Oeze Volk

Oeze Volk (vanof meert 2008: Oeze Volk / Maandewark) was een maondblad veur skrieveri'je in 't Drèents, det in 2016 opevolgd is deur tiedskrift Zinnig.

De ondertitel van Oeze Volk was sund 1992 Maondblad in de Drentse taol. 't Tiedskrift beud vertellegies, gedichten, boekbesprekings, ni'js uut Drenthe, infermaosie oaver wat of d'r in 't Drèents verskenen is en zo wieder. 't Was verlochtigd mit ofbieldings van dörpen, ambachten, de netuur en meer zokke treditionele onderwarpen. 't Blad hef altied leegdrumpelig en veur iederiene toegaankelijk ewest.

In meert 2007 is Oeze Volk mit 't centrum veur taol en letterkunde Stichting Drentse Taol en Stichting Het Drentse Boek samen egaon in 't Huus van de Taol. Dizze organisaotie hef in meert 2008 de deuren lös edaone in Beilen.

Geskiedenis

Oeze Volk wördden in 1956 op-ericht deur Hans Heyting, Gerrit Kuipers en Harm Werners (skoelname van Gerard Nijenhuis). De oprichting maakten diel uut van een meer algemiene oplèving van 't Nedersaksisch. End jaoren veertig begunden de Regionale Omroep Noord en Oost RONO mit een Drèentstalig radiopregramma en in 1953 was de Drentse Schrieverskring op-ericht. In de previncie wördden een netwark van 'correspondenten' bi'jien ezöcht, die ni'js anleverden en 't blad verspreidden. 't Blad mus jao een "breed achterlaand" hebben en "draogen worden deur oeze volk".

Skrievers van de oldere ginneraoties (zoas Grietje Clewits, Lammert Braaksma en Harm Drent) asok jongere skrievers (zoas Roel Reijntjes, Janny Alberts-Hofman en Gré Seidell-Broekhuizen) vunden in 't blad heur stee. Stokkies oaver 't Drèents bint bi'jedragen deur Jan Naarding (die as raodgever an 't blad verbunden was), Geert Kocks, Henk Hadderingh en zien va Bart Veenstra.

In 1976 wun Oeze Volk de Culturele Pries van Drenthe. Bi'j 't viefendartigjaorig bestaon in 1991 hebt ze een jubileumboek uutegeven, Oes eigen taol, gedichten en verhaolen.

Betiekenisse

Oeze Volk kuj haoste niet lös ziene van de emancipatie van de streektaal en -cultuur. 't Oaverzichtswark Drèentse Schrieverij skrif:

"Achternao kuj allerhaande bezwaoren hebben, de opzet te breed vinden, te algemien, maor dizze opzet har wel ien groot veurdiel: 't Drèents weur propaganda veur maokt. 'n Taolbeweging die aaid maor klein west har, weur tot 'n brede stroming in Drenthe. Zu'n beweging kan nooit zuver literair wezen. Mèensen die as graog luusterden naor de Drèentse verhaolen van Radio Noord, vunden in Oeze Volk de naomen weer van de schrievers die het gezicht van dat programma bepaolden. En die schrievers gungen 's aovends op pad, niet allent um heur wark heuren te laoten, maor veural begrip te kweken veur 't belang van de taol."

Webstee

• Oeze Volk

Dit stok is eskreven in 't Zuudwest-Zuud-Drèents van de Drèents-Oaveriesselse grèensstreek.