Flevomeer

Oet Wikipedie, de vraaie enzyklopedie
Gao naor: navigasie, zeuk
An t begin van t Subatlantikum bestung t Flevomeer al.

t Flevomeer (Latien: Flevo Lacus of Flevum) was in de Romeinse tied (tot ongeveer 400 n.Chr.) n binnenwaoter in de Lege Laanden, n zeutwaotergebied dat in umvang kleinder was as t Iesselmeer noen is. De naam van t meer is veural bekend ewörden mit dank an n beschrieving van Pomponius Mela, n Romeinse geograaf. n Verbiending mit de Noordzee was der in t begin niet. As gevolg van de hogere temperaturen steeg tussen de 5e en 8e eeuw de zeewaoterspegel. Hierdeur nam t meer in umvang toe en wördden t in grootte vergeliekbaor mit t Iesselmeer.

Dit meer kreeg bekendheid as t Almare of Almere, vrie vertaald t grote meer. In n proses dat in totaal n eeuw of achte duurden, sloekten de an-evoerde waotermassa's alsmar meer laand op. Brak en zeut waoter vermengden zich zeutjes an mit mekaar en in 1340 deuk veur t eerst de naam Zujerzee op. t Duurden nog tot umstreeks 1600 tot de boel volledig verzilt raakten en de Zujerzee n echte zee eneumd kon wörden.

t Flevomeer ontwikkelden zich nao de Romeinse tied deur de aofslag van de oevers tot t Almere. Waorschienlik ontstung in de middeleeuwen[1] mit t stiegen van de zeespegel en t aofgraven van veengronden deur de Friezen in West-Frieslaand (Enkhuzen, Medemblik enz.) via t Vlie n verbiending tussen t Almere en de Waddenzee en ontstung de Zujerzee.

t Was oek de naam van de polders Oostelik en Zujelik Flevolaand veurdat ze in 1957 en 1968 dreugeleegd wördden en gien deel meer uutmaakten van t Iesselmeer.

Allewel t niet juust is, wördden de term véúr de dreugeleging van disse polders oek wel as andujing veur t hele Iesselmeer gebruukt.

Referensies[bewark | bronkode bewarken]

  1. J. Buisman en A.F.V. van Engelen (2000) - Duizend jaar weer, wind en water in de lage landen, deel 1 tot 1300, blz. 361, Uitgeverij Van Wijnen, ISBN 90-5194-075-0
Nuvola apps ksig.png Dit artikel is eschreven in t West-Veluwse dialekt van Nunspeet, in de Algemene Nedersaksiese Schriefwieze.