Bob Marley

Bob Marley
Bob Marley tiedns een van zien leste optreedns, in Zürich, 1980
Algemene informasie
Geboren	6 februwoari 1946
Sturven	11 mei 1981
Spraoke	Engels, Jamaikaans Kreool
Genre	Reggae
Offisiële webstee
http://www.bobmarley.com

Robert "Bob" Nesta Marley (6 februoari 1946 - 11 mei 1981) was nen Jamaikaansen zanger, leedkesskriewer, gitarist en aktivist. Hej was, en is n bekeandsn reggaemaker.

Zin bekeanste nummers beent "No Woman No Cry" (Nee, vrouwke, neet huuln), "I Shot the Sherrif" (Ik skeute n sherrif daale) en "One Love" (Ene leefde). Noa dat-e oet de tied köm, is dr n Album van zinne bekeandste nummers oetegiewn ("Legend") den met 12 miljoen kopiejn t meest verkochte reggae-album van de wearld is.

Vraue leawn en loopbaan

Marley wör geboorn n klean pleatsken, Nine Mile (Niegn Mijl) in Jamaika. Hei heetn offisjeel Nesta Robert Marley, mear eenn den at zin paspoort maakn mos, wisseldn ziene naamns umme. Zien vaa was nen blaankn Jamaikaansen marineoffisier met Engelse vuurooldn, den in Liverpool woondn. Den gaf Bob zien moo wal geeld, mear hei hef zik noadat Bob geboorn was nooit wier loatn zeene en köm oet de tied toew at Bob 10 joar oold was. Bob wör in zinne jeugd völle ploagnd duur blaankn, mear ook duur de zwartn, umdat he van genne van bealn nen echen was.
Noa at zien vaa dood gung, verhuusdn he met zien moo noar Kingston Trenchtown. Doar wör he wier völle ploagnd um zien kluur en um ziene leankte (1,63m). Doar leardn he zikzölf te verdeadign, wat um naar good lukn. Doarumme kreeg he n skeeldnaamn "Tuff Gong" (Jamaikaans Patois vuur t Engelse tough going) wat laater n naamn vuur zien eigne opnamestudio wör. Hei wör kammeröa met Bunny Livingston, den at zik laater Bunny Wailer neumn.
Toew at he 14 wazze, gung he van skoole en gung in de lear biej nen lasser. In ziene vrieje tied maakn he meziek met zien moat Bunny en Joe Higgs, nen plaatseliken zanger. Den wör Bob zien leraar. Tiedns eene van disse mezieksessies wördn ze könnig met ene Peter McIntosh, den zik laater Peter Tosh neumn. Bob was van hoes oet slim Rooms, mear hee bekeardn zik töt t rastafarianisme, woervan he n boskop aaltied vuurop de tonge har.

Meziekloopbaan

Met Bunny en Peter vörmden-e oeteandelik "Bob Marley & The Wailers". In 1973 wör eer album "Catch a Fire" in de hele wearld good oontvöngn. Zien hit "I Shot the Serrif" wör zölfs heroetegiewn duur Eric Clapton. Hej wör onmeundig bekeand in zowat de hele wearld, mear vuural in Afrika.

Wietere leawn

In 1977 wör Bob op enömn in t zeeknhoes en wör ne staarke vorm van kaanker in zienen grootn tei biej um an etröfn. Dat was vuurt ekömn oet n weundjen wat hej bie n voetbal har ekreegn. Hej wol zik n tei neet loatn ofsniedn, umdat zien Rastafari-geleuf dat neet tau leut. n Kaanker zeaidn toew oet noar ziene harsens, longn, leawer en ziene maage. Tiedns zienen lesten wearldtoer, toew at he in Amerika was, stortn he in toew at he n stuksken gung hardloopn. n Toer wör drekt of ebloazn.

Toew at he van Duutslaand noar hoes (Jamaika) vleug, wör he neet good. Ze beent toew elaand in Miami, Amerika, woer at he in n zeeknhoes is oawerleedn. Bob Marley is 36 joar oold ewördn.

Familie

Bob Marley hef n antal keender: dree met zinne vrouwe Rita, twee an enömnen van Rita's vurige verhooldings, en verskeaidene aandere bie verskilnde vroale. De offisjele Bob Marley-webstea erkeant eelf wichter.

• Sharon, 23 november 1964, van Rita's vurige verhoolding
• Cedella, 23 augustus 1967, van Rita
• Ziggy, 17 oktober 1968, van Rita
• Stephen, 20 april 1972, van Rita
• "Robbie", 16 mei 1972, bie Pat Williams
• Rohan, 19 mei 1972, bie Janet Hunt
• Karen, 1973, bie Janet Bowen
• Stephanie, 17 augustus 1974; voolgens Cedella Booker was ze ne dochter van Rita en nen kearl den't Ital heetn, woer't Rita ne verhoolding met har; toch wör he an enömn as Bob's dochter.
• Julian, 4 juni 1975, bie Lucy Pounder
• Ky-Mani, 26 februwoari 1976, bie Anita Belnavis
• Damian, 21 juli 1978, bie Cindy Breakspeare
• Makeda, 30 mei 1981, bie Yvette Crichton, noa Bob Marley's dood. Meredith Dixon's book neumt eer as Marley's wich, mear he steet neet zo op de webstea van Bob Marley.

Verskeaidene aandere websteas neumt ook ne Imani Carole, geboorn op 22 mei 1963 bie Cheryl Murray, mear dee steet ook neet bie op de webstea.

Oetgoande verbeendege

• www.bobmarley.com webstea oawer Bob Marley, van zinne femilie

Disse pagina is eskreewn in t Eanters