Saksenoorlogen

Uut Wikipedia, de vrye encyklopedy
Naar navigatie springen Naar zoeken springen
Ofbeylding van de verwoosting van de Irminsul, wat anleiding was vöär de Saksenoorlogen.

De Saksenoorlogen (772 - 804) sint een antal oorlogen tüsken et frankiske ryk van Groten Karel en de saksen.

Achtergrund[bewark | bronkode bewarken]

Frankse köningen hadden töt dee tyd wal skatgelden kreygen van de saksen, mär se hadden se der nooit echt under kreygen. De saksen volgeden dårby noch altyd vaste an germaanske gelöyvsgebruken, leyveden in lösse stamverbanden en güngen reygelmåtig up röyvtocht up frankiske grund. Et is nit düdelik of Karel eyrst enkel disse röyvtochten teagen wul gån of dat hee medeyne de sassen der under wul krygen en dwingen um kristelik te worden.

De Annales regni Francorum (Frankiske Ryksgeskydenisse) en de Vita Karola Magni (leyvensbeskryving van Groten Karel) beskryvet de Saksenoorlogen uutvorig, mär der sint håste ginne upgravingen dån. In disse geskrivten wörd untvolking en vortvoring enöymet, mär dit is nargens so düdelik te seen as by de untvolking van Noordalbingië (Ditmarsken, Holsteyn en Stormarn) en de invoring van de slaviske Abrodyten.

Oorsaak en verloop[bewark | bronkode bewarken]

In 772 löyt Groten Kårel de Irminsule kapothauen. De Irminsule was nen groten stam, pål of stükke holt wat nen wearldboom vöärstellen mus. Dissen wearldboom (irminsule bedüdet letterlik sule van allens) stütteden volgens de germanen den heamel en de earde (allens) en wör dårüm as vöärname heilige steyde anbeyden.[1] Ook wörd annöämen dat de steyde wår as disse sule stünd ne belangryke gadderplaatse was, wår as alle saksen te hope köämen üm et Ding (rechtdag) te holden. Et kapothauen van de Irminsule was düs medeyne nen anslag up et saksengelöyv en de saksen-"regeyring".

Dårüm stöyken de saksen in Deaventer Leevwin syne karke in 'n brand. Dat löyt Karel neet unbestraffed. Hee tröyk der up an üm de saksen te bestraffen. In et soamer van dat jår wün Karel eyrst: syn leyger stöyk de Ryn oaver, et saksiske gebeed in. Dår veröyvereden he under meyr de Syborg (by Dortmund) en de Eresborg[2] (by Marsbarg), wår as de Irminsule estån hebben sul. Van dåruut tröyk hee up de Weser up an. Dår verslöyg he een saksenleyger. Öären leider, Hessi, löyt sik töt Kristen döypen. Up basis van dit sukces bespröyk Karel syne wydtere plannen med een paar goodwillende saksiske edelmänne. Een antal dårvan setten he vöär de seykerheid wal gevangen.

In 773 güng Karel når Italye, wår as köning Desiderius van de Longobarden de söäns van synen oaverleydenen bröyr Carloman I in huus har. Under 'n westfaalsken leider Wittekind güngen de saksen vöärt-an med vechten en wunnen Deaventer, een paar frankiske dörpkes en karken, vöäral in et hüdigendaagse düütske Rynland. Underwyl völlen de Engeren, een saksisk volk wat rund et hüdige Bremen woaneden, et steydke Fritzlar an. Dee wörden döar de franken verslån.

In 775 köäm Karel met een leyger oaver Syborg, Eresborg en Brunsbarg (by Höxter) by 'n rivyr 'n Oker, wår as een deyl van de saksen sik ewünnen gavven. Up de weg wearümme güng Karel med syn leyger langs Hildesheym en Nordstemmen når de Bukkigouw rund Bukkeborg. Hyr hölden de engeren een antal franken in gevangenskap. Van dår uut tröyk Karel når "Hlitbeki" (Lübeake) üm syn leyger dår te helpen.

Nå wear ne veldtocht in Italye in 776 köäm Karel wearümme når et sassiske gebeed, want de saksen hadden underwyl synen eresborg kort-höwwen. Hee verslöyg se, wårup Wittekind vlïchten mus når Deynemarken.

In 777 wör vöär et eyrst in lange tyd nit evöchten. In dit jår was der vöär et eyrst ouk ne frankiske vergådering up sassisken grund, in de net estichtede Karlsborg. Dit was 'n vöärloper van de ryksdag. Der wörd emeyned dat dit was by et nudaagse Paderborn. Uutkumst van de beköyerye was dat de saksen mär rap kerstened worden mussen. Hyrvöär nöydigeden se angelsassiske sendelingen uut Engeland. Groten Karel had ouk gerne dat de karken en kloosters med öäre bookholdingsgebruken allens dale skreyven.

In 779 kreyg Korel Oostfalen, Westfalen en Engeren der under.

Grootn opstaand[bewark | bronkode bewarken]

Karel vermoden dat de sassen sik skoonwal nit so lange händig sullen holden. Underwyl drükkeden Karel der heffingen döär, bestraffeden olde germaanske gelöyvsgebruken en dwüng de sassen üm kristen te worden. Dat makeden de sassen inderdaad wear upstandig. Wittekind was der wear uut Daenemarken en brachteden de sassen wear by mekander. Se deyden dörpe oavervallen van de frankiske Chatten in et hüdigendaagse Hessen. Se hadden sik dit mål wat beater organiseyred en durveden nu ouk in et lösse veld te vechten. Dit sassenleyger bestünd in höyvdsaak uut buren. De höygere standen hadden sik by Karel anslöäten.

In de Slag by de Süntel verslöyg et leyger van Wittekind een frankenleyger, terwyl as Karel selv gangs was med nen veldtocht teagen de Sorben gangs was.

In 782 höld Karel in Lipspringe nen ryksdag. Hyr deyd he al et sassenland verdeylen in frankiske gråfskuppen. Dat sorgeden wear vöär groten upstand, den as Karel med harten hand de kop indrükkeden: hee gavven updracht vöär et berüchte Bloodbad van Verden, wårby as når et skynet 4500 sassen 'n kop ofhöwwen wör. Een antal geskydkündigen gelöyvet dit antal neet. See meynet dat der nen skryvfout in de latynske geskrivten sul stån: delocabat (= wegvoren) sul by ungelükke as decolabat (= höyvd afslån) eskreyven weasen. Hartog Wittekind sat underwyl wear in Daenemarken.

Karel kreyg in synen oorlog teagen de sassen hülpe van sendelingen. Üm dee te beskarmen löyt hee ne wet uutskryven: up yderen wund van nen sendeling en alle vörme van minachting van et Kristelike ryksbestüür (swartmakerye van preesters of karken, uutvoren van olde gelöyvsbruken so as lykverbranding of vleisk eaten up vastendage) stünd de doodstraf of wegvoring. Ouk binnen Karel syn eygenen kring van vertrowelingen vünden se dit toch wal an de harte kante. Den angelsassisken sendeling Elkwin skreyv Karel selvs nen breyv wårin as hee em vröyg of et ouk wat händiger an kun. et Woord van God mus ja nit med 'n swaerd, mär med preyken verspreidet worden. Toch höld Karel vaste an syne ungenadige kerstening. Et leyvereden em de byname Sassenslachter up.

In 783 köm et by Detmold en by de Haze wear up vechten an. Sassiske vrowlüde sullen hyr med blote börsten up de franken weasen an evöllen. De kristelike franken warren hyr so döär de wyse brachted dat se de stryd verlöären. Fastrada, de latere vrowe van Karel, löyt sik hyrdöär skynbår nit van de wyse brengen en deed korrekt etselvde teagen de sassen. Der wörd wal beweyred at Fastrada Karel et idey vöär et bloodbad van Verden inflüstered had.

In 784 köämen de freysken de sassen helpen. Dat hadden se eyrder ouk al es edån. Toch köämen de sassen alvöärtan meyr in et gedrang, undanks öäre vechtlüst. De gröätste ümmedraey köm doo as Wittekind sik in 785 döypen löyt en Karel trow beloaveden. Den was ouk medeyne synen peetvader. In et neaderlandske deyl van et sassenland wör dårnå nit meyr vöchten.

Verwiezingn[bewark | bronkode bewarken]

  1. Annales Laureshamenses, ad A. 772 (bij Pertz 1. 30) ("Fuit rex Carlus hostiliter in Saxonia et destruxit fanum eorum, quod vocatur Irminsul."); Annales iuvavenses, ad A. 772 (bie Pertz 1. 88) ("Karolus idolum Saxonorum combussit, quod dicebant Irminsul.").
  2. Daniel Bérenger: Die eisenzeitliche Höhenbefestigung von Obermarsberg Digitalisat
Nuvola apps ksig.png Dit artikel is eskreaven in et twentsk.