Dialekt
n Dialekt is n regionoale toalvörm mit zien aigen uutsproak, woordenschat, en grammoatikoa. Dialecten binnen voak dail van n continuüm woar naastliggende varianten veul op mekoar lieken. Elke toalvörm dij deur n groep mensen proat wordt, is in principe n dialekt, en voak wordt n dialekt pas n toal nuimd as t n zekere moate van officieelhaid het. In de volksmond worden voak allinneg dialekten dij dizze stoatus van toal nait hebben dialekt nuimd, en gaait t perspectief din ook om hou de dialecten ofwieken van t "verheven" dialect dat as standoard en as "echte toal" zain wordt. Wèl dij denkwieze volgt, kin bieveurbeeld t Amsterdaams en t Volendaams dialekten van t Nederlands nuimen, terwiel t Standoardnederlands in wezen ook ain van de Hollandse dialekten is. Veul sprekers van t Nedersaksisch verwiezen noar heur Plat as n dialekt, ondanks dat de Nederlandse stoat t Nedersaksisch in de joaren '90 as ain van de officiële Streektoalen erkend het. t Zulfde geldt ook veur t Limbörgs.
Je kinnen dus ook zunder n verheven standoardtoal ook noar dialecten verwiezen, bieveurbeeld Nedersaksische dialecten, Westfeelse dialecten, Drentse dialecten, enzowieder enzovoorts, mor n specifieke variant van t Nedersaksisch n dialect van t Nederlands nuimen, klopt nait. Wèl n woord zuikt zunder de ainegszins negatieve bieklaank van "nait-standoard" en "òfwiekend" dij t woord dialect het, kint woord variant of toalvariant bruken. Dij term is neutroaler en wordt deur toalkundegen ook veul bruukt.