Twentse Jazzerieje
De Twentse Jazzerieje was van 2011 töt 2013 een vast onnerdeel van t International Jazz Festival in Eanske. Veur de Jazzerieje wörden alle joaren tien neje leedkes in t Twents (en sind 2012 ok annere Oaveriesselse dialektn) skrevven, woarop dan weer muziek skrevven wör wat oetvoord wör deur n jazzkombo van konservatoriumstudenten.
Oet veurroondes wörden tien zängers en zängeressen keuzen, woarmet tien tekstskrievers nen tekst gungen skrieven. Dizze tekste wörden doarnoa deurgevven an tien muziekskrievers, dee doarop muziek skreven, in ovverleg met de zängers en zängeressen en de tekstskrievers. Op et International Jazz Festival wör dan de finale höalden met de neje leedkes. De muziek wör oetvoord deur studeanten van t ArtEZ Konservatorium oet Eanske.
Et festival wör regeld deur Theaterburo Mélange in samennwearking met de Proveensie Oaveriessel. Do as et Grolsch International Jazz Festival ophövven wör, skeiden de Jazzerieje der ok met oet.
Geskiedenis
[bewark | bronkode bewarken]In 2011 wör de Jazzerieje veur et eerst organiseerd. De finale wör höalden op 11 juni op de Oale Maarkt in Eanske. Disse jazzerieje wör wunnen deur Merel Moelker oet Grönningen, met et nummer Stekkelhöarig, wat skrevven wör deur Laurens ten Den, en de muziek was van Rob Horsting. Deur heavigen reagen mos de jazzerieje een half uur staakt worden. Tiedns et juryberoad treud Martijje oet Dreante op.
In 2012 hadden ze der better wear bie. Disse jazzerieje was oetbreidt töt heel Oaveriessel, in samenwearking met de Iesselakademie. Hierdeur köm der ok een deelnemmer oet Zwolle in de finale. Disse jazzerieje wör wunnen deur Petra ter Denge oet Loster, met et nummer Kræng, wat skrevven wör deur Martin ter Denge, op muziek van Jan Wessels.
De Jazzerieje van 2013 wör wunnen deur Arla Brandsma met et nummer Jazzerieje (De klokke liek). Et was skrevven döär Herman Kampman en op muziek zat deur Rik Elings.