Drumkorps

Beatrix' Drum & Bugle Corps oet Hilversum tiedns de Europese Finales van 2007

de Cavaliers Drum & Bugle Corps oet Rosemont, Illinois tiedns de wearldfinales van 2004

n Drum & Bugle Corps (meestieds of ekortt tot Drumkorps) is nen groep marsjeernde muzikaantn (te vergeliekn met nen showband) den at besteet oet kopperbloazers, slagwoarkers en colorguard.
Disse bands beent t bekeandst en meest verspreaid in Amerika en Kannada, mear t is ook oawer eweeid noar (deeln van) Europa en Azië.
Drumkorpsn beent organisasies dee at neet oet beent op finansjele weenst. Ze doot met an wedstriedn, optochn, festivals en aandere publieke angeleagnheedn. Vuur de Amerikaanse topkorpsn is dr, ofhaankelik van n boond woer at ze lid van beent, ne leaftiedsbeteuning, woerduur de leedn aait tusken de 14 - 22 joar mut wean, mear aandere boondn loatt ook junger en eulder too. Boetn Amerika is dr gin leaftiedbeteuning.

Westriedkorpsn doot zommerdaagns met in toern duur Amerika, laanks alle grote drumkorpswedstriedn. Wedstriedn wordt eheuldn op Amerikaanse voetbalveeldn, en wordt beoordeeld op t Algehele Plaatjen (General Effect), Visuele Oetvoerige (Visual Performance) en Muzikale Oetvoerige (Musical Performance), woervuur n antal peuntn wörd toobedeeld, en dee at met mekoar dan t totale peuntnantal bepoalt.

De korpsn studeert alle joarn in de zommermoandn ne nieje show in, den at tusken de 8 en 12 minuutn doert, en den at ze gedoernde t zommerseizoen verbettert en anskoarpt. Zonnen kleainn show hef as vuurdeel det de leedn mear tied en kaans hebt um zwöardere dinge an te learn, woerduur t geheel oetlöp op ne topprestasie, met t heugtepeunt in de finalewekke, an t eande van t seizoen. Zovölle tied is ook wal neudig, want aanders redt ze t neet op zon hoog nivo. Verskeaidene korpsn hebt verskeaidene muziekstieln an enömn tot öar haandelsmoark, en aandern doot alle joarn wat aanders. Geleefde stieln beent symfonies, jazz / big band, popmuziek, muziek van bekeande theaterstukke, en Latiens-Amerikaans.
Korpsn dee at slim völle an wedstriedn doot, beent vake wal 8 tot 10 wekke op toer, woerbie tot wal 12 uur op n dag oefenn gin apartigheaid is. Aandere korpsn loatt de leedn wat mear vriej um ook boetn drumkorps wat vrieje tied te hebn. Ook beent dr nog korpsn dee at helemoal neet an wedstriedn met doot, umdet ze as doel hebt mear n soort van muziekskole vuur de jeugnd te wean, of as leefhebberieje vuur oold-topkorpsleedn.

Geskiedenisse

Drum en Bugle korpsn beent ontstoan oet de Amerikaanse militaire geskiedenisse, aanders dan aandere marsjeernde muziekkorpssoortn. Kort noa n Eerstn Wearldoorlog tot noa 1970, wördn korpsn aait bekostigd duur de VFW en t Amerikaanse Legioen (beaide Amerikaanse veteraannboondn). Hierumme eesken disse bekostigers det t n militairn groondslag har. Zo um en noabie de joarn '60, woln völ korpsn mear kreatieve vrieheaid en bettere kostndekking van öare sponsors. Aandern veundn det t priezngeeld det ze oet wedstriedn kreegn, zo weinig was det t feailik de möaite neet was um nog met te doon. Doar köm nog bie det ze veundn det de toewmoalige maneern van beoordeeln de kreatieve en muzikale meugelikheedn dee indamn. Op t heugtepeunt van t toewmoalige drumkorpsgebuurn (mear as doezend korpsn oawer heel Amerika) besleutn n antal korpsn met mekoar nen eegn boond op te richtn, wat oetköm op t in leawn roopn van de Drum Corps Associates (drumkorpsgenootn) in 1965 en Drum Corps International in 1972. Um dee tied warn völle korpsn öare bekostigers al kwiet.

De korpsn dee at oawer bleewn, mosn vearder van hoes um bie t daalnde antal wedstriedn bie te wean, wat nog zwöarder was vuur öare kas en tied, en vuur öare leedn persoonlik. Tegeliekertied wördn de kostn vuur de veeldshows al heuger umdet doar mear andacht vuur köm, en doarbie wör de vroage noar bettere lesn en kreatieve inbreng zo hoge det völ wedstriedskorpsn op t gat kömn. In 1990 warn dr nog mear n poar van de eerste oolde drumkorpsn oawer, mear oonderwiel warn dr wal nen hoop niejn bie ekömn, dee at t rechtevoort nog aait good doot.

Ook de tradisjonele, neet-wedstriedgerichte korpsn (mangs verkeerd "alumnikorps" eneumd) maakn nen duurstart in de joarn '80, en beent nog aait goans. Disse korpsn beent onmeundig wies met t in eare hooldn van tradisies, en doot met opzet neet met an moderne verniejiges.

Umdet ze zik neet mear an de oolde richtlienn van de 60er joarn hoowdn te hooldn, begunn de korpsn nieje bedeanksels too te pasn, zo as t gebroek van bloasinstrumeantn (horns) met meardere ventieln, oeteenloopnde snelheedn in muziek, neet makkelik te maakn showvörme, oetgebreaidere kostuums van de vlagnmeaks (ook wal bekeand as kluurnwacht of Engels: color guard), en t gebroek van stilstoand orkestslagwoark. Sommige leu meant det drumcorps de leste tied te völle op nen marching band lik, terwiel at dee beaide geliek op beent egoan in de ontwikkeling. t Grötste verskil zit um in de woarheaid det drumkorps allene bloasinstrumeantn met n beker noar vuurtn hebt. Ook is t belangriekste seizoen vuur drumkorps in t zommer, met de eerste oefendoatums al in oktober van t vurige joar, terwiel at t seizoen van n marching band in t noajoar is. t Programma (show en muziek) van topkorpsn is meestieds völle moeiliker as det van marching bands, umdet leedn van drumkorps niks doot boetn t korps, en vake duur nen slim zwoarn selektieserie goat (audities).

In noavolging van Amerika hebt de leste tientaln joarn völle Europese laandn nen eegnen drumkorpsboond op erichet. Ene van de eerstn was de DCH (Drum Corps Hollaand), den at duur weainig belangstellige oeteandelik ontbeundn wör. Later köm hier DCN (Drum Corps Nederland) vuur terugge, den at, duur de tooname in belangstellige vuur drumkorps, wal succesvol was. Oonderwiel warn dr ook boondn ekömn in Duutslaand (DCG), Engelaand (DCUK en BYBA), Fraankriek (DCF), Zweedn en Italië. Noa oawerleg wör beslötn um vuur al disse verskeaidene boondn nen oawerkoepelnden boond in te steln; de DCE (Drum Corps Europe).

Muziek

muzieklieste

Ne show dreeit meesttieds um één stiel of thema, of dut verskeaidene duur mekoar. De meeste topkorpsn beent dr döanig organiseerd in ewördn, en hebt meesttieds neet n poar lösse nommers achter mekaander, mear loatt alns an mekoar skriewn duur spesjaal in ehuurde meziekskriewers, woerbie t thema, t verhaal achter de muziek, ne grote rolle spölt.
Vake, en vuural as t korps muziek van klassieke skrievers gebrok, wörd dr vuur ekeuzn um juust meardere woarkn van den persoon te gebroekn as thema. De leste joarn wörd t al gebroekeliker vuur korpsn um totaal nieje muziek spesjaal vuur t korps te loatn skriewn.

Wat opbouw angeet hebt alle shows n zelfde verloop: eerst keump n Lösmaker (n opener). Dit is t eerste nommer van de show en is bedoold um n andacht van t volk te trekn. Doarnoa is t korps vrie um te kiezn wodöanig of ze t vearder doot, mear dr beent wal veardere vaste peuntn. Vake is dr in ne show wal ne ballade te veendn as röstpeunt, en aandere ellemeantn dee at n korps as kenmoark hebt. Dit haank of van wolange of n stuk doert. Ook heurt hier de "teunmomeantn" (solo's of features) van verskeaidene oonderdeeln van t korps bie in. Doarnoa wörd ne show of eslötn met ne "Ofsloeting" (closer), wat t heugtepeunt van de show mut wean. t Doel is um op disse manere n oetbalanseerd programma te kriegn met n verskeaidn antal snelheedn in de muziek, momeantn um te loatn zeen wat t korps allemoal kan.

Sommige korpsn hebt aait n bepoaldn stiel as haandelsmoark; The Phantom Regiment hef aait anpassings van klassieke stukn, The Blue Devils doot aait met Jazz en The Madison Scouts doot aait met Latin.

Instrumeantn

Bloazers

Contra-riege van de Brigadiers Drum & Bugle Corps oet 2007

Ene van de meest kenmoarknde elemeantn an drumkorps is t gebroek van eankel bloasinstrumeantn met n beker noar vuurtn. Met de joarn is t drumkorpsgebuurn versköawn van recht ventielloze bugels, noar moderne bloasinstrumeantn met meardere ventieln. Hierduur beent de bugels van vroger neet mear neudig en in gin eankel drumkorps terugge te veendn. Tradisjoneel hadn drumkorpsn de instrumeantn in G-stemmige, mear rechtevoort magnt ze ook aandere stemmiges gebroekn. De bloasinstrumeantn dee at in drumkorps gebroekt wordt, beent, van hoge noar lege trompetn, mellofoons, baritons en/of eufoniums, en skoolderbasn (offisjeel Contrabasbugels, mear aait of ekortt tot contra).

Al disse instrumeantn köant in meardere stemmiges vuurkomn, mear de meest gebroekte beent G, Bb en F. Det is allemoal too estoan in drumkorps. Soprano's beent feailik trompetn, mear ze hebt nen wat smallerden beker en ne wat roemere oetboarige. De meeste korpsn beent oonderdoems oawer estapt op t gebroek van Bb instrumeantn, mear ze loatt de trompetn nog zo maakn det ze better beent vuur boetn, en det ze op soprano's liekt an vörm en geluud. Mellofoons wördn spesjaal oontwörpn vuur drumkorps, en noa völle prebeern bleek det ze better geskikt warn dan aandere vergeliekbere midln-register (of alt-toon) instrumeantn zo as n Fraanskn Hoorn of Flugelhoorn. Skoolderbasn beent feailik gewone tuba's, mear zo an epast, det n spöller um op n skoolder kan dreagn met n beker noar vuurtn.

Tot 1999 was t vuur drumkorpsn verplicht duur de DCI det alle instrumeantn in G-stemmige steundn. In det joar nöm t DCI-besteur n vuurstel an um ook aandere stemmiges too te loatn, zoonder det doar aandere instrumeantn vuur in de plaatse kömn (Dus ginne skoeftrompetn of aandere instrumeantn woer at gin ventielken an zit). Vanof 2000 gung n regel in. In 2004 köm DCA ook met. Hierduur kon bestoande (mangs klassieke) meziek dichter bie de oorsproonkelike meziek umme eskreewn en an epast wordn, en kreegn korpsn de kaans um goodkeuper an (bettere) instrumeantn te komn en de meugelikheaid um de instrumeantn makkeliker duur te verkoopn (boetn drumkorps umme, umdet det ne völle gröttere ofzetmoarkt is). De bloasinstrumeantn van drumkorps stoat rechtevoort zowat allemoal in Bb-stemmige, met de Mellofoons in F.

slagwoark

De bassliene van de Cavaliers van 2006 doot repeteern

t Slagwoark besteet oet twee verskeaidene, mear eawnzo belangrieke oonderdeeln. t Frontwoark (front ensemble, meestieds "pit" eneumd) en de batterieje of tromnriege of -liene (drumline).

Frontwoark

t Frontwoark besteet oet orkestrale slagwoarkinstrumeantn, zo as marimba's, xylofoons, vibrafoons, kloknspel, paukn, verskeaidene tromn en biejinstrumeantn dee at de muziek oonderstönt, bekns en gongs. Duur de eerst eneumde instrumeantn wörd de pit mangs as grap ook wal tingelspul, -dinge of -woark eneumd. Duurdet dit soort instrumeantn vake te groot en te zwoar beent um met oawer n veeld te slepn, stoat ze op esteeld op de middelliene (50-yardliene), boetn t veeld, en kort bie t kiekvolk. Grote korpsn hebt 8 tot 12 man in t frontwoark stoan. Dr beent rechtevoort völle korpsn dee at verstoarkige in öar frontwoark gebroekt, um de fiene instrumeantn ook good te loatn heurn in grote stadions. Hieroawer wörd nog aait völle steggeld, woerbie de vroage is woer at de greanze lig, want dr beent ook korpsn dee at de verstoarkige gebreukn vuur stuks köjern, zingn, en zelfs Beatboxen.
Vuur 1982 hadn korpsn nog gin frontwoark. t Volk wat det soort instrumeantn bespeuldn leup met spesjale marsjeermarimba's met op t veeld. Aandere korpsn (zo as Phantom Regiment en Blue Devils) hadn nen eankeln pauknspöller vuuran op t veeld stoan. Vanof '82 wör det soort slagwoark vuuran, boetn t veeld ezat.

Batterieje

De batterieje, of tromnriege, besteet oet slagwoarkers dee at op t veeld metloopt in de show, saamn met de bloazers en colorguard. Meesttieds besteet ne batterieje oet 4 soortn instrumeantn: ne riege van kleaine tromn (snare drums), Tenoortromn (meesttieds "Tenors" eneumd, mear ook wal "quads" of "quints") en tonale Grote tromn dee at op verskilnde toonheugtes estemd beent. Mangs keump hier dan ook nog ne beknriege bie. De meeste korpsn hebt de beknriege dr achterhen edoan, zodet ze dee spöllers op aandere instrumeantn konn gebroekn. De beknrieges dee at nog wal bestoat, bedeankt vake de meest oetgebreaide visuele figuurn, dee at oawer de joarn kenmoarknd vuur öar korps beent ewördn. Wieters beent ze vake ne oonderskatte, mear belangrieke oonderstönnige vuur de muziek. De bekeandste Amerikaanse korpsn met beknrieges in de batterieje beent de Santa Clara Vanguard, de Madison Scouts en de Crossmen. n Europees bekeand korps det dr kortns zonne beknriege bie hef edoan is Jubal Drum and Bugle Corps oet Dordrecht.

Visueel programma

Colorguard

Colorguard van Beatrix'

Madison Scouts 2008. Korps van eankel kearls

Formasie oet t programma van de Oregon Crusaders 2008

De color guard of "guard"beent n onmisboar elemeant in de show en t verhaal achter de show van korpsn ewördn. Ze wordt in t plat wal "vlagnmeakns" eneumd, mear dr doot ook völle jongns an met. In Amerika beent twee korpsn (Cavaliers en Madison Scouts) dee at öar oorsproonk hebt in de padveenderieje. Dee hebt dus as regel det dr allene mear kearls in magnt, dus ook de vlagnmeakns beent kearls. Mear oawer t algemeen is t grötste deel wal vrouwe, vuural in Europa, umdet de meeste kearls zik doar te völle kearl veult.

De standaard oetröstige van de color guards beent vlagn (flags), (nep)gewearn (rifles) en zwearde (sables). Mangs komt hier nog aandere attribuutn bie, dee at de show oonderstönt, zo as metaalne stänge, hoepels, bälle, ezw.

t Belangriekste doel van de color guard is t oonderstönn en anvuln van de muziek duur t geveul van de muziek oet te beeldn in daans en t gebroek van de attribuutn. Wieter vult ze t gehele plaatjen an duur mangs deel oet te maakn van n showfiguur. Mear meesttieds mut de guard t plaatjen kluurig "umliestn", ook binn korpsformasies zelf. Net as aandere oonderdeeln van nen drumkorps, hef de guard ook regelmoatig momeantn um te loatn zeen wat ze köant.

Terwiel at korpsn zelf aait verskeaidene joarn achtereen t zelfde pak an hebt, beent de päkke van de colorguard ieder joar wier aanders, umdet ze wordt emaakt noar t verhaal van de show, den at vanzelf ieder seizoen wier aanders is.

Umdet dr boetn t zommerseizoen weainig te doon was binn t colorguardspul op topnivo, zeent ze in Amerika begunn met de winterguard. In t weenterseizoen doot ze reppeteern vuur spesjale colorguardwedstriedn. De finales zeent roond meart. Ook in Neerlaand wörd dit edoan; seend n antal joar he'j de Color Guard Nederland (CGN).

Showformasies

De showfiguurn (de drill) beent stoark oontwikkeld in de drumkorpswearld. De euldere formasies zo as bluks en aandere symetriese vörme wordt ja nog wal gebroekt vuur t effekt, mear beent vuur n groot deel vervöngn duur aparte figuurn en figuurontwikkelingn dee at bedacht beent met spesjale computerprogramma's vuur t skriewn van shows. Showskriewn is nen keunst op zich; zo wördt dr sekuur vuur ezorgd det bepoalde instrumeantgroepn aait bie mekoar stoat, en det leedn dee at nen solo hebt ook good oonder n andacht komt. Wieters mut de showskriewers dr acht op geewn det de showfiguurn de muziek oetbeeldt en oonderstönt, plus det t dr mooi oet mut zeen.

Op technies vlak köant shows opdeeld wordn in verskeaidene kattegeriejn: rechte lienn, statiese vörme, formasies van bestoande vörme, en vörme baseerd op beweaging. Vörme met rechte lienn of boagn wordt al lange broekt um nen show te maakn den't makkelik oet te voern is, mear dr toch good oetzut. De snelheaid van de show kan ofwisseld wordn um t ene moal ne laankzame vlöaindige beweaging te maakn, en t aandere moal ne riege van vlot dreeinde lienn of veraanderende boagn. Variasies op volg-oewn-vuurman-vörme (follow-the-leader) beent standaard vuur völle neet-symetriese vörme. Silhouetn en simbooln wordt ook völle broekt duur völ drumkorpsn, woervan de seempelste veerkaantn, blöks, dreeheuke, kringe, en aandere bekeande vörme beent. t Geleaidelik loatn veraandern, oawerloopn in aandere vörme, vuural op hoge snelheaid, is mooi um noar te kiekn. Ne grote geskiedenisse van verniejnde figuurn hebt de meugelikheedn vuur korpsn onmeundig groot emaakt. Bepoalde korpsn hebt bepoalde figuurn as "haandelsmoark". The Cadets oet 1983 kömn met n "Z-pull", woerbie n Z-figuur oet erekt wördt töt ne lange liene. Dit keump vuur in iedere nieje show van öar. Aandere vuurbeelde beent de verskienende en verdwienende kruusformasies van The Star of Indiana oet 1991, n "dreeinden" dubbeln spiraal van The Cavaliers oet 1995, n diamaantslieper: ofzeunderlik dreeinde veerkaantn in n grote roete van de Cavaliers oet 1999. Wieters beent dr nog völle "haandelsmoark"-simbooln, zo as t Maltese Kruus vuur The Crossmen, ne dreepeuntige krone vuur Carolina Crown en ne Fraanske lelie (symbool van de padveenderieje) vuur The Madison Scouts. Dit soort vörme wordt aait good ontvöngn duur t publiek. In Europa beent ze nog neet zo wied det ze zelf signatuurvörme an nemt, mear ze kiekt völle noar Amerikaanse korpsn, woervan at ze dan dinge oawernemt. Vörme dee at baseerd beent op vlotte beweagingn duur mekoar beent lastig te beskriewn, umdet ze alle kaantn op köant. n Vuurbeeld wat hiervan is de "bloemkoolformasie" (scatter drill), woerbie t korps in nen ondudeliken, onvasten vorm geet stoan, um t volk zo lange meugelik in t ongewisse te loatn.

Stille stoan lik vake t makkelikste dr of, mear vuur drumkorpsn beteeknt stille stoan meestieds nooit helemoal stille. Vake wörd nen vorm in de show op enömn op n vast peunt in de muziek wat zwoar is vuur de spöllers, zodet ze n kop eawn better bie de muziek köant hooldn. Dit wördt met verskeaidene termn eneumd, zo as "parkearn en plearn" (park and bark). t Korps blif dan op denzelfden stean, mear t spöllers doot kleaine stäpkes, beweagings, daanskes, zweein met t instrumeant, en aandere dinge dee at dr good oet zeet. Vuur de härtste en lengste akkoordn bliewt korpsn stille stoan, zodet ze mear krach köant zetn, zodet t better bie t publiek oawerkeump.

Marsjeertechniekn

Um zonnen zwoarn show an te könn, mut korpsn good op öare marsjeertechniekn letn. Ieder korps hef wier zinne eegne maneern van loopn, um zik te oonderskeaidn van aandere korpsn, zoas loopn met t been zo estrekt meugelik, of juust t buugn van t knee, de teenn aait recht noar vuurtn, of metgoan met t natuurlike buugn van n voot. Alle korpsn begint alle beweagings (of "loopt of") aait met n leenkervoot (behalve Cadets Drum & Bugle Corps, dee aait op rechts ofloopt). t Beginsel van marsjeern is n "roltrad" (roll step), woerbie leu aait eerst de hakke van n voot dale zett, ofrolt oawer n bal van n voot en oeteandelik op n tee oetkomt. t Maakt neet oet wat vuur kleaine verskiln dr beent tusken de korpsen, t streewn is aait um zo vlöaindig meugelik te loopn, zodet n toon bie t poesn in t instrumeant nit beïnvloodt wörd duur t booltern van t loopn. Zo kan dr echt mooi meziek maakt wordn op alle snelheedn, looprichtings en tradgrötte. Dit beteeknt det t loopn gin invlood mag hebn op t boawnlief van de spöllers. t Boawnlief mut aait stille wean en noar t publiek gericht wean, vuur n bestn geluudsoawerdracht, umdet de jury (en dus t publiek) aait an ene kaante van t veeld zit. Hiervuur köant bloazers t oonderlief in looprichting dreein, mear de batterieje kan det neet, umdet öare instrumeantn in de weg zitt. Hiervuur is n "kruuspas" (crab step) oet edokterd, woerbie de spöllers opzied köant loopn duur de bene kruuslings vuur mekoar hen de beweagn, zodet ze met n kop noar vuurtn opzied loopt (zo as krabn det ook doot). t Keump hoaste nooit vuur det bloazers en slagwoarkers t hele lief noar de looprichting dreeit, en as t wal gebuurt is t vuur visueel of muzikaal effekt. Umdet de colorguard allene metdoot vuur visuele oonderstönnige hoowt ze neet allene mear met t gezichte noar de vuurkaante te loopn, mear köant alle kaantn oet as det mut. Achteroet loopn gebuurt duur de hakn in de heugte te buurn en op de teenn te loopn, mear dr beent ook korpsn dee at n roltrad achterstevuurtn oetvoert op laankzame snelheedn. Colorguard, en mangs bloazers as ze ne onmeundige vlotte formatie mutn maakn, doot vake an "jazzrenn" (jazz run). Dit heult in det n tee de groond eerst raakt en dan de hakke dale keump.

Seizoen

Umdet optreedns en wedstriedn in de Amerikaanse divisies aait allene in de zommermoandn beent, begeent t vuurbereaidn op t volgende seizoen zo gaaw as t vurige is of elop. In Europa hebt de korpsn ook in aandere joargetiedn wal optreedns. Korpsn beent t hele joar duur wal drok. In de moandn vuur t eerste oefenkaamp doot de korpsn nieje leedn antrekn, t bestuur woarvn, muziek oetkiezn, nieje show skriewn, ezw.

Oefenkaampn

De Blue Stars doot repeteern in 2006

Vuur DCI topkorpsn is t seizoen akelig zwoar. De meeste korpsn begeent met kaampn op of noa Thanksgiving Day (n 4den doonderdag van november), en hebt alle moandn n kaamp an t eande van de wekke, gedoernde de weenter. Leu dee at lid weelt wordn komt letterlik van oawer de hele wearld um bie de kaampn van öare favoriete korpsn te wean. Lid wean van n topkorps geet in DCI neet vanzelf, mear de leedn mutn striedn um n pleatsken in t korps, en meestieds wörd det al gedoernde de eerste poar kaampn bepoald. Zo um de leantetied beent de leedn ekeuzn en dr wordt mear kaampn eheuldn te mear t zommertoerseizoen körter bie keump. De meeste topkorpsn verlangt van de leedn dee at neet oet de buurte komt, um tiedelik oonderdak kort bie de oefenstean van t korps te veendn (bie leedn dee at kort bie woont in t hoes, of löage sloapvertrekn) roond Memorial Day wekneande (n lestn moandag van mai). Vuur t grötste gedeelte van mai en vear tot in juni (an t eande van t skooljoar, as dr zowat gin les mear is) wörd r zowat alle dage oefend, zodat de leedn de leste stuks van de muziek en de show köant instudeern. Dit oefenn vuur t seizoen an doert 3 töt 4 wekke. t Keump geregeld vuur det leedn in disse tied 10 töt 14 uur daagns oefenn doot en det 6 of 7 dage in de wekke. Teegn t eande van juni goat de korpsn toern.

Vuur Amerikaanse korpsn vuur euldere leu is t verloop van t joar neet zo zwoar, umdet de meeste leu volwasn beent dee at daagns mutn woarkn en dus wal wat aanders te doon hebt as allene mear oefenn. De meeste korpsn oefent zoaterdaagns of zöandaagns en mangs 's oawnds duur de wekke. In plaatse van grote toern duur t hele laand goat disse korpsn meestieds allene in t wekneande vort en spölt in kleaindere wedstriedn. Neet-striedbere korpsn zo as tradisjonele drumkorpsn en alumnikorpsn (vuur leu dee at vroger in n topkorps hebt ezetn) hebt vake egee gin dudelik seizoen. Ze oefent en doot optreedn wonnear at t öar oetkeump. Mangs löt zon korps zik eawn zeen tusken de wedstriedn van de DCI en DCA topkorpsn duur.

In Europa en Azië geet det krek zo, doar beent ze neet zo drok met de korpsn. t Keump mangs vuur det n Europees korps met geet doon in de Amerikaanse wedstriedn, mear umdet ze de eesken van DCI topdivisies neet woar köant maakn (leaftiedsbeteuning, antal leedn), köant ze neet met doon op t heugste nivoo. Det de Amerikaanse korpsn alle joarn wier nieje leu köant veendn um met te doon, en aandere leu dee at te oold wordt dr oet köant doon, hef te maakn met t skoolstelsel van Amerika. Iedere skole hef doar zin eegnen skoolband. Doarumme is t vuur völle leu makkelik um den oawerstap te maakn. In Engelaand is dit ongevear geliek eregeld, doar hebt ze nen eegnen jeugndboond, de British Youth Band Association (BYBA). Mear umdet disse korpsn t zoer hebt, wörd r de leste joarn oawer eköjerd um de leaftiedsbeteuning dr achterhen te doon. Wieters beent r joarliks wal verskeaidene leu oet Europese of Aziatiese korpsn dee at n poging doot um too eloatn te wordn in zon korps, mear de meeste leu bedeankt zik eerst dree moal en hooldt de seantn in n tuk.

Ofdeeliges/klasses/Divisies

Amerika

Korpsn wordt in edeeld oawer verskeaidene klasses an de haande van t antal leedn, leaftied van de leedn en wovölle det ze met weelt doon an de toer. Disse verdelige is oawer de joarn veraanderd duur veraanderiges in treands en regels.

Töt an 1993 heuldn de verskeaidene Drumkorpsorganisasies wearldwied ongevear disse indelige an:

• Lösse Klasse. Hierin deedn de grote korpsn met dee at op de grote toer met goat.
• A-Klasse. Korpsn met meender leedn en meender zwoare toer.
• Cadet Klasse' (jeugndklasse). vuural jeugndleedn, meestieds oonder 14 joar. Disse korpsn zorgdn meesttieds vuur nieje leedn in de gröttere korpsn.

Disse indelige wör an epakt en herstruktureerd vuurdet t seizoen van 1993 zol beginn (en nog n moal in 2006), en wör gebroekt töt an 2007, woerduur toewmoals dit de indelige was:

• Ofdelige I: Töt an 135 leedn.
• Ofdelige II: Tusken 70 en 135 leedn.
• Ofdelige III: Töt an 79 leedn, woerbie de leedn vake öar eerste könnigheaid met Drumkorps kriegnt.

Dr was nen oawerlap van Ofdelige II en III, woerbie korpsn tusken van tusken de 70 en 79 leedn zelf kiezn konn of det ze in II of III metdeedn.

Op 23 september 2007 wör noa stemn van Ofdeliges II en III ne nieje indelige an enömn:

• Wearldklasse: Töt 150 leedn.
• Lösse klasse: 30 töt 150 leedn.

Korpsn oet de Lösse Klasse doot in meender wedstriedn (ongevear 20) met as de Wearldklasse (30 töt 35). Töt an t eande van de 90er joarn konn verskilnde korpsn oet verskilnde klasses toch bie mekoar in ne wedstried terechte komn, mear rechtevoort is dr ne dudelike afbakening van de beaide klasses. ze hebt beaide ofzeunderlike wearldkampioenskapn, mear dee at meestieds wal op dezelfde plaatse heuldn wordt. De Kwartfinales (Prelims) wordt eheuldn op deenksdag, de Halve Finales (semifinals) op doonderdag en de Grote Finale (Grand Finale) op zoaterdag. De deage tuskenduur köant de korpsn nog reppeteern.

Europa

t Drumkorpsgebuurn in Europa (wat vaalt oonder de DCE) besteet oet de oolde 3 ofdeliges:

• lösse klasse
• A-klasse
• Jeugndklasse

t Antal leedn is hierbie neet belangriek. t Haankt net of van wo hoge o'j oewzelf as korps inskatt en in wat vuur ne klasse a'j oewzelf indeelt.

Dr beent wal kleaine vuurweardn töt tooloatige töt de DCE kampieonskopn: A'j oew in weelt skriewn vuur de Lösse Klasse en in t vurige seizoen in de top 10 eaindigt beent, of in de Jeugndklasse in de top 3, kö'j zo wier metdoon. De wietere korpsn köant zik wal inskriewn, mear doarbie geet de organisasie kiekn noar de in t verleedn behaalde resultoatn, spreaidige per laand, en spreaidige per klasse. Wat korpsn kriegnt nen wildcard, dee köant dus op proef metdoon. De korpsn dee at zik inskriewt munn ook op zien meenst 1 moal metdoon met ne aandere DCE-wedstried.

Toer

Busse van de Santa Clara Vanguard

Terwiel at ze op toernee beent, reaizet de topkorpsn vuural 's nachtes noa n optreedn. De leedn sloapt in de busse, of in sloapzäkke van gymzaaln as ze op t volgende peunt van de toer komt. Oonderdak is vuurof eregeld vuur de hele toer, bie skooln, koarkn en aandere publieke gebouwn. De korpsn doot daagns zo lange meugelik oefenn vuur det ze op pad goat vuur nen wedstried 's oawnds, at den dr dan is. Neet alle daagn hebt ze wedstriedn, vake wördt nen dag ook besteed an reaizn oawer grote ofstaandn, of nen heeln dan vuur repeteern.

n Volledig korps wat good löp hef nen antal voartuugn, woeroonder dree busn vuur de leedn en t bestuur, ne vrachtwage vuur verkoopsmuk van t korps, wat bie wedstriedplaatsn verkoch wordt, en twee kleaine vrachtweagntjes, woervan at dr ene vuur de instrumeantn en show-toobeheurn is, en n aandern de köknvrachtwage (n kokwaagn) is. t Meeste etn wördt duur de kokwaagn verzörgd, mear mangs hef t korps nen vriejn dag woerop de leedn dr op oet magnt, en zelf etn kokt of koopt.

Mear de korpsn doot neet allene met an wedstriedn. Ze doot gedoernde t zommer ook met in optochtn, parades, en stilstoande optreedns um in de belangstellige te komn, en geeld vuur t korps te verdeenn an kaartjes vuur optreedns dee an t publiek verkocht wordt. Op n 4den juli goat de korpsn noar grote plaatsn, zodet ze an meardere parades op n dag met köant doon.

t Zommertoerskema wörd vake op edeeld in kleaindere toerkes. n Eerstn toer besteet oet t loopn van lokale of regionale shows, woernoa at de korpsn terugge goat noar de thoesbasis vuur makkelik oonderdak en oefenruumtes. n Eerstn toer eaindigt zo midln-juli met n reginaal kampioenskop, woernoa at de leedn nen antal daagn vrie hef. Dit is vuur völle leedn de ennigste meugelikheaid um eawn noar thoes te komn. Doarnoa komt ze wier tehoop um op de gröttere toer te goan, den at n nasjonaal karakter hef, en den at oeteaindelik oetkeump op de DCI Finales.

In Europa

In Europa is dr ginnen echtn toer. Twee Hollaandse korpsn (Beatrix' Hilversum en Jubal Dordrecht) goat seend n poar joar met mekoar op oefenkaamp noar Italië. De DCE-wedstriedn wordt allemoal in Neerlaand eheuldn, zodet alle deelnemnde korpsn noar Neerlaand munn komn, mear ne roondreaize duur Europa besteet neet. Korpsn doot wal es met in optochtn in Fraankriek of Duutslaand, mear dee oetstepkes doert meesttieds neet lenger as 3 deage.

Metdoon in DCI

Eens in de zovölle tied geet n Europees korps noar Amerika um doar in de Lösse Wearldklasse met te spöln. Dit kostet onmeundig völle geeld, zodet allene de Europese topkorpsn dit eens in de zovölle joar köant woarmaakn. De korpsn dee at dit al n moal of wat hebt edoan beent wier Jubal oet Dordrecht en Beatrix' oet Hilversum. n Aander, meender bekeand korps det in 2008 metdee was Strängnäs Drum & Bugle Corps oet Zweedn. Ook de Senators Drum & Bugle Corps oet Engelaand hef t in t zinne um in de vuurlignde joarn met te doon in Amerika. In 2010 gung t Kidsgrove Drum & Bugle Corps oet Kidsgrove in t Verenigd Keuninkriek metdoon in DCA, n teegnhanger van DCI. Doar haaln ze de finaleroondes oeteandelik met ne 8ste plek. Doarop wunn ze de DCE wedstriedn in Koarkroade.

Wedstriedn

Wedstriedn wordt meesttieds eheuldn in stadions of op veeldn van skooln, of vergeliekbere instelliges, en ze wordt ekuurd duur juryleedn dee at duur de boond good beveundn beent. Dr besteet grote oonderlinge stried tusken de korpsn (en nog völle mear oonder öare anhangers), en doarumme is dr n ingewikkeld peuntstelsel, det neet kan vuurkomn det korpsn mangs n geliek antal peuntn kriegnt. De meeste organisasies hooldt de 3-ledige indelige an: "General Effect (GE)", Visual en Music, woervan General n belangriekstn is:

Totale meugelike antal peuntn: 100

General Effect	40	Visueel	30	Muziek	30
Visueel	20	Oetvoerige	10	Kopper	10
Muziek	20	gehele korps	10	gehele korps	10
		Vlagnleu	10	Slagwoark	10

Drumkorps in Engelaand beoordeelt n kleain betn aanders, dee hebt n apart peuntnstelsel vuur iedere ofdelige. Wieters dut Europa t op dezelfde manere as de Amerikaann.

De tiedsindelige en organisasie van wedstriedn verskilt beheurlik tusken de organisasies. Allene de grote DCI-korpsn hebt meesttieds zovölle geeld en leedn dee at dr zovölle tied vuur oawer hebt um in t toerskema met te dreein, woerbie at de korpsn oawer heel Amerika metdoot in plaatselike en regionale wedstriedn. Vuur de kleaindere korpsn en organisasies wordt de wedstriedn vake zo in edeeld det de korpsn binn t wekneande hen en wierumme köant. De gröttere wedstriedn wordt vake ook in t wekneande in edeeld, um mear kiekvolk an te trekn.

In Amerika doot korpsn oet verskilnde klasses duur mekoar met an nen wedstried, mear wordt dan wal in öare eegne klasse beoordeeld. Ook doot doar de verskilnde boondn duur mekoar hen. Vearderop in t seizoen wordt de wedstriedklasses wal apart eheuldn. In Europa wördt iedere klasse ofzeunderik of edreeid, met de leegste klasse an t begin van n dag en de heugste noar t eande. Um met te doon in de kampioenskopn munn Europese korpsn metdoon an n vuurof bepoald antal wedstriedn, dee at ze zelf magnt kiezn. Op disse manere komt de korpsn allenig tiedns de kampioenskopn allemoal te hoop.

DCI organiseert twee moal in t seizoen de Individuals & Ensembles (I&E), of Eankeling & Groepswedstriedn, woerbie at leedn oet naam van öar korps ofzeunderlik deel köant nemn um öare persoonlike muzikale talentn te loatn zeen, duur solo-stukke te spöln dee at technies t heugste van t heugste beent. t Kleaine betn vrieje tied wat de leedn nog hebt wörd vake hieran besteed. De DCE dut dit eens in t joar.

Korpsorganisasie

De meeste korpsn beent neet oet op finansjele weenst, en mear heel weainig beent verbeundn an ne skole. Heel wat korpsn beent wier onderdeel van gröttere keunstn-organisasies, dee at ook theaterskooln, weenterguard en weenterdrumlines, en verskeaidene aandere muzikale en visuele bezigheedn oonderstönt. In Europa beent völle korpsn onderdeel van ne Stichting, wat öar helpt bie t bie mekoar kriegn van geeld.

bestuur

t Bestuur besteet vake oet dree onderdeeln: oetvoerend/bestuurlik, instrueernd/lesgeewnd en vriewillig. Disse dreagnt allemoal bie an t good dreeinde te hooldn van t korps.

t Oetvoernde volk besteet oet de toerdirekteur en aandere offisjeeln. Vake beent dit oold-leedn dee at t kostnloos doot. Achter de korpsn dee at t al joarn good doot, zitt vake nog t bestuur wat dr vuur hef ezorgt det t zo good löp. In Europa he'j anstelliges zo as de penningmeaister, vuurzitter en archivaris en persvuurlichter, dee at zelf vake ook nog metspölt, umdet dr meesttieds volk te kort is in t korps. Ze hebt dr vake ook mear tied vuur as in Amerika umdet t in Europa neet zo tiedreuwnd is en de muziek en show meender moeilik is.

t Instrueernde/Lesgeewnde volk zorget dr vuur det de show en de muziek dr good oetkeump. Zee bedeankt de show en verhaal dr achter, kiest de muziek en past t an noar t korps. Dr beent verskilnde pöste, vuur de verskilnde onderdeeln van t korps: nen bloasinstrukteur, nen slagwoarkinstrukteur, kluurwachtinstrukteur, en nen loopinstrukteur. Vake beent de leste dree oold-leedn dee at dr voltieds an met woarket. Ze hebt hier in Amerika nen volledigen baan an, en beent dr aait bie op repetisies, oefenkaampn en tiedns de toer.
In Europa wördt völle ezocht noar bloasinstrukteurs met ne konservatoriumopleaidige. Doarvan beent dr mear heel weainig dee at gearne bie nen Drumkorps weelt wean, umdet dit in Europa nog neet zo heel lange bekeand is en de opleaidige doarvuur ginne kursusn gef. Doarumme is dr in Europa nen groot tekort an instrukteurs, en nemt mangs oold-leedn dit op zik.

Gin korps kan zoonder vriewilligers. Oolders, oold-leedn, könnigheaid en leefhebbers zorget det t korpsgood löp. Ze bestuurt de busn en materiaalwaagns, kokt vuur t hele korps, doot an leednwoarving, verzorget persberichtn, en aandere kleaine dinge. Tiedns de toer beent de wriewilligers helemoal onmisbaar. Ze kokt en maakt skone, repareert uniforme, instrumeantn en apparatuur, verzorget de leedn bie ongelukn en op medies gebeed, en bemant de andeanknkröamkes.

kostn en geeldwinn

Ieder lid mut zin lidmaatskop betaaln, zodet al dee oetgaawn vuur t korps en de toer dr oet köant. De lidmaatskopskostn verskilt per korps en per organisasie, mear lignt vuur Wearldklassekorpsn meesttieds zo tusken de 500 en 1600 euro. De meeste korpsn beedt wal maneern um de leedn te oonderstönn met disse bedraagn, mear de inbreng van de leedn is nog mear n kleain andeel van de volledige kostn. t Kostet n Amerikaans korps tusken de 80,000 en 1,5 miljoen euro um t spul dreeinde te hooldn; t bestuur mut betaald wordn, pekke, instrumeantn, apparatuur en de waagns munn onderheuldn wordn en t volk mut ook nog wat te etn, en oonderdak hebn. Ze munn dus aandere maneern zeukn um t geeld allemoal binn te kriegn. Sommige korpsn verplichet ieder lid um n antal sponsors binn te haaln, aandere korpsn organiseert grote bingo-oawnde. Wat amerikaanse korpsn hebt zelfs ne eegne busmoatskoppieje, woerduur t hele joar duur ook inkomstn binnkomt. Alle korpsn probeert geeld te kriegn van de zaaknwearld, en vroagnt biedreages van öare anhangers en oold-leedn.

Euopese korpsn organiseert feestoawnde en vuurseizoensfeestjes. Aandere korpsn hooldt verskeaidene aksies, zo as oold papier-aksies, verkoopn van öllieknepn of aandere slikkerieje, en geewt konsertn.

Wieter kriegnt vanzelf alle korpsn geeld vuur de stroatoptreedns en parades dee at ze annemt.

Oetgoande verbeendiges

• Halftime Magazine, "the sights sounds and spirit of the marching arts"
• Drum Corps Associates
• Drum Corps Europe
• Drum Corps France
• Drum Corps Germany
• Drum Corps International
• Drum Corps Japan
• Drum Corps Nederland
• Drum Corps United Kingdom
• British Youth Band Association
• Drum Corps Music
• Marching TV-kanaal webstea
• Drum and Lyrakorps Genootn van de Fillepienn Incorporated
• Field Band Foundation (Zuud-Afrika)
• World Association of Marching Show Bands
• The Middle Horn Leader
• "On the field, from Denver, Colorado...The Blue Knights!"
• Drum Corps Historical Society (DCHS)