme zat noar t Riesns, met nen komiesn dreei dr an: n Skearbaas van Riesn. Toew TV Oost um vreug woerumme, zear-e: "Ik verveeldn mie."

Disn vuurstelling was alle dree de oawnde oetverkocht. Hiervuur brachn he verskeaidene toneelgroepn oet Riesn, Eanter en Hooltn biej mekoar, met muzikale oonderstönnige van n Riesnsen bloaskapel De Kamgoarn Klösse. In 2008 köm he met n niej stuk, wat ook wier ne umzetting was van nen bekeandn opera: Tsaar & Timmerman. Hiervuur wör de umgewing van de Pelmölle an de Regge an epast.

Hee skreef ook alle wekke vuur t Riesns Niejsblad n komies stukn oonder de titel Harm's Proat. De leu konn um dan beln of skriewn as dr zik wat grappigs of biezeunders vuur edoan har met kunnigheid. Doar maakn Harm dan n grappig verhaaltjen umhen, woerbie as he vake n naam en skeeldnaam van dee leu neumn.

Harm kreeg de leste joarn mangs wat anmoarkings te heurn. Zo wör dr van um ezeg det he gin good Riesns mear deed. Det kan as reedn hebn det he vuur n regionaaln zeander woarken, aandern meann at he zin hoesnommer har vergetn.

Harm was te zeen in de veerde riege van de populaire Tweantse regiosoap Van Jonge Leu en Oale Groond (vanof 2008). Det deed he oonder de vuurwearde det he Riesns moch kuiern. Hee spöln nen Riesnsen boer den as Lansink het.

Op zoaterdag 10 april 2010 skeaidn der Harm noa 24,5 joar met oet met zin programma Harm's Farms op RTV Oost. Hee wol de 25 joar nit volmaakn. Op zin ofskeaidsfeest deedn verskeaidene bekeande ärtieste optreedn, zo as Henk Wijngaard en Ben Steneker.

Plaoten[bewark | bronkode bewarken]

MC:

  • Met ne glimlach (Telstar TMC 20070, 1980)

LP's:

  • Loat mie méér joekelul'n (Telstar TSP 16960, 1980)
  • I am ben een Kentucky Tukker (Telstar TAR 19989, 1981)
  • Met ne glimlach (Telstar TAR 19007, 1982)
  • One man show: he, he, foei, foei (Telstar TLP 19076, 1985)

LP's samen mit aandern:

  • Twente Plat 5 (Ivory Tower ITL 25.138, 198?)

CD's:

  • Bloote beene stoete met sjem (Dukarec, DMPCD 1992.003, 1992)
  • Harm oet Riessen (Ivory Tower ITD 20.127, 199?)
  • Zin en onzin (Ivory Tower ITD 20.163, 2000)

CD's samen met aandern:

  • Bie Dinkel en Regge, deel 1 (Ekkelboom Music EMCD 94010, 1994)
  • De daverende 13 Carnaval (+ 4 extra) (1995)
  • Luuster leedjes (Latent, 98 10048, 1998)

Bronnen en reffereansies[bewark | bronkode bewarken]

Stokkien op de webstee Streektaalmuziek in Nederland
Stokkien op de webstee van RTV Oost

  1. RTV Oost - Harm oet Riessen heeft longkanker. 4 Augustus 2010

Oetgoande verbeendige[bewark | bronkode bewarken]

Disse bladziede is eskreeuwn in t Riesns