Mesopotamie

Uut Wikipedia, de vrye encyklopedy
(döärstüürd vanaf "Mesopotamië")
Mesopotamie up de kaarte van Westasie

Mesopotamië (uut oldgreeksk Μεσοποταμία Mesopotamíā, 'mang de rivyren') of Tweyströymenland (arameesk ܒܝܬ ܢܗܪܝܢ Beth Nahrin, arabisk بلاد مابين النهرين Bilad ma bayn Al-Nahrayn of بِلَاد ٱلرَّافِدَيْن Bilad ar-Rafidayn) is ne historiske streake in Westazie, tüsken de rivyren Tigris un Eufraat. Et gebeed beslöög under meyr Irak, Iran, Kuweit, Syrie un Türkye.

De sumeriers un akkadiers (med de assyriers un babyloniers der by) woanden in Mesopotamie vöär et gröätste deyl van de bekende geskedenisse (vanaf 3100 vK), töt den val van Babylon in 539 vK, do as et inenöämen wör döär et Achemenidenryk. Dårnå veröäveren et Aleksander den Grouten in 332 vK un do as den uut de tyd was güng et up et greekske Selucidenryk.

In Mesopotamie wörden de grötste untdekkingen van de Steyntydrevoluty dån, rund 10.000 vK. Volgens heyl wat geleyrden is Mesopotamie de steade wåras en paar van de grötste untdekkingen van de menskelike geskedenisse dån wörden, sou as et uutvinden van et rad, de eyrste grångewassen, et eyrste handskrivt, wiskunde, stearenkunde un landbouw. Et wördt wal es de wege van eyne van de wearlds vrogste beskavingen enöömd.

Rund 150 vK völ Mesopotamie under et Partiaanske Ryk. Et wör et slagveld tüsken de Romeinen un Partianen. De Romeinen wüsten uutendelik et westelike deyl in to neamen. In 226 nK wörden de oustelike deylen inelyvd by et Persiske Ryk. De upsplitting in en romeinsk un persisk deyl duurden töt de 7. eywe, do as de Moslims et innöämen. Tüsken et eyrste un darde jårhunderd warren der en paar ny-assyriske un kristelike mesopotamiske ståten, sou as Adiabene, Osroene un Hatra.

Språke un skryverye[bewark | bronkode bewarken]

De kode van hammurabi, eyne van de öldste wetteksten van de wearld

Skryven deaden se in Mesopotamie as eyrste in sumerisk, ne agglutinative språke dee vulleydig up sikselv stund. Ouk sumeriske semitiske språken kümmen vöär. Uut namen van lüde, rivyren, bargen un bepålde handwarken is de språke subartuaansk af to leiden. Under de akkadiske un assyriske ryken was et akkadisk de vöärnaamste språke. Sumerisk hölden se der by an üm saken up to skryven, gelöyvsgebruken uut to voren, un weatenskop med to bedryven.

Verskeidene soorten akkadisk warren in gebruuk töt et ende van de neobabyloniske tyd. Oldaramääsk, wat sik al in heyl Mesopotamie verspreid had, wör de officiäle ambtsspråke van et ny-assyriske un dårnå et achaemenidenryk. Akkadisk un sumerisk güngen der händigan uut, mär wörden noch töt an et ende van den eyrsten eywe nå Kristus eskreaven in tempeltekste.

Al sou'n 4000 jår vöär Kristus wör et spykerskrivt uutevünden vöär et sumerisk. Dårby wörden wigförmige inkeypingen emaked in ne natte kleitablette. Den standaardiseerden förm wör döäruntwikkeld uut piktogrammen. De öldste tekste (7 olde tabletten) sint bewaard ebleaven uut É, nen tempel vöär de godinne Inanna by Uruk.

Et duurden en paar jår üm et eyrste logografiske systeem van et spykerskrivt to leyren. Dårümme warren der mär en paar skryvers in deenst. Pas do as et meyr en lettergreypenskrivt wör tydens et bewind van Sargon, leyrden en anseenlik deyl van de mespotamiers leasen un skryven. Der sint höype med teksten weaderevünden uut oldbabyloniske skryvskolen, dee skryvunderricht gavven.

Akkadisk verdrüng sumerisk geleidelik an as de spröäkene språke van Mesopotamie, ungeväär rund de wesseling van 3000. når et 2000. jår vóär Kristus. Sumerisk bleav skounwal gebruked as ne heilige, ceremoniäle, literäre un weatenskoppelike språke töt de 1. eywe nå kristus.

Literatuur[bewark | bronkode bewarken]

De 11. kleitablette van et Heldendichtsel van Gilgamesh, en noch altyd populäär verhaal

Under et Babyloniske Ryk hadden souwat alle döärpe un tempels wal ne bookhalle. En old sumerisk spreakwoord was 'vrog uut bedde, houge cyfers up de skryvskole'. Vrouwlüde un kearls leyrden leasen un skryven. Dat hölde ouk in dat de babyloniers, dee't selv semitisk spröäken, ouk de uutestörvene sumeriske språke musten leyren, med nen lastigen un machtig grouten syllabus der by.

Flink wat babyloniske literatuur was oaveresat uut sumeriske brunnen. De språke van et gelöyv un de wet was noch langen tyd et sumerisk. Heyle wöördelyste, grammatikale beskryvingen un tweytalige tekste wörden upesteld vöär de studenten. Ouk nen houp kommentaren up öldere tekste un verklåringen van vergeatene wöörde un uutdrükkingen wörden upeskreaven. De syllabuskarakters wörden allemål netjes up de ryge sat un allens was makkelik nå to söken.

Vöäle babyloniske literäre warken worden vandage noch bestudeerd. Eyne van de beröömdsten dårvan is et Heldendicht van Gilgamesj, oaveresat uut et originäle sumerisk döär nen wissen Sîn-lēqi-unninni, un inedeyld volgens en stearenkündig principe. Yder deyl volgt en afsünderlik avontuur van Gilgamesj.

Weatenskop[bewark | bronkode bewarken]

Wiskunde[bewark | bronkode bewarken]

De mesopotamiers gebrukeden en sestigtallig telstelsel. Dår hebbet wy noch altyd unse sestig sekunden de minute, sestig minuten et uur, verentwentig uur in nen dag un 360 gråd in et rundte van. Ouk hadden se ne måndkalender med dree weaken van söäven dage de månd. Sou kunden se ouk al good landkaarten maken. Se hadden ouk wal ideen wo as se et uppervlak van verskillende geometriske förme kunden meaten. Vöär den ümtrek van nen kring reakenden se dree mål den döärsneyde. Vöär et uppervlak deaden se eyntwaalvde van den ümtrek in et kwadråt, wat solde kloppen as π precys 3 solde weasen. Unlangs is der ne kleitablette vünden wårup as se π benöäderden as 25/8 (3,125 wat neet wyd afligt van et dådwarkelike 3,14159~).

De babyloniers hadden ouk de babyloniske myle, wat oavereyne küm med ungeväär elv kilometer.

Algebra[bewark | bronkode bewarken]

Den oorsprung van algebra is torügge to brengen når de babyloniers. See dachten en verneamstig aritmetisk stelsel uut wårmed as se algoritmen kunden uutprakkiseren.

Geneaskünde[bewark | bronkode bewarken]

De öldste babyloniske geneaskündige teksten stammet van rund de 2500 vK. Den meyst uutgebreiden tekst is et Diagnostiske Handbook van den uppergeleyrden Esagil-kin-apli van Borsippa, under et bewind van den babylonisken köäning Adad-apla-iddina (1069-1046 vK).

Tegelyke med de egyptenaren bedachten de babyloniers de diagnose, prognose, lyvsundersöök, klysma en vöärskryvingen. Et Diagnostiske Handbook beskreav ouk warkwysen vöär terapy un oorsakenleyr, empirisk undersöök, logika un rationaliteit by diagnoses, prognoses un behandelingen. In de tekst steyt ne lyste med mediske klachten. Ouk ståt der nauwköärig beskreavene wårneamingen, nöäst logiske regels vöär et nåloupen van klachten van den behandelden vöär de diagnose un prognose.

Vake kreag nen behandelden verband, smeyrsels of pillen vöäreskreaven. As nen patient neet lyvlik geneasen kun worden, deaden babyloniske geneasheyren an düveluutdryving. Esagil-kin-apli's Diagnostiske Handbook volgden en paar logiske grundstellingen un annames, under meyr dat an de hande van seekdeverskynselen esegd kan worden wat vöär ne seekde nen seken had, wår et van küm, et wårskynlike seekdeverloup un wo grout de kans was at nen seken beater sol worden.

Esagil-kin-apli untdekkeden nen houp seekdes un ungemakken un beskreav öäre verskynselen in et Diagnostiske Handbook. Dårunder warren under meyr epilepsy un anverwante ungemakken. Hee skreav der de wyse van vaststelling un prognose ouk by.

Technology[bewark | bronkode bewarken]

De mesopotamiers dachten nen houp dinge uut, sou as metaal- un koaperbewarking, glasblåsen un lampenmaken, weaven, oaverströymingsbeheyr, waterupslag un landbewatering. See warren eyne van de eyrste samenleavingen van de brunstyd. See untwikkelden van koaper når bruns, gold un yser. Paleisen wörden dik anekleyded med disse kostbåre metalen. Ouk gebröäken se koaper, bruns un yser vöär afwärende gevechtskleyder un wåpens as swaerden, dolken, spears un knüppels.

Et is möägelik at Köäning Sennacherib van Assyrie in de 7. eywe vK ne archimedesskruve gebröäk vöär syne hangende höve van Babylon un Ninevey, al meynet de meyste geleyrden at dat ne greekske vinding was. In de partiaanske un sasaniaanske tyden wör de Batterye van Bagdad uutevünden, wat de eyrste batterye van de wearld eweasd kan hebben.

Et rad vünden de mesopotamiers sou'n 4500 jår vK uut, anvangelik enkel as draiskyve üm pötte up to bakken. Sou'n dusend jår later, rund 3500 vK, verskynet de eyrste mesopotamiske teykeningen van wagens med rader. Med strydwagens warren gröttere afstanden to oaverbrüggen in körteren tyd un veldslage makkeliker to winnen.

Gelöyv un wysbegearde[bewark | bronkode bewarken]

Mesopotamiers gelöyvden at de aerde ne platte skyve was, med an alle kanten ne unmündige lösse rüümde der ümhen. Der boaven dreyv den heamel. Ouk meynden se at der oaveral water was, der up, der under un upsyd. Dår küm ouk et heylal vandan. Mesopotamie was polyteistisk, wat inhöld dat se meyrere goden togelyke anbeyden. Dår sat de streake wat verskil in. Döär mekander gelöyvden se in den god An un godinne Ki, dee samen et heylal Anki förmden. See hadden nen söäne, Enlil, den luchtgod, den starksten van alle goden.

Wysbegeyrde[bewark | bronkode bewarken]

De verskeidene beskavingen in disse streake hebbet de abrahamitiske gelöyve öäre ideen van. Med name den hebreywsken Bybel. Vöäral in et book Genesis is dat good to verneamen.

Den undersöker Sjors Buccellati meynt dat den oorsprung van de wysbegeyrde selv uut mesopotamiske wysheid to seen is. Dat draiden üm en paar leavenswysheiden un etiske saken, torügge to vinden in tweyspråken, heldendichtsels, folklore, gesangen, sangteksten, skryvwark un gesegdes. Babyloniers keaken wyder as empiriske wårneamingen un untwikkelden redeneringen un rationaliteit. Se vünden logika slim belangryk.

Et babylonisk denken had flinken invlood up vroge oldgreekske un hellenistiske filosofy. Vöäral den babylonisken tekst Pessimistisken Tweyspråk ståt dinge in dee slim lyket up de latere sofisten, de heraklitiske doktrine van dialektyk, de dialogen van Plato un ouk nen vöärlouper van de sokratiske warkwyse. Den ionisken wysgeyr Tales haalden ideen uut babyloniske kosmology.

Kunst un kultuur[bewark | bronkode bewarken]

Bouwwarken[bewark | bronkode bewarken]