Boswachteri'je Stappest

Oet Wikipedie, de vraaie enzyklopedie
Gao naor: navigasie, zeuk
Heideveld in 't Stappester Bos

De Boswachteri'je Stappest (ok wal: Stappester Bos of ienvoldigweg Staatsbos(sen)) is een an-eplaant bos van Staatsbosbeheer op een ontginningsveld in de gemiente Stappest.

Ligging[bewark | bronkode bewarken]

Zicht op 't Stappester Bos

't Roem bemeten bos lig in een wieder agrarische umgeving. Daorumme bint dieren in 't wild d'r drok op, zoas reegies, dassen, katekers, raansoelen en edders.

't Lig ten oosten van 't dörp Stappest, ten westen van Old Averiest, ten noorden van Ni'jlusen en ten zuden van de Riest, de greens tussen Drenthe en Oaveriessel. Teeng 't bos an ligt de dörpies De Rieverst en De Punt.

Ontstaon[bewark | bronkode bewarken]

't Staatsbos is ontstaon op vroggere heidegrond. Tussen 1930 en 1940 hebt warkelozen uut 't westen 't bos an-eplaant, veural mit naoldbomen. Zi'j waren deur de warkverschaffing in-ezet vanwegen de economische crisis. Een belangrieke bestemming van 't bos was holtperductie.

Netuur[bewark | bronkode bewarken]

Meer in 't Stappester Bos

De miest veurkomende bomen bint fiensparren, Japanse lariksen en Douglassparren. Ok gruuit d'r Corsicaanse en Oostenriekse dennen, ekkelbomen en borken. D'r bint veenties die niet veur bezukers toegaankelijk bint en veule stökkies heide, daoraj op de zaand- en schulpenpadties kunt kuiern en fietsen. An de noordraand viej de netuurterreinen Koothaor, Zwatte Venen, Gaanzeplas, Zoere Grachten en Vier Bargen.

Veurzienings[bewark | bronkode bewarken]

Speulviever in recreatiegebied de Zwatte Dennen

D'r bint speciaole ruterpaden, een mountainbike-route, völle padties umme te fietsen en kuieren en ok een paar geasfalteerde wegen. Um oaver 't bos te leren is er een activiteitenparcours en um 't lief te bewegen een trimparcours.

't Staatsbos hef een netuurkampeerterrein, de Dassenbörg, en een ondiepe speulplas mit een zaandstraandtien, de Zwatte Dennen, ok wal 't Schot enuumd. (Dizze viever is niet de oorspronkelijke. Die lig een klein endtien d'r vandaon en is niet meer toegaankelijk veur bezukers.) D'r is een kleine dagcamping, d'r bint huussies veur 't gemak en in 't hoogseizoen is 't cafetaria lös. An beide kaanten hej een parkeerterrein midden tussen de bomen. In de zomer koomt hier veule Stappester jongen op of.

In 1995 hef de paragnost Van der Veen een boom bi'j de Zwatte Dennen an-ewezen die genezende krachten zol hebben. Uut de wiede umtrek kwaamp er volk op of. Lu die as hier hellig oaver waren, hebt de boom een jaor later ummezaagd.

Uutgaonde verwiezings[bewark | bronkode bewarken]

Nuvola apps ksig.png Dit stok is eskreven in 't Zuudwest-Zuud-Drèents van de Drèents-Oaveriesselse grèensstreek.