Deusien (buurtschop)
Deusien (Nederlaans: Doosje) is een buurtschop in de gemiente Stienwiekerlaand, in de Nederlaanse perveensie Overiessel. De buurtschop lig in de Kop van Overiessel ten zuudwesten van Möppelt laangs de perveensiaole weg N375 (plaetselik bekend as de Zomerdiek) an de noordkaante van et Möppelerdiep. Et Möppelerdiep vormt hier de greenze tussen Overiessel en Drenthe.
Deusien telt een haandvol huzen mit een stok of vieftien inwoners. De buurtschop vaalt, ok veur postadressen, onder et dorp Wannepervene.
Geschiedenis
[bewark | bronkode bewarken]In de volkstelling van 1840 wodden de buurtschop betiteld as Zomerdijk, naor de ligging an de Zomerdiek. Uut 1867 stamt de vermelding Doosje, en uut 1899 Het Doosje. Et punt waor de buurtschop lig, daor waor de Haagjesgracht uutkomp in et Möppelerdiep, was vrogger een schutsluus waor schutgeld ind wodden. Ok waren der een brogge, een kefee of harbarg, en een tolhuus mit slagboom over de weg Möppelt-De Sluus.
Tot en mit 1972 heurde Deusien bi'j de gemiente Wannepervene. In 1973 gonk de buurtschop over op de gemiente Brederwiede, en in 2001 op de gemiente Stienwiek, in 2003 herdeupt tot Stienwiekerlaand.
Naeme
[bewark | bronkode bewarken]Op olde kaorten komp bi'j de as Doosje bekende uutwaetering de naeme De Hoosjes veur. Omdat in de streektael van de omgeving de letter h vaeke niet uutespreuken wodt, kan hier de vorm Doosje uut ontstaone wezen. Volgens een aandere lezing zol de inning van et schutgeld niet, zoas gebrukelik, mit een klompe an een touw of hangel gebeurd hebben, mor mit een kartonnen deuze. Een darde meugelikheid is dat 'deuze' op homzels al een anduding was veur een sluus(ien).[1]
De familienaeme Doosje, die aj veural vienden in Wannepervene, De Sluus en Losser, komp oorspronkelik uut disse omgeving.
Verwiezings
[bewark | bronkode bewarken]
 | Plaatsen in de gemiente Stienwiekerlaand |  | ||||||||||||
|---|---|---|---|---|---|---|---|---|---|---|---|---|---|---|
Oaveriessel · Steden en dörpen in Oaveriessel Nederlaand · Previncies · Gemientes | ||||||||||||||
|
Dit stok is eschreven in et Stellingwarfs van Stienwiekerlaand. |