Roel Reijntjes

Uut Wikipedia, de vrye encyklopedy

Roel Reijntjes (Beilen, 1923 - Beilen, 2003) was een Drèentse dichter.

Reijntjes zien va was directeur van de elektriciteitscentraole, commandant van de braandweer en veurzitter van de voetbalveriening. Zie moe was van caféholdersvolk uut Börk. Van kiend of was hi'j een ienling; ien kleraozie en gedrag aans as zien dörpsgenoten.

Töt 1972 was Reijntjes belastingambtenaor. Daornao leefden hi'j van de schrieveri'je en van Drèentstalige onemanshows deur 't hiele laand. Deur dizze shows, radio- en tillevisie-optredens en openhartige vraoggesprekken wördden hi'j Drenthes bekendste schriever, ok buten de pervincie. Ien zien gedichten hef e hum hiel persoonlijk uutedrokt, beveurbeeld oaver zien liefde veur jonges.

Reijntjes hef zien hiele leben ien 't olderlijk huus ewoond. De bloemlezing van Drèentse schrieveri'je Scheupers van de taol (kiekt bi'j 'Bronnen') is op-edreugen an zien naogedachtenis en hef as motto twiej strofes van zien gedicht En heb ik het er dan toe daon:

En heb ik het er dan toe daon,
het Leven zölf zal wieder gaon.

Och, bleef van mij ien klein gedicht,
wat regels, ien gedachte licht -
dan heb ik niet vergeefs bestaon.

Reijntjes schreef veur de Regionale Omroep Noord en Oost (RONO). Zien literaire waark stund veur 't eerst ien Oeze Volk (1956). Later publiceerden hi'j ok ien Roet. Roet wi'jdden een themanummer an hum (jaorgaank 1996/97).

Roel Reijntjes hef veule schrievers an-ezet um ien 't Drèents te schrieven, en is verscheiden malen ebloemleesd. Ien 1977 kreeg e de Culturele Pries van Drenthe.

Kört nao zien hengaon bint zien bibletheek en persoonlijk archief under ebrocht bi'j Stichting Het Drentse Boek op Zuudwolde. In 2004 bint ze naor 't Drents Archief in Assen verhuusd, daoras ze ze toegaankelijk maakt veur 't publiek.

Uutegeben waark[bewark | bronkode bewarken]

  • De Iegelkaor (1959)
  • De speulman (1961)
  • Het wollegres (1965)
  • Kleine Drentse reize (1975)
  • Al wat ik zag (1978)
  • Veur later (deur Hans Heyting bi'j menare ezöchte gedichten, 1983)
  • Zeefdruk (1987)
  • Mien liefste, ach, wat is met mij (1993)
  • Late brummelpluk (bloemlezing van eerdere gedichten mit ni'j waark, 2002)
  • Jonggien an de Beilerstroom. Een schrieverspetret, veurzien van een bibliografie (red. Henk Nijkeuter, 2010)
  • Ik heb nooit het vol geluk verwacht. Alle in boekvorm publiceerde gedichten van Reijntjes (red. Henk Nijkeuter, 2010)
  • Een aander leven. Een keuze uut de verhalen van Reijntjes (red. Henk Nijkeuter, 2010)

Bronnen[bewark | bronkode bewarken]

  • Broersma, Rouke (red.) (2003), Scheupers van de taol: Bloemlezing van de Drèentse Schrieverij 1837-2003, Zuudwolde: Het Drentse Boek
Dit stok is eskreven in 't Zuudwest-Zuud-Drèents van de Drèents-Oaveriesselse grèensstreek.