Riest (revier)

De Riest ien Möppelt, vanof de stelling van de meule De Weert

De Riest (mangs: Rieste) is een reviertien det begunt ien 't now of-egraven hoogvene maank Slagharen en De Vaort. 't Meandert oaver 35 kilometer op Möppelt an, daoras 't uutmondt in 't Möppelerdiep. De Riest streumt an de noordkaante van 't oerstreumdal van de grotere revier de Vechte. De zudelijke grèenze maank de pervincies Drenthe en Oaveriessel volgt de Riest.

Veur Nederlaandse begrippen kuj 't uniek numen det de Riest nog zo stark meandert. Umdet de revier de grèenze van twei pervincies angef, bint d'r niet eerder as in de jaoren zeuventig serieuze plannen ekomen um de Riest te kanaliseren. Deur de veraandernde kiek op netuur en laandschop hebt ze det niet edaone.

Ecologie

't Riestdal, honderd töt viefhonderd mèter bried, böd een rieke voedingsbodem veur de eileuvers die heur opholdt op 't eileuverstation De Lokkeri'je, niet wied van de havezate de Havixhorst. Ok lèeft d'r dassen en vossen en gruit d'r bezundere bloemen, zoas noordse zegge, grote pimpernel, stief struusriet en 't zöldzame moeraskartelblad, det ze de orchidee van de Riest nuumt.

Riestenlaand

Brogge oaver 't Drèents-Oaveriesselse grèensreviertien de Riest, bi'j Haalfweg-De Wiek

't Laand bi'j de Riest nuumt ze 't Riestenlaand. Lucas Jonker zien Drèentstalige roman Harm Boerenlèven an de Riest (1939) en 't vervolg Harm, de boer van 't Hoogelaand (1939) speult daor.

De zanger Luuks Nijsingh van De Balk in Oaveriessel hef de Riest bezongen in 't nommer Riestenlaand.

De name van 't dörpien Old Averiest en de vroggere gemiente Averiest, now in de Oaveriesselse gemiente Hardenbarg, betiekent 'oaver de Riest'.

Citaot

Het begun was mar een gröppel en 't ende vlakbi'j Möppel, Riestenlaand

Waor in 't veurjaor bloemen bluien, grös en kruden weer gaot gruien, Riestenlaand

Laand van Lommert, Lokkeri'je, Rieverst, Pieperi'je, Riestenlaand

Holten schuren, boerderi'jen, zomerdagen, heuien, mi'jen, Riestenlaand

Uut Riestenlaand deur Luuks Nijsingh

Buten dizze webstee

• Landschap Overijssel oaver de Riest
• Vertellegies en filmpies oaver de duustere kaanten van 't Riestdal
• Radpadties langes de Riest

Commons: Riest (revier) - plaatjes, filmkes en/of gelüüdsbestanden.

Dit stok is eskreven in 't Zuudwest-Zuud-Drèents van de Drèents-Oaveriesselse grèensstreek.