St Francisbaai

De Zaandrivier tussen St Francisbaai en Oesterbaai

St Francisbaai (Afrikaans: St Francisbaai, Engels: St Francis Bay; vake aofekort tot St Francis) is een van de darpen van de plaotselike gemeente Kouga en völt onder de distriktsgemeente Cacadu in de Oost-Kaap van Zuud-Afrika. St Francisbaai is n redelik niej darp, dat uut wele boerderiejen is ontstaon.

Deur St Francisbaai streump de Krommerivier die deur n estuarium uutmondt in de Indiese Oseaan. Oek he'j de Zaandrivier, mer ondanks dat t de Zaandrivier hit t is t gien rivier, t waoter streump der onder de zaanddunen over n rotsachtige ondergrond en kömp as t veule regent naor boven toe, en vormp as de streum ophöldt dan poelen waor voegels en wild op aofkoemen.

De meest naobie elegen darpen bin: Kaap St Francis (9 km ten zujen), Humansdarp (18 km ten noorden), Oesterbaai (22,5 km ten westen) en Jeffreysbaai (28,5 km ten noordwesten). t Ligt zo'n 105 km bie de stad Port Elizabeth vandaon.

Buurten

t Darp is verdeeld in zes buurten:

t Oorspronkelike deel, dat allinnig uut witte huzen mit strodaken (of zwarte dakpannen) besteet
Santareme, t gedeelte dat der Toskaans-/Spaansachtige uutziet
t Havengebied (Port St Francis)
De kaap (Kaap St Francis)
De kanalen
Sea Vista (n krottewiek waor de meeste kleurlingen en zwarte meensen woenen), oek wel de lokasie eneumd.

Geschiedenisse

Veurdat de Europeanen der gungen woenen, wördden t gebied bewoend deur de Khoi. De naam van dit darp kömp van de Portugese ontdekkingsreiziger Manuel de Perestrelo die in 1575 St Francisbaai zien naam gaf. In Santereme (n buurte in St Francisbaai) bin der n paor San-skeletten evunnen, disse skeletten bin 5180 jaor oud. t Darp is ontstaon rond 1950. Van de Portugese invleujen is niet zoveule te marken, t enigste wat nog an Portugal en t Middellaandse Zeegebied döt denken bin de Spaans- en Portugeesachtige straotnamen en bouwstiel in Santareme.

Kaap St Francis is n ampart darp dat vake tot St Francisbaai erekend wörden. Vrogger heetten t Kaap-Serras en wördden oek ontdekt deur Manuelo de Perestrelo. t Is n plekke waor veule surfers naortoe koemen.