Oosterenk
Oosterenk, of Kantorenterrein Oosterenk, is een buurte in de Aoveriesselse heufdstad Zwolle. De buurte mak diel uut van de wiek Berkum, die een groter oppervlak beslat as de buurte Berkum. In Oosterenk hej zowal een groot voetbalstadion, MAC³PARK, as een groot ziekenhuus, de Isala-klinieken.
Oosterenk lig diels op een dekzaandrogge uut de prehistorie. Zoas 't element 'enk' in de name angef, was 't vrogger hoog elegen akkerlaand. 't Gebied is oostelijk elegen vanuut de stad Zwolle bekeken.
Samenstelling van de buurte
[bewark | bronkode bewarken]Van noord naor zuud bestiet Oosterenk uut: 't MAC³PARK stadion en zes voetbalvelden; bedrieven, de Thorbecke-schoelengemienschop en de MBO Landstede; ziekenhuus de Isala-klinieken; nog een bulte bedrieven en, miest zudelijk, weilaanden. Oosterenk grèenst in 't westen an woonwiek de Wipstrik, in 't oosten an de laandelijke buurte Veldhoeke, in 't noorden an bedrieventerrein de Vrolijkheid en in 't zuden an de buurtschop Zalné.
In een toekomstvisie veur Oosterenk uut 2020 gef de gemiente Zwolle an kantoren en bedriefsruumten te willen verneien en bepaolde kantoren umme te willen bouwen naor woningen. Volgens de visie is der in Oosterenk plekke veur zeshonderd töt duzend woningen: veurnamelk appartementen an de Dokter Spanjaardweg en de dokter van Thiemenweg, mar ok woonhuzen grèenzend an 't laandelijke gebied.
't Voetbalstadion
[bewark | bronkode bewarken]'t MAC³PARK-stadion an de Ceintuurbane is 't thuusstadion van Eredivisie-club PEC Zwolle en hef plekke veur 14.000 bezukers.'t Wördden in 2007 neerezet ter vervanging van 't kleinere Oosterenkstadion, det op ongeveer dezölfde plekke stund. Töt 2016 hiette 't neie stadion 't IJsseldelta Stadion. 't Hiele stadioncomplex beslat 5000 m² en hef naost de voetbalveurzienings nog aandere veurzienings, waoronder een casino van 804 m², een hotel, restaurants, een fitnessclub en winkels.
't Ziekenhuus
[bewark | bronkode bewarken]De Isala-klinieken staot sinds begun 21ste ieuw op de plekke van 't vroggere Sophia-ziekenhuus. 't Sophia-ziekenhuus kwaamp in 1972 an de Dokter van Heesweg in Oosterenk, naodet de eerdere locatie körterbij de binnenstad te krap ewörden was. In 1998 gunk 't Sophia samen mit een aander Zwols ziekenhuus, de Weezenlanden, waordeur Isala ontstund.
Isala Zwolle, zoas de Zwolse takke van de Isala-klinieken het, is onderdiel van een organisatie mit vief locaties in de regio. Isala Zwolle is ien van de grotere ziekenhuzen van Nederlaand en is 't grootste niet-akkedemische ziekenhuus. Haoste alle medische specialismes bint der anwezig.
|
Dit artikel is eschreven in 't Zuudwest-Drèents. |
|
Commons: Oosterenk - plaatjes, filmkes en/of gelüüdsbestanden. |
