Balkan
De Balkan is ne streake in et süüdousten van Europa. Wat der precys wal en neet by höyrt, hangt af van wee a'j et vråget. De name kümt van de Balkanbargen dee as döär heyl Bulgarye loupet. In et noordwesten ligt de Balkan an de Adriatiske Sey, an de Ioniske Sey in et süüdwesten, de Aegeiske Sey in et süden, de Türkske Stråt in et ousten un de Swarte Sey in et noordousten. De noordelike grense is et meyste verskel oaver. Et höygste punt is den barg Musala med 2925 meter, in et bulgaarske Rilagebargde.
Vake wordet de volgende landen as Balkanståten anerekkend: Albanie, Bosnie en Herzegovina, Bulgarye, Kroatie, Grekenland, Kosovo, Montenegro, Noordmacedonie, Rumenie, Servie en Slovenie. De oppervlakde wördt vake skattet as 666.700 km2. Der wounet sou'n 60 miljoon lüde. Wat deylen van Italie ligget technisk bekeaken ouk up de Balkan, mär dat land wördt neet medereakend.
Et idee vöär nen Balkanstreake küm van den düütsken geograaf August Zeune in 1801. Hee meynden (untorecht) at de Balkanbargen de vöärnaamste bargkeatene van Süüdoust Europa warren. Dee löypen van de Adriatiske Sey töt de Swarte Sey. In de 19. eywe was de term Balkanskiereiland synonym vöär Rumelie, de europääske provincys van et Ottomaanske Ryk. Et was vöärnamelik ne politike indeyling un neet sou seyr geografisk. Dat wör noch verstarked döär de stichting van et Yugoslaviske Köäningryk vöärin de 20. eywe.
De natuurlike grensen van et Balkanskyreiland stemmet neet med den uutleg van et woord skyreiland. Geskeedkünnigen küret vake oaver de Balkan as ne streake. De term hevt nen slechten byklang ekreagen. Dårümme gebruket de geleyrden rechtevoord lever de name Süüdoust Europa.