Lammert Braaksma
Lammert Braaksma (Vrees, 1891 - Assen, 1963) was een Drèentse onderwiezer en schriever.
Onderwiezeri'je
[bewark | bronkode bewarken]Lammert zien moe was onderwiezeres. Hi'j gunk in 1906 op 'e Riekskweekschoele in Grunning. Daor kreeg e les van de bekende schrievers L. Leopold en H. Scheepstra. Akten die as e behaalden waren Fraans, haandtieken en middelbaor schoonschrieben. Mit zien collega A.C. Sperna Weiland gaf e tiekenveurbielden uut die verschenen onder de titel Teken prettig.
Braaksma was onderwiezer op Runerwold (1910), Fransum (1914-1920; onderbreuken deur twei jaor mobilisaosie) en Leerms, en was vanof 1929 schoeleheufd in Assen. 't Oaverzichtswark Scheupers van de taol (kiekt bi'j de Bronnen) nuumt hum een onderwiesverni'jer.
Cultureel wark
[bewark | bronkode bewarken]Mit Jan Naarding trad Braaksma op veur de RON (Regionaole Omroep Noord). Hi'j was lid van de Drentsche Studiekring D.H. van der Scheer (veurloper van Het Drents Genootschap, Culturele Raad voor Drenthe) en dreug bi'j an de in 1945 uutekomen dichtbundel In Seymour Mulder's voetspoor..., daoras de titel van wis naor de neengtiende-ieuwse dichter Willem Seymour Mulder.
As dichter in 't Noordenvelds har Braaksma ienige bekendheid. Hi'j schreef geleengheidsgedichten en leverden in de leste jaoren van zien leben riegelmaotig bi'j an de (Provinciale) Drentse en Asser Courant. An de Nieuwe Drentsche Volksalmanak dreug hi'j een köppel olde volksoaverleverings in dichtvörm bi'j. Gedichten en vertellegies van hum verschenen wieder in 't maondblad Drenthe, 't karkekraantien veur Oring, Oeze Volk en een antal bloemlezings. In 1991 verzamelden Peter van der Velde zien wark in Aovendlicht. Verhaolen en gedichten uut het Noordenveld.
Braaksma interesseerden hum veur de prehistorie en was lid van de ofdieling Assen van de Natuurhistorische Vereniging en de Drents Prehistorische Vereniging. Hi'j gadderden zölf prehistorische urnen en bielen.
Citaot
[bewark | bronkode bewarken]- Zie zwieren en slieren
- En gieren en tieren
- Omtrent onzichtbaor veur 't oog.
- Zie zweven en zweien
- En zuien en weien
- As trillende bladties omhoog.
- Zie vleren en scheren
- Met glaanzende veren
- En trekken maor aal boog om boog.
Uut 'Gierzwalvies', in: Scheupers van de taol (kiekt bi'j de Bronnen)
Bronnen
[bewark | bronkode bewarken]- Rouke Broersma (red.) (2003). Scheupers van de taol: Bloemlezing van de Drèentse Schrieverij 1837-2003. Zuudwolde: Het Drentse Boek. Blz. 52-53.
- Encyclopedie Drenthe Online
|
Dit stok is eskreven in 't Zuudwest-Zuud-Drèents van de Drèents-Oaveriesselse grèensstreek. |