Tongeren (Gelderland)

Uut Wikipedia, de vrye encyklopedy

Tongeren is n buurtschap in de gemeente Epe, in de Nederlandse provinsie Gelderland. t Ligt tussen Epe en Nunspeet in. De buurtschap stiet ok bekend as Landgoed Tongeren.

De buurtschap ligt op ongeveer vief kilometer ten westen van Epe, en ongeveer zeuven kilometer ten zuudoosten van t Harde. De buurtschap hef volgens t Sentraal Buro veur de Staotistiek (CBS) 30 inwoners, waorvan 10 vrouwlu en 20 keerls.[1].

Op t landgoed, zo'n viefhonderd bunder groot, he'j veural heedvelden, mit n uutgebreid fiets- en wandelnetwark. Tongeren had één basisschoele die sinds t einde van de jaoren 90 niet meer as schoele gebruukt wordt. Tegenswoordig worden in t olde schoelgebouw verschillende (kleinschaolige) evenementen eholden.

Natuur en kultuur[bewark | bronkode bewarken]

Vandage de dag bestiet t landgoed uut loofbos, dennenbos, heed, landbouwgronden en boerderiejen. n Deel van Tongeren is openesteld veur wandelaars, t andere deel is wildrustgebied. t Is t leefgebied van edelhart en wild varken en ok de dasse hef der n burcht. In de bos breujen havik, buizerd en katule. Op de heed kommen nachtzwalve, gaele garste, roodborsttapuit en boomleeuwerik veur. Swienters verblif der vake n klapaekster. In de heed zit ok n redelik antal adders. Ok de kleine aeverdasse, zandaeverdasse en bliende slange leven der. In de paartied, rond einde meert, bint flinke groepen heedkikkers te zien en te heuren en sinds kort ok de rugstreeppadde.

Referensies[bewark | bronkode bewarken]

  1. Staotistieken van de gemeente Epe in 2005

Uutgaonde verwiezing[bewark | bronkode bewarken]


Dit artikel is eskreaven in et oustveluwske dialekt van Epe, in de Algemene Nedersaksiese Schriefwieze.