Tenoortromme

Multi-Tenoorspöller

Ne tenoortromme is ne roonde ketteltromme den at net iets heugerder is op espönn as ne grote tromme.

In Simfonieorkestn is t meesttieds ne leeg estemde skoarpe tromme, woervan at de snoarn dr oonderhen beent edreeid. Hee wörd t ene moal met filtne stökke bespölt, en t aandere moal met harte stökke. t Deenk hef al verskeaidene naamns ehad (in t Neersassiese gebeed wör bievuurbeeld pauk eneumd), en wörd al seend t midln van t 19e joarhonderd gebroekt en bie muziekstukke bie in eskreewn.

Multitenoortromme

Multitenoortromn wordt in marsjeernde bands gebroekt. Meesttieds beent ze dan in sets van 3-6 trumkes an mekoar emaakt, zodet een persoon meardere tromn tegeliek kan bespöln. De trumkes beent dan op verskilnde toonheugtes of estemd. Aandere naamns hiervuur beent algemeen toms en tim toms. Vearder köant ze nog eneumd wordn noar t antal trumkes woeroet ze bestoat: duo toms (2 trumkes), tri(o) toms (3 trumkes), quads of quad toms (4 trumkes), quints (5), sixpacks of sext(et) (6). Umdet 4 trumkes de standaard is, wordt alle tenoorn wal quads eneumd, ook as doar mear trumkes bie komt. de 5e en 6e trumkes beent vake neet zo groot, en onmeundig hoge op edreeid um t geluud better oawer te loatn komn. Doarumme wordt ze vake wal gocks of spocks eneumd. t Doel van tenoortromn is um mear kluur in t geluud van ne tromnriege te kriegn en nen "tuskenstemme" te hebn tusken de hoogstemmige skoarpe tromn, en de leegstemmige grote tromn.

Tromverdelige van ne multi-tenoortromme

Verdelige

Multi-tenoorn beent zo verdeeld det t gewicht ongevear geliek is verspreaid, en det t vuur rechtshaandigen makkelik is de trumkes te raakn. n Heugst-estemden is nommer 1, en n leegstn is nommer 4. De gock wörd dan in t midln, kort bie n boek van n muzikaant eplaatst.

Stökke

Tenoortromn köant met verskeaidene stökke bespöld wordn. De eankele tenoortromn wordt vake met zachte stökke bespölt zodet dr n dof geluud oet keump, mear bie de multi-tenoortromn wordt de stökke an epast noar t soort muziek. Ze varieert van stökke met nen filtn töt nylon kop, den at zelf wier dik of dun, bol of plat kan wean, en op dee manere wier allemoal verskeaidene klaankn oet t instrumeant kriegnt. Wieters kan t gewicht verdeeld wean van achterin töt vuurin vuur t spölgemak.