Trechterbeakerkultuur

Gebeed up de kaarte van Europa wåras trechterbeakers evünden sint

De Trechterbeakerkultuur (TBK) is ne döär archeologen benöömde samenleaving in midden-noordeuropa, dee tüsken 4300 un 2800 vK bestünd, tüsken de rivyren Elve un Vistula. In disse grupe wörden landbouw un veyholderye steyds vöärnamer üm an eaten to kummen. Se sint enöömd når de wyse wårup as se öäre pötte bakken deaden: med nen taps uutloupenden rand. Se warren ne döäruntwikkeling van under meyr de swifterbantkultuur, dee de eyrste neadersettingen stichtden an byvöärbeald de Vechte in Oaveryssel.

Up kleinere skåle warren der wal wat verskillen. Geleyrden verdeylet et gebeed dan ouk når de veer windstreaken: noord, oust, west un süüdmidden.

Geskedenisse

De TBK unstünd argens in et noorden van wat rechtevoord Düütskland is, rund 4100 vK. Archeologiske vündste låtet vermoden dat et begünde do as lüde van de michelsbergkultuur (Midden-Europa) når et noorden hen tröäken. Dee kümmen oorsprungelik uut Spanje un Frankryk, un warren dår up öäre böärde weader afstammelingen van volker van de Balkan. Genetisk undersöök wist dat uut.

Do as et eynmål stünd, verspreidden de TBK sik rap oaver südelik Skandinavie un Polen. Dat likt stark estüürde kolonisaty eweasd to weasen. In südelik Skandinavie verdrüng et de ertebøllekultuur, dee as noch altyd in de steyntyd leavden, selvs do as landbouw al 1500 jår in Europa bestünd. Michelsberggrupen koloniseerden underwyl de britske eilanden. De beide geböärdenissen valt sou lyk samen dat vöäle geleyrden meynet dat et wat med mekander to maken hevt.

Vöäral in Skandinavie låtet menskelike resten up verskeidene steades verskillende genetiske verwantskop med jager-gadderaars seen. Dat gevt an dat de volker der geleidelik et gat by in draiden. Vanuut Skandinavie begünden lüde in de latere steyntyd weader meyr når et süden to trekken. Ouk in middeneuropa wördt vanaf dee tyd meyr genetisk bewys van jager-gadderaars evünden. Vündste låtet ouk seen dat et neet altyd sachtsinnig güng.

Vro in et darde millenium vöär Kristus nemt de touwbeakerkultuur et voordan meyr oaver. Vanaf dee tyd vindet archeologen ouk voordan meyr verdeadigingswarken med püntige pöäle in TBK-gebeed. Teagen 2650 vK was disse oavername aferunded. Genetisk undersöök wist uut dat de kearls de vrouwlüde van de trechterbeakerkultuur oavernöämen un ouk öäre douden in de graven van de TBK leaden.

Kenmarken

Hüse

By et drentske Börger is en huus uut disse tyd nåmaked.

De meyste hüse van de trechterbeakerkultuur warren 12 by 6 meter. De leymene müren rund en hölten geraamde hölden ne retene kappe in de höygde. By Olszanitsa is en langhuus evünden med döären van 2,2 meter breyd, möägelik üm der ne wagen binnen te künnen ryden. Et bouwwark was 40 meter lange med 3 döären.

Ekonomy

De trechterbeakerkultuur must et hebben van et holden van etämde deers, sou as sköäpe, beeste, biggen un sikke. Dårnöäst wör ouk ejaagd un evisked. Se deaden ouk wal grån verbouwen, mär dat pütten de grund uut wårdöär de neadersettingen regelmåtig yts versköäven. Rund Malmö deaden se ouk an mynbouw un in de bargen by Świętokrzyskie wör vöäle flintsteyn egadderd. Dat wör verhandeld når under andere et skandinaviske achterland. Uut Silesie haalden se koaper, med name vöär knyve un aksen.

Technology

De trechterbeakerkultuur leyvert et öldste bewys vöär kennis van et rad in Middeneuropa. Up nen pot uut et poolske Bronocice (dateerd tüsken 3636 un 3373 vK) is ne teykening van ne kåre med oaverkapping ekrasd. Ossens musten se trekken, un oaverblyvselen der van sint in den pot evünden.

By Flintbeake in Noorddüütskland sint under en hünebed karrespoors evünden uut de prehistory, et vrogste rechtstreykse bewys up de wearld vöär voortüge med raden.

Grave

De meyste vündste van hüse ligget rund groute grave of hünebedden, wat angevt dat et ne groute rulle spölden in et dagelikse leaven. In alle streaken hadden se weader andere wysen van begraeven, mär allemåle deaden se de douden under de grund maken of in en grout grav. Vake warren dat dolmen of ganggrave.