Wipstrik
De Wipstrik is een centraal elegen woonwiek in de Aoveriesselse heufdstad Zwolle. In 2013 woonden der zo'n 6400 mèensen. Volgens een plaatselijke verklaoring kump de wiek an zien name umdet det ooit een harbarg hef estaone mit een wupgalge, een soortement galge dan wal martelwarktuug.[1]
Zeeheldenbuurte en Schrieversbuurte[bewark | bronkode bewarken]
De Wipstrik bint ze veur de oorlog begund te bouwen; der is ok nao-oorlogse bouw. De wiek bestiet uut Wipstrik-Zuud (de Zeeheldenbuurte) en Wipstrik-Noord (de Schrieversbuurte). In de Zeeheldenbuurte hej veural kleinere woonhuzen ('arbeiderswonings'); ok hej der wiekcentrum De Bestevaer mit een gelieknamige speultuun. De wiekveriening het Wipstrikkwartier. Straoten in de Zeeheldenbuurte bint vernuumd naor beroemde Nederlaandse kapteins en ontdekkingsreizigers.
In de Schrieversbuurte hej meer koopwonings, ebouwd volgens de tuundörpgedachte, en briedere straoten, mar ok een köppel flatgebouwen die niet al te hoge bint. Wieder hef de Schrieversbuurte drei basisschoelen en een deur vrijwilligers erund openlochtbad (een rieksmonument, ontwörpen deur J.G. Wiebenga). De straoten bint der vernuumd naor schrievers van de Hollaandse Golden Ieuw (beveurbield de Vondelkade naor Joost van den Vondel) töt an de vrogge twintigste ieuw (beveurbield de Van Hille Gaerthéstraat naor de Zwolse schriefster C.M. van Hille-Gaerthé).
In de Wipstrik hej behalve een buurtsuper niet veule winkels, mar de wiek lig kört bij de binnenstad en kuj van daoruut goed mit de auto, mit de fietse of kuiernd berieken.
Begrèenzing[bewark | bronkode bewarken]
Tussen de beide buurten löp de Wipstrikkerallee, een verkeersweg eflankeerd deur grote bomen en staotige huzen. In 't noordwesten wördt de Wipstrik begrèensd deur de Neie Vechte (die de Vechte en 't Almelose Kenaol verbiendt); in 't oosten deur de Ceintuurbaan (de N35). An de aoverkaante van de Ceintuurbaan, in de buurte Oosterenk, hej 't MAC³PARK stadion van voetbalclub PEC Zwolle, 't Isala-ziekenhuus, bedrieven en een köppel schoelen. In 't zuudwesten löp de Wipstrik töt an 't Almelose Kenaol, mit an de aoverkaante park De Wezenlaanden. An de Neie Vechte stiet de stellingmeule De Passiebloem uut 1776.
Rifferenties[bewark | bronkode bewarken]
|
Dit stok is eschreven in 't Zuudwest-Drèents. |
